ސަރުކާރުން މާފަންނުގައި ހެދި ބަސް ޓަރމިނަލާއި ޕާކް ހުޅުވައިފިއެވެ.
މާފަންނު ވެސްޓް ޕަރކް ސަރަޙައްދުގައި ހެދި ބަސް ޓަރމިނަލާއި، ޕާކަކީ އެސްޓީއޯއާއި ރޯޑް ޑިވެލޮޕްމަންޓް ކޯޕަރޭޝަން އަދި ޔޫތު މިނިސްޓްރީގެ މަސައްކަތުން ހުޅުވި ތަނެކެވެ.
އެސްޓީއޯއިން ހެދި ބަސް ޓަރމިނަލާއި އާރުޑީސީން ހެދި ޕާކު ހުޅުއްވައިދެއްވީ ރައީސުލްޖުމްހޫރިއްޔާގެ ނައިބު ފައިސަލް ނަސީމެވެ. އެމަނިކުފާނު ވަނީ ބަސްޓަރމިނަލާއި ކަސްރަތުކުރާ ވަސީލަތްތަކާއިއެކު ހަދާފައިވާ ޕާކު ބައްލަވާލައްވާފައެވެ.
ބަސް ޓަރމިނަލާއި ޕާކު ހުޅުވުުގެ ރަސްމިއްޔާތުގައި އެސްޓީއޯގެ މެނޭޖިންގ ޑިރެކްޓަރ އަމްރު ވިދާޅުވި މި މަސައްކަތަަކީ މާލޭގައި ދިރިއުޅޭ މީހުންނަށް ހިތްފަސޭހަ މާޙައުލެއް ހޯދައިދިނުމަށާއި ބަހުގެ ޚިދުމަތް ހޯދާމީހުންނަށް ލުއިފަސޭހަކަމާއެކު އެޚިދުމަތް ލިބޭނެގޮތް ފަހިކޮށްދިނުމަށް ހެދި ތަނެއްކަމަށެވެ. މިމަސައްކަތުގައި މާލެ ސިޓީ ކައުންސިލާއި މޯލްޑިވްސް ރޯޑް ޑިވެލޮޕްމަންޓް ކޯޕަރޭޝަނާއި ޔޫތް މިނިސްޓްރީގެ ބޮޑު އެހީތެރިކަމެއް ލިބިފައިވާކަމަށް އަމްރު ވިދާޅުވިއެވެ.
ޕާކާއި ބަސް ޓަރމިނަލް ހެދުމުގެ ޢަމަލީ މަސައްކަތުގައި އެސްޓީއޯގެ އެކި ޑިޕާޓްމަންޓްތަކުގެ މުވައްޒަފުން ވަރަށް ބުރަކޮށް މަސައްކަތް ކުރައްވާފައިވާކަމަށް އަމްރު ވިދާޅުވިއެވެ.
"މާލެ ސިޓީ ކައުންސިލުން ހަވާލުކުރީ މިތަން ޒީނަތްތެރިކޮށް ބެލެހެއްޓުމަށް. އަޅުގަނޑުމެން ކުންފުނީގެ އެކި ޑިޕަރޓްމަންޓްތަކުގެ މުވައްޒަފުން، އިލެކްޓްރިޝަނުންނާއި އިންޖީނިއަރުންވެސް މަސައްކަތަށް ނުކުތް. ކުރިން ނުކުރާ މަސައްކަތަކަށްވީމަ، ޗެލެންޖިންގ މަސައްކަތަކަށްވީ. މިހާ ފުރިހަމައަށް މަސައްކަތް ކުރިއަށްގެންދެވުނީތީ މުވައްޒަފުންނަށް ޝުކުރު އަދާކުރަން." އަމްރު ވިދާޅުވިއެވެ.
ރަސްފަންނުގެ ބައެއްގެ ގޮތުގައި ހިމަނައި އޭރު އެ ސަރަޙައްދުގައި ބޭނުންކުރި މަގު ބަންދުކޮށް، މާލެ ވެސްޓް ޕާކު ސަރަޙައްދު އޮތީ ދިގުމުއްދަތެއްވަންދެން އަޅާނުލައި ދޫކޮށްލާފައެވެ. ނަމަވެސް ވެލި މަގު ނަގައި މިހާރުވަނީ އެ މަގު ދުއްވޭގޮތަށް ބަދަލުގެނެސްފައެވެ. އަދި ކުރީގެ ވެސްޓް ޕާކުގެތެރެއިން އިތުރު ކުޑަ މަގެއް ބަސް ދަތުރުކުރެވޭގޮތަށް ވަނީ ހަދާފައެވެ.
މި ބަސް ޓާމިނަލާއިއެކު އެ ސަރަޙައްދަށްވަނީ މާލެ-ހުޅުމާލެ ބަހުގެ ޚިދުމަތްވެސް ފަށާފައެވެ. މިދިޔަމަހު ސްޓެލްކޯއިންވެސް ވަނީ ޒަމާނީ ބަސް ޓަރމިނަލެއް ހަދާފައެވެ.