ޕޮލެންޑުގެ ޤައުމީ އެއަރލައިންގެ ދަތުރުތައް ރާއްޖެއަށް ފަށައިފި

ޕޮލެންޑުގެ ޤައުމީ އެއަރލައިން ލޮޓް ޕޮލިޝްއިން ރާއްޖެއާއި ޕޮލެންޑާއި ދެމެދު ސީދާ ދަތުރުތައް ފަށައިފިއެވެ.

ލޮޓް ޕޮލިޝްއިން ރާއްޖެއަށް ދަތުރުތައް ފަށާފައިވަނީ މިދިޔަ ހުކުރު ދުވަހުއެވެ.

ލޮޓް ޕޮލިޝްގެ ދަތުރުތައް ރާއްޖެއަށް ކުރާނީ ޕޮލެންޑްގެ ވެރިރަށް ވޯރސޯއިން ވެލާނާ އިންޓަނޭޝަނަލް އެއަރޕޯޓަށެވެ. ހުކުރު ދުވަހު އެ އެއަރލައިންގެ ފުރަތަމަ ދަތުރު ބާއްވާފައިވާއިރު، އެދަތުރުގައި ރާއްޖެއަށް 294 ފަސިންޖަރުން ވަނީ އައިސްފައެވެ.

މޯލްޑިވްސް އެއަރޕޯޓްސް ކޮންޕެނީ ލިމިޓެޑް، އެމްއޭސީއެލްއިން ވިދާޅުވީ، ލޮޓް ޕޮލިޝްއިން ރާއްޖެއަށް 5 ޗާޓަރޑް ދަތުރުކުރާނެކަމަށެވެ. މި ދަތުރުތައް ކުރާނީ އަންނަ މާރޗްމަހުގެ ނިޔަލަށެވެ. މި ދަތުރުތައް ކުރަނީ ޓްރެވަލް އޭޖެންސީ ސަން އޯޝަން މޯލްޑިވްސް މެދުވެރިކޮށެވެ.

All the way from Warsaw, we have @LOTPLAirlines flying to the Maldives this season with weekly flights ? ?? ✈️ ??
Welcome to the #SunnySideofLife ! ☀️ ? ? ? #VisitMaldives#flyLOT#FlyWithUs pic.twitter.com/4QRGNgFgUs

— VelanaAirport (@VelanaAirport) February 21, 2021

ޕޮލެންޑްގެ ޤައުމީ އެއަރލައިންއިން ރާއްޖެއަށް ކުރާ މި ދަތުރުތަކުގެ ސަބަބުން އައު މާކެޓްތަކަށް ރާއްޖޭގެ ފަތުރުވެރިކަން ހުޅުވި، ރާއްޖެ އަންނަ ފަތުރުވެރިންގެ އަދަދު އިތުރުވުމަށް އެހީތެރިވެދޭނެއެވެ. މިހާރުވެސް ރާއްޖެއަށް ބައިނަލްއަޤްވާމީ 28 އެއަރލައިނަކުން އަންނަނީ ދަތުރުތައް ބާއްވަމުންނެވެ.

ޓޫރިޒަމް މިނިސްޓްރީން އެންމެ ފަހުން އާންމުކޮށްފައިވާ ތަފާސް ހިސާބުތައް ދައްކާގޮތުން މިމަހުގެ 17 ވަނަ ދުވަހުގެ ނިޔަލަށް ރާއްޖެއަށް 151113 ފަތުރުވެރިން ވަނީ ޒިޔާރަތްކޮށްފައެވެ. އަދި މިނިސްޓްރީން އަމާޒުކޮށްފައި ވަނީ މިއަހަރުގެ ތެރޭގައި ރާއްޖެއަށް 1.5 މިލިއަން ފަތުރުވެރިން ގެނައުމަށެވެ.