މިއަހަރުގެ މިހާތަނަށް ރާއްޖެއަށް އެންމެ ގިނަ ޢަދަދަކަށް ފަތުރުވެރިން އައިސްފައިވަނީ އެމިރޭޓްސްގެ ފްލައިޓްތަކުގައިކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައިފިއެވެ.
ޓޫރިޒަމް މިނިސްޓްރީން ނެރޭ "މޯލްޑިވްސް ޓޫރިޒަމް އަޕްޑޭޓް" ރިޕޯޓުގައިވާގޮތުން ފެބްރުއަރީ މަހުގެ 3ވަނަ ދުވަހުގެ ނިޔަލަށް އެމިރޭޓްސްއިން ވަނީ ރާއްޖެއަށް 252 ދަތުރުކޮށްފައެވެ. މި ދަތުރުތަކުގައި ރާއްޖެއަށް ޖުމްލަ 20،741 ފަތުރުވެރިން ވަނީ ޒިޔާރަތްކޮށްފައެވެ. އެމިރޭޓްސްއިން ދަނީ ހަފްތާއަކު 7 ދަތުރު ރާއްޖެއަށް ބާއްވަމުންނެވެ. އެމިރޭޓްސްއިން ރާއްޖެއަށް ދަތުރުތައް ބާއްވަނީ ދުބާއީއާއި ރާއްޖެއާ ދެމެދުއެވެ.
މިއަހަރުގެ މިހާތަނަށް 2ވަނައަށް އެންމެ ގިނައަދަދަކަށް ފަތުރުވެރިން އައިސްފައިވަނީ ޤަތަރު އެއަރވޭސްގެ ފްލައިޓްތަކުގައެވެ. ޤަތަރު އެއަރވޭސްއިން ރާއްޖެއަށް 13،542 ފަތުރުވެރިން ވަނީ އައިސްފައެވެ. އަދި އަހަރުގެ މިހާތަނަށް އެ އެއަރލައިނުން ވަނީ 220 ފްލައިޓް ރާއްޖެއަށް ބާއްވާފައެވެ. ޤަތަރު އެއަރވޭސްއިން ރާއްޖެއަށް ދަތުރުތައް ބާއްވަނީ ޤަތަރުގެ ވެރިރަށް ދޯހާއިން ސީދާ ވެލާނާ އިންޓަރނޭޝަނަލް އެއަރޕޯޓަށެވެ.
ރާއްޖެއަށް 3 ވަނައަށް އެންމެ ގިނަ ފަތުރުވެރިން އައިސްފައިވަނީ އިންޑިގޯއިންނެވެ. އަދި 4 ވަނައަށް އެންމެ ގިނަ ފަތުރުވެރިން އައިސްފައިވަނީ ގޯ އެއަރއިންނެވެ. އިންޑިގޯއިން ރާއްޖެއަށް 182 ފްލައިޓް ބާއްވައި 11،897 ފަތުރުވެރިން ވަނީ ރާއްޖެއަށް ގެނެސްފައެވެ. ގޯއެއަރއިން ރާއްޖެއަށް ބާއްވާފައިވަނީ 200 ފްލައިޓެވެ. މި ދަތުރުތަކުގައި ރާއްޖެއައި ފަތުރުވެރިންގެ އަދަދަކީ 11،687 ކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައެވެ.
އިންޑިއާގެ ގިނަ އެއަރލައިންތަކަކުން މިހާރު އަންނަނީ ރާއްޖެއަށް ދަތުރުކުރަމުންނެވެ. އަހަރުގެ މިހާތަނަށް 20000 އަށްވުރެ ގިނަ ފަތުރުވެރިން ވަނީ އިންޑިއާއިން ރާއްޖެއަށް އައިސްފައެވެ.
ކޯވިޑް-19އަށްފަހު ރާއްޖޭގެ ބޯޑަރު އަލުން ހުޅުވާލާފައިވަނީ މިދިޔަ ޖުލައި މަހުގެ 15ވަނަ ދުވަހުއެވެ. ބޯޑަރު ހުޅުވާލިފަހުން މިހާތަނަށް ބައިނަލްއަޤްވާމީ 27 އެއަރލައިނަކުން އަންނަނީ ރާއްޖެއަށް ދަތުރުތައް ކުރަމުންނެވެ.