ފަތުރުވެރިކަމަށް ލިބެމުންދާ ކުރިއެރުމުގެ އަސްލަކީ ބޯޑަރު ހުޅުވާލަން ރައީސް ނިންމެވި ނިންމެވުން: ތައްޔިބު
ރާއްޖޭގެ ފަތުރުވެރިކަމަށް މިއަދު ލިބެމުންދާ ކުރިއެރުމުގެ އަސްލަކީ ޖުލައި 15 ވަނަ ދުވަހު ރާއްޖޭގެ ބޯޑަރު އަލުން ހުޅުވާލަން ރައީސުލްޖުމްހޫރިއްޔާ ނިންމެވި ނިންމެވުމުން ލިބެމުންދާ ކުރިއެރުންތަކެއްކަމަށް އެމްއެމްޕީއާރުސީގެ މެނޭޖިންގ ޑިރެކްޓަރ ތައްޔިބު މުޙައްމަދު ވިދާޅުވެއްޖެއެވެ.
މޯލްޑިވްސް މާކެޓިންގ އެންޑް ޕަބްލިކް ރިލޭޝަން ކޯޕަރޭޝަން، އެމްއެމްޕީއާރުސީން މިއަހަރު ކުރިއަށްގެންގޮސްފައިވާ ކަންތައްތަކާއި ލިބިފައިވާ ކާމިޔާބީތަކާއި ގުޅޭގޮތުން ނޫސްވެރިންނަށް މައުލޫމާތުދެއްވަމުން އެ ކުންފުނީގެ މެނޭޖިންގ ޑިރެކްޓަރ ތައްޔިބު ވިދާޅުވީ، މާކެޓިންގ ހަރަކާތްތައް ކުރިއަށްގެންދިއުމަށް މިއަހަރު އެމްއެމްޕީއާރުސީއަށް ގިނަ ގޮންޖެހުންތަކަކާއި ކުރިމަތިލާންޖެހުނުކަމަށެވެ. އެގޮތުން މީގެކުރިން މާކެޓިންގ ހަރަކާތްތައް ކުރިއަށްނުގެންދާ މުޅިން އައު ގޮތްތަކަކަށް މަސައްކަތް ކުރަންޖެހުނުކަމަށެވެ. ނަމަވެސް މި ގޮންޖެހުންތަކާއެކުވެސް އެމްއެމްޕީއާރުސީގެ މަސައްކަތްތައް ހުއްޓާނުލައި ކުރިއަށްގެންދިޔަކަން ތައްޔިބު ފާހަގަކުރެއްވިއެވެ.
ތައްޔިބު ވިދާޅުވީ، މިއަދު ރާއްޖޭގެ ފަތުރުވެރިކަން މިދެކޭ ކާމިޔާބީގެ އެންމެ ބޮޑު އަސްލަކީ ޖުލައި 15 ވަނަ ދުވަހު ރާއްޖޭގެ ބޯޑަރު އަލުން ހުޅުވާލުމަށް ރައީސުލްޖުމްހޫރިއްޔާ ނިންމެވި ނިންމުންކަމަށެވެ.
"ގުދުރަތީގޮތުން ކުރިމަތިވެފައިވާ ކާރިސާގައި ދިވެހިރާއްޖޭގެ ބޯޑަރު 15 ޖުލައިގައި ރައީސުލްޖުމްހޫރިއްޔާ ހުޅުއްވަވަން ނިންމެވި ނިންމެވުމަކީ މިއަދު އަޅުގަނޑުމެން މިދެކޭ ކާމިޔާބުގެ އަސްލު. އެދުވަހު އަޅުގަނޑުމެންގެ ބޯޑަރު ހުޅުވާނުލިނަމަ މިއަދަކު ފަސްހާހުން ހަތަރުހާހުން ދުވާލަކު މީހުން އަންނަތަނެއް ނުފެނުނީސް. އެހެންވީމަ އެއީ އަޅުގަނޑު ދެކޭގޮތުގައި ހަމަގައިމުވެސް މިކާމިޔާބުގެ ފެށުން" ތައްޔިބު ވިދާޅުވިއެވެ.
ތައްޔިބު ވިދާޅުވީ، އެމްއެމްޕީއާރުސީގެ ހަޔާތުގައިވެސް މިހާތަނަށް ނުކުރާހާ ގިނަ މަސައްކަތްތައް މިއަހަރުގެ ތެރޭގައި ކުރެވިފައިވާކަމަށެވެ. ކޯވިޑް19ގެ ސަބަބުން ޤައުމުތަކުގެ ބޯޑަރު ބަންދުކޮށް ރާއްޖޭގެ ފަތުރުވެރިކަން ހުއްޓިފައިވާ ދަނޑިވަޅުގައިވެސް އެމްއެމްޕީއާރުސީން ވަނީ ރާއްޖެ އިޝްތިހާރުކުރުމަށް ގިނަ މަސައްކަތްތަކެއް ކޮށްފައިކަމަށް ތައްޔިބު ވިދާޅުވިއެވެ. ތައްޔިބު ވިދާޅުވީ، މިއަހަރުގެ ތެރޭގައި 22 ޓާގެޓް މާކެޓެއްގައި އެމްއެމްޕީއާރުސީން 412 ހަރަކާތެއް ހިންގާފައިވާކަމަށެވެ.
"412 ހަރަކާތެއް ނުވަތަ އެކްޓިވިޓީއެއް ހިންގުނު. އެއީ 22 ޓާގެޓް މާކެޓަށް. 47 އެކްޓިވިޓީއެއް މިހާރުވެސް ކުރިއަށް އެބަދޭ. މިއީ އަޅުގަނޑު ދަންނަވާނީ ވަރަށް ބޮޑު ކާމިޔާބީއެކޭ. އަދި ކުރެވެމުންދާ މަސައްކަތުގެ ހެއްކެކޭ. 314 ހަރަކާތަކީ މި ކާރިސާގެ ތެރޭގައި އަޅުގަނޑުމެން ހިންގި ހަރަކާތްތައް." ތޮއްޔިބު ވިދާޅުވިއެވެ.
އަންނަ އަހަރުގެ ތެރޭގައިވެސް ދުނިޔޭގެ އެކި ކަންކޮޅުތަކުގައި ރާއްޖެ އިޝްތިހާރުކުރުމަށް އެމްއެމްޕީއާރުސީން ގިނަ ކެމްޕެއިން ހަރަކާތްތަކެއް ރާވާފައިވާކަމަށް އެ ކުންފުނިން ބުނެއެވެ. އޭގެތެރޭގައި އޮންލައިން އަދި ފިޒިކަލް ހަރަކާތްތައްވެސް ހިމެނެއެވެ. މިއަހަރު އެމްއެމްޕީއާރުސީން ކުރިއަށްގެންދިޔަ 90 އިންސައްތަ ހަރަކާތްތަކަކީ އޮންލައިންކޮށް ކުރިއަށްގެންދިޔަ ހަރަކާތްތަކެއްކަމަށް އެމްއެމްޕީއާރުސީން ބުނެއެވެ.