ވަގުތު ނޫހުގައި ޝާއިރުކުރި ޚަބަރަކާ ގުޅިގެން އެ ނޫހުގެ ނޫސްވެރިންނަށް މަރުގެ އިންޒާރުދެމުންދާތީ، އެކަން ފުލުހުންގެ ސަމާލުކަމަށް ގެނެސްފައިވާކަމަށް މޯލްޑިވްސް މީޑިއާ ކައުންސިލލުން ވިދާޅުވެއްޖެއެވެ.
31ޑިސެމްބަރުގައި "ވަގުތު 26" ތަޙުޤީޤު: އައްޑޫ ހަރުކަށިފިކުރުގެ ވިއުގަ – ފިތްކަނޑައިގެންދާހާ ވަރުގަދަ!" މި ސުރުޙީގެ ދަށުން ޝާއިއުކޮށްފައިވާ ރިޕޯޓާއި ގުޅިގެން އެ ނޫހުގެ ނޫސްވެރިންނަށް މަރުގެ އިންޒާރު ލިބެމުންދާކަން، ކައުންސިލްގެ ސަމާލްކަމަށްވަނީ ގެނެސްފައެވެ.
މި މައްސަލައާއި ގުޅިގެން މޯލްޑިވްސް މީޑިއާ ކައުންސިލްގެ ކަންބޮޑުވުންވަނީ ފާޅުކޮށްފައެވެ. މިޑިއާ ކައުންސިލަށް ޤާނޫނުން މަތިކޮށްފައިވާ މަސްޢޫލިއްޔަތުގެދަށުން، މިކަން މޯލްޑިވްސް ޕޮލިސް ސަރވިސްގެ ސަމާލުކަމަށްވަނީ ގެނެސްފައެވެ. މައްސަލަ ހިނގާފައިވާގޮތް ބަލައި ތަޙުޤީގުކޮށް، ކަމުގެ ޙަޤީގަތް ޙާމަކުރުމަށް އަޅަންޖެހޭ ފިޔަވަތައް އަޅައިދިނުއަމަށް މޯލްޑިވްސް ޕޮލިސް ސަރވިސްއަށް ކައުންސިލުންވަނީ އިލްތިމާސްކުރައްވާފައެވެ.
ޚިޔާލުފާޅުކުރުމުގެ މިނިވަންކަމާއި މަޢުލޫމާތު ހޯދާ ބަލައިގަތުމުގެ މިނިވަންކަމަށް ހުރަސްއެޅޭގޮތަށް ސަރުކާރުންނާއި މީޑިއާއާއި އެހެނިހެން ފަރާތްތަކުން ކުރާ ކަންކަން، ކަމާބެހޭ އިދާރާތަކަށް ހުށައަޅައިގެން ޙައްލުކުރުމަކީ މޯލްޑިވްސް މިޑިއާ ކައުންސިލްގެ ޒިންމާއެކެވެ.
މީޑިއާ ކައުންސިލުން ވިދާޅުވީ މިނިވަންކަމާއިއެކު ފިކުރުކުރުމާއި، އިސްލާމްދީނުގެ އަސްލަކާ ޚިލާފައި ނުވާހާ ހިނދަކު، ޚިޔާލުފާޅުކުރުމުގެ މިނިވަންކަމާއި ނޫސްވެރިކަމުގެ މިނިވަންކަމަކީ ޤާނޫނުން ކަށަވަރުކޮށްދޭ އަސާސީ ޙައްގެއްކަމަށެވެ. ޤާނޫނު އަސާސީން ލިބިދޭ މި ޙައްގުގެ އިމުގެ ތެރެއިން ފާޅުކުރާ ޚިޔާލެއްގރ ސަބަބުން ނޫސްވެރިޔާގެ ޖިސްމަށް ގެއްލުންދީ، ފުރާނައަށް ނުރައްކާކޮށް، ބިރުދައްކައި އިންޒާރުދިނުމަކީ އެއްވެސް ޙާލެއްހައި ބަލައިގަނެވޭނެ ކަމެއް ނޫންކަމަސްވެސް މީޑިއާ ކައުންސިލްގެ ނޫސްބަޔާނުގަ ވެއެވެ.