ކޯވިޑް19އަށްފަހު މިހާރު މަޑުމަޑުން ކެފޭ ރެސްޓޯރަންޓްތަކުގެ ވިޔަފާރި ރަނގަޅުވަމުން އަންނަކަމަށް ރެސްޓޯރަންޓް އެސޯސިއޭޝަނުން ވިދާޅުވެއްޖެއެވެ.
ކޯވިޑްގެ އެންމެ ދަތިހާލަތުގައި ކެފޭ ރެސްޓޯރަންޓްތަކުގެ ވިޔަފާރި އެއްކޮށް ކަހަލަ ގޮތަކަށް ވަނީ ބަނގުރޫޓުވެފައެވެ.
ޕީއެސްއެމް ނިއުސްއަށް މައުލޫމާތުދެއްވަމުން ރެސްޓޯރަންޓް އެސޯސިއޭޝަނުން ވިދާޅުވީ، ކޯވިޑް19 އިން ރައްކާތެރިވުމަށް އެޅި ފިޔަވަޅުތަކާއިއެކު ކެފޭ ރެސްޓޯރަންޓްތައް ބަންދުކޮށްފައި ހުރިއިރު މި ސިނާއަތައް ފޫބައްދަން ދަތި ގެއްލުންތަކެއް ކުރިމަތިވިކަމަށެވެ. ކޯވިޑުން ރައްކާތެރިވުމަށް އެޅި ފިޔަވަޅުތަކާއެކު ޑެލިވަރީގެ ޙިދުމަތް އެކަނި ދެވޭގޮތަށްވެސް ކެފޭ ރެސްޓޯރަންޓްތައް ގިނަ ދުވަސްތަކެއް ވަންދެން ޙިދުމަތް ދިނެވެ. އޭގެފަހުން ރޭގަނޑު 8 ޖަހަންދެން ކެފޭ ރެސްޓޯރަންޓްތައް ހުޅުވުމުގެ ހުއްދި އެޗްޕީއޭއިން ދިނެވެ.
ރެސްޓޯރަންޓް އެސޯސިއޭޝަނުން ބުނީ ރެސްޓޯރަންޓްތަކަށް އެންމެ ގިނައިން އާމްދަނީ ލިބޭ ވަގުތަކީ ރޭގަނޑުގެ ވަގުތުތަކުގައިކަމަށެވެ. ނަމަވެސް ކޯވިޑް19 ގެ ސަބަބުން މިލިއަނުން މި ސިނާއަތައް ގެއްލުން ވެގެންދިޔަކަމަށެވެ. ނަމަވެސް މިހާރު ދިން ލުއިތަކާއިއެކު ދަންވަރު 1 ޖެހުމާއި ހަމައަށް ކެފޭ ރެސްޓޯރަންޓްތައް ހުޅުވާފައި ބެހެއްޓެއެވެ. ރޯދަމަހުގެ ރޭތަކާއި ޝައްވާލްމަހުގެ ފުރަތަމަ 7 ދުވަސް ނިމެންދެން ކެފޭ ރެސްޓޯރަންޓްތައް ހަވީރު 5:30 އިން މެންދަމު 3:00 އާއި ހަމައަށް ހުޅުވާފައި ބެހެއްޓުމުގެ ހެއްދަ މިހާރު ވަނީ ދީފައެވެ.
ރެސްޓޯރަންޓް އެސޯސިއޭޝަނުން ބުނީ ކޯވިޑަށްފަހު މިހާރު ރެސްޓޯރަންޓްތައް ހުޅުވާފައި ބެހެއްޓޭ ވަގުތުތައް އިތުރުވުމުގެ ސަބަބަން މި ސިނާއަތް މަޑުމަޑުން ރަނގަޅުވެ އާމްދަނީ ލިބެމުންއަންނަކަމަށެވެ. ނަމަވެސް މި އަޑިގުޑަންގަނޑުން އެއްކޮށް އަރައިގަތުމަށް 3 އަހަރާއި 5 އަހަރު ދުވަހުގެ މުއްދަތެއް ނަގާނެކަމަށް އަންދާޒާކުރެވޭކަމަށް ރެސްޓޯރަންޓް އެސޯސިއޭޝަނުން ބުނެއެވެ.
"ކޯވިޑްގެ ފަހުން ހުޅުވާލީމައި ވަރަށް ބާރަށް އެބައާދޭ ހަމަ ޕިކްކުރަމުން. އަޅުގަނޑުމެން ހީކުރިވަރަށް ވުރެ ހަމަ މާބޮޑުތަންވެސް ރަނގަޅު ހަމަ އިރާދަކުރެއްވިއްޔާ. ވަރަށް ބާރުމިނެއްގައި ރަނގަޅުވަމުން އަންނަނީ. ޓޫރިޒަމް ހުޅުވާލީމައި އިޤްތިޞާދު ވަރަށް ކުރިއަރަމުން މިއަންނަނީ. ޓޫރިޒަމް ރަނގަޅުވާވަރަކަށް ރެސްޓޯރަންޓްތަކުގެ ވިޔަފާރިތައްވެސް ހަމަ ރަނގަޅުވަމުން މިއަންނަނީ" ރެސްޓޯރަންޓް އެސޯސިއޭޝަނުން ބުންޏެވެ.
ގިނަ ރެސްޓޯރަންޓްތަކުގައި ޕެންޑިންގައި މިހާރުވެސް ގިނަ ބިލްތަކެއް އެބަހުރިކަމަށް އެ އެސޯސިއޭޝަނުން ބުނެއެވެ. އޭގެތެރޭގައި ޔޫޓިލިޓީ ބިލްތަކާއި، ޖީއެސްޓީވެސް ހިމެނެއެވެ. މި ބިލްތައް ދެއްކުމަށްވެސް ގިނަ ރެސްޓޯރަންޓްތަކަށް ދަތިތަކާއި ކުރިމަތިލާންޖެހިފައިވާކަމަށް އެ އެސޯސިއޭޝަނުން ފާހަގަކުރެއެވެ.