މިއަހަރުގެ މޯލްޑިވްސް މެރިން އެކްސްޕޯ ފަށައިފިއެވެ.
ކޯވިޑް19އާ ގުޅިގެން މިއަހަރުގެ މެރިން އެކްސްޕޯ ކުރިއަށްގެންދަނީ ވަރޗުއަލްކޮށްނެވެ.
މޯލްޑިވްސް މެރިން އެކްސްޕޯއަކީ މެރިން ދާއިރާގައި މަސައްކަތްކުރާ ދިވެހި އަދި ބޭރުގެ ފަރާތްތަކަށް، އެފަރާތްތަކުގެ އުފެއްދުންތައް ބައިނަލްއަޤްވާމީ ޕްލެޓްފޯމެއްގައި ދައްކާލުމުގެ ފުރުޞަތު ދިނުމުގެ ގޮތުން ބާއްވާ އެކްސްޕޯއެކެވެ.
މިއަހަރުގެ މެރިން އެކްސްޕޯ ކުރިއަށްދާނީ މިމަހުގެ 20 ވަނަ ދުވަހުން 22 ވަނަ ދުވަހުގެ ނިޔަލަށެވެ. ކޯވިޑް19 ގެ ސަބަބުން މިއަހަރު މެރިން ދާއިރާއަށް ގިނަ ގޮންޖެހުންތަކެއް ކުރިމަތިވެފައިވުމުގެ ސަބަބުން މިއަހަރުގެ އެކްސްޕޯ މެދުވެރިކޮށް މިކަންކަމާއި މެދު މަޝްވަރާކޮށް ހައްލެއް ލިބިގެންދާނެކަމަށް ބެލެވެއެވެ.
މިއަހަރުގެ އެކްސްޕޯ އިންތިޒާމްކުރަނީ މީޑިއަމް ޕްރައިވެޓް ލިމިޓެޑްގެ ފަރާތުންނެވެ. މިއަހަރުގެ އެކްސްޕޯގެ ތެރެއިން ލައިވް ވެބިނަރތައްވެސް ކުރިއަށްދާނެކަމަށް އިވެންޓް އިންތިޒާމްކުރާ ފަރާތުން ބުނެއެވެ. މި ވެބިނަރތައް މެދުވެރިކޮށް މެރިން ދާއިރާގައި ހަރަކާތްތެރިވާ ސަރުކާރުގެ ފަރާތްތަކާއި އަމިއްލަ ފަރާތްތައް މި ދާއިރާއާއި ގުޅޭގޮތުން މަޝްވަރާކުރާނެއެވެ.
އޮންލައިންކޮށް ކުރިއަށްދާ "ނެޓްވަރ ޒޯން" މެދުވެރިކޮށް މެރިން އެކްސްޕޯއަށް ޒިޔާރަތްކުރާ ފަރާތްތަކުން އެކަކު އަނެކަކާއި ބައްދަލުވެ މަޝްވަރާކޮށްލެވޭނެ އިންތިޒާމްވެސް ވަނީ ހަމަޖައްސާފައެވެ. މި އެކްސްޕޯގެ ތެރެއިން ބޯޓިން ދާއިރާގައި މަސައްކަތްކުރާ ފަރާތްތައް އެއްތަނަކަށް އައިސް އެމީހުންގެ ޕްރޮޑަކްޓް ޕްރޮމޯޓްކުރުމަށްވެސް އެހީތެރިވެދޭނެއެވެ.
މޯލްޑިވްސް މެރިން އެކްސްޕޯއަކީ ރާއްޖޭގެ ބޯޓިންގ ދާއިރާ ހަރުދަނާކުރުމަށްޓަކައި ނޭޝަނަލް ބޯޓިންގ އެސޯސިއޭޝަން އޮފް މޯލްޑިވްސްއިން ކޮންމެ އަހަރަކު ވެސް ކުރިއަށްގެންދާ ހަރަކާތެކެވެ. މިއީ މި އިވެންޓް ކުރިއަށްގެންދާ 6 ވަނަ އަހަރެވެ.