އެނބޫދޫ ފިނޮޅު ކައިރީ އޮތް ތެޔޮ ބޯޓެއްގައި އަލިފާން ރޯވެ އަޑިއަށް ދިޔަ ޚާދިސާ ރައީސް އޮފީހުން ވަރަށް ގާތުން ބަލަމުންދާކަމަށް ރައީސް އޮފީހުގެ ތަރުޖަމާނު މުޙައްމަދު މަބްރޫކް އަޒީޒް ވިދާޅުވެއްޖެއެވެ.
ބްރޯ ފިއުލް ޕްރައިވެޓް ލިމިޓެޑްގެ "ސީ ސްޓަރ" ނަމަކަށް ކިޔާ މި ބޯޓު، ކ.އެނބޫދޫ ފިނޮޅުކައިރީގައި އޮއްވާ ބޯޓުގައި އަލިފާން ރޯވިކަމުގެ މައުލޫމާތު އެމްއެންޑީއެފް ފަޔަރ އެންޑް ރެސްކިއުއަށް ރިޕޯޓްކޮށްފައިވަނީ އިއްޔެގެ ހަވީރުގެ ވަގުތުގައެވެ.
މިކަމާއި ގުޅޭގޮތުން ކުރެއްވި ޓްވިޓެއްގައި ރައީސް އޮފީހުގެ ތަރުޖަމާނު މަބްރޫކް ވިދާޅުވީ، ފިއުލް ބޯޓުގައި އަލިފާން ރޯވެ އަޑިއަށް ދިޔަ ހާދިސާގެ ސަބަބުން ތިމާވެއްޓަށް ލިބޭ ގެއްލުން ދެނެގަތުމަށް ސަރުކާރުން ކަމާ ގުޅުންހުރި ފަރާތްތަކާއެކު ވަރަށް ގާތުން ބަލާ މޮނިޓަރ ކުރަމުންދާކަމަށެވެ. އެގޮތުން އެމްއެންޑީއެފްއާއި އީޕީއޭއާއިއެކު ސަރުކާރުން ވަރަށް ގާތުން މިކަން ބަލަމުން އަންނަކަމަށާއި މިވަގުތަށް ތެޔޮ ލީކްވިކަމުގެ އެއްވެސް މައުލޫމާތެއް ލިބިފައިނުވާކަމަށް މަބްރޫކް ވިދާޅުވިއެވެ.
މިހާދިސާ ހިނގާފައިވަނީ ކ.އެނބޫދޫފިނޮޅުގެ 1.52 ނޯޓިކަލް މޭލު އިރު ދެކުނުން، އަތޮޅުން ބޭރުންނެވެ. އެމްއެންޑީއެފްއިން ވިދާޅުވީ ބޯޓް އަޑިއަށް ގޮސްފައިވަނީ 1000 މީޓަރާއި 1400 މީޓަރާއި ދެމެދުގެ ފުންމިނަކަށް ކަމަށެވެ. އަދި ބޯޓުގައި 60 ހާސް ލީޓަރުގެ ޑީސަލް ހުރިކަމަށްވެސް އެމްއެންޑީއެފްއިން ވިދާޅުވެއެވެ. ނަމަވެސް މިހާތަނަށް ތެޔޮ ލީކުވުމުގެ އެއްވެސް ނިޝާނެއް ފެނިފައިނުވާކަމަށްވެސް އެމްއެންޑީއެފްއިން ވިދާޅުވެއެވެ.