އުސޫލާ ޚިލާފަށް ވަރކް ޕަރމިޓް އިންޝުއަރރެންސްގެ ޚިދުމަތް ފޯރުކޮށްދޭ ފަރާތްތަކުގެ ހުއްދަ ބާޠިލްކުރާނެކަމަށް އިކޮނޮމިކް މިނިސްޓްރީން ވިދާޅުވެއްޖެއެވެ.
އެމިނިސްޓްރީން ވިދާޅުވީ ދިވެހިރާއްޖޭގައި ވަޒީފާ އަދާކުރާ ބިދޭސީނަށް ވަރކް ޕަރމިޓް ހޯދުމަށްޓަކައި ނަގަންޖެހޭ "ވަރކް ޕަރމިޓް އިންޝޫރެންސް"ގެ ޚިދުމަތް ދިނުމުގައި، އެމިނިސްޓްރީން އެކުލަވާލާފައިވާ އުސޫލުތަކާ ޚިލާފަށް، އެންމެދަށްވެގެން ފުރިހަމަކުރަންޖެހޭ ބައެއް ކަންކަން އުނިވެގެންދިއުމަށް މަގުފަހިވާގޮތަށް، އިންޝުއަރރެންސް ދޭ ބައެއް ފަރާތްތަކުން ޕޮލިސީ ފަރުމާކޮށް ވިއްކަމުންދާކަމުގެ މަޢުލޫމާތު ލިބިފައިވާކަމަށެވެ.
އިންޝުއަރރެންސް ޕޮލިސީ އެކުލަވާލައި ވިއްކުމުގައި އިކޮނޮމިކް މިނިސްޓްރީން ކަނޑައަޅުއްވާފައިވާ އުސޫލުތަކާ އެއްގޮތަށް ޢަމަލުކުރުމަށް އިކޮނޮމިކް މިނިސްޓްރީން ވަނީ އަންގަވާފައެވެ. މި އުސޫލާ ޚިލާފަށް ދޫކޮށްފައިވާ އިންޝުއަރރެންސް ޕެކޭޖްތަކަކީ، ރާއްޖޭގައި ވަޒީފާއަދާކުރާ ބިދޭސީންގެ ވަރކްޕަރމިޓް ހޯދުމުގައި ބަލައިގަނެވޭނެ ޕެކޭޖްތަކެއް ނޫންކަމަށް އެމިނިސްޓްރީން ވިދާޅުވެއެވެ. އަދި އުސޫލާ ޚިލާފަށް ވަރކްޕަރމިޓް އިންޝުއަރރެންސްގެ ޚިދުމަތް ފޯރުކޮށްދޭ ފަރާތްތައް، އިންޝުއަރރެންސް ދިނުމަށް ހުއްދަ ދީފައިވާ ފަރާތްތަކުގެ ލިސްޓުން އުނިކުރާނެކަމަށްވެސް އިކޮނޮމިކް މިނިސްޓްރީން ވަނީ ވިދާޅުވެފައެވެ.