އެއަރ ފްރާންސްގެ ދަތުރުތައް މާދަމާ ރާއްޖެއަށް ފަށާނެކަމަށް މޯލްޑިވްސް އެއަރޕޯޓްސް ކޮންޕެނީ ލިމިޓެޑް، އެމްއޭސީއެލްއިން ބުނެފިއެވެ.
އެއަރ ޕްރާންސްގެ ދަތުރުތައް އަލުން ރާއްޖެއަށް މިފަށަނީ ކޯވިޑް19 ގެ ސަބަބުން ދަތުރުތައް މެދުކަނޑާލާފައި އޮތުމަށްފަހުއެވެ.
އެމްއޭސީއެލްއިން ބުނީ މިމަހުގެ 19 ގައި އެއަރ ފްރާންސްގެ ދަތުރުތައް ރާއްޖެއަށް ފަށާއިރު ހަފްތާއަކު 3 ދަތުރު ރާއްޖެއަށް ބާއްވާނެކަމަށް އެ އެއަރލައިނުން ބުނެއެވެ. އެއަރ ފްރާންސްއިން ރާއްޖެއަށް ދަތުރުކުރަނީ ފްރާންސްގެ ޕެރިސް ޗާލްސް ޑިގުލް އެއަރޕޯޓުން ވެލާނާ އިންޓަނޭޝަނަލް އެއަރޕޯޓަށެވެ.
އެއަރ ފްރާންސްއިން އެންމެ ފުރަތަމަ ރާއްޖެއަށް ދަތުރުތައް ފެށީ 2017 ވަނަ އަހަރުގެ ޑިސެމްބަރމަހުގެ ތެރޭގައެވެ. އަދި ޑިމާންޑް ބޮޑުވުމުގެ ސަބަބުން އެ އެއަރލައިނުން ވަނީ ރާއްޖެއަށް ކުރި ދަތުރުތައް އިތުރުވެސްކޮށްފައެވެ.
ޕީއެސްއެމް ނިއުސްއަށް ދެއްވި ޙާއްސަ އިންޓަވިއުއެއްގައި އެމްއޭސީއެލްގެ ޖެނެރަލް މެނޭޖަރ ކޯޕަރޭޓް ކޮމިއުނިކޭޝަންސް ހަސަން އަރީފް ވިދާޅުވީ، ރާއްޖެ އަންނަ އެއަރލައިންތަކުގެ އަދަދު މިހާރު ވަރަށް ބޮޑަށް އިތުރުވެފައިވާކަމަށެވެ. ބޯޑަރު ހުޅުވާލިއިރު ރާއްޖެއަށް ދަތުރުތައް ފަށާފައިވަނީ 4 އެއަރލައިނަކުންނެވެ. ނަމަވެސް މިހާރު 19 އެއަރލައިންއަކުން ރާއްޖެއަށް ދަތުރުކުރަމުން އަންނަކަމަށް އަރީފް ވިދާޅުވިއެވެ. ޖެނުއަރީ އަދި ފެބްރުއަރީމަހުގެ ތެރޭގައިވެސް ގިނަ އެއަރލައިންތަކަކުން ރާއްޖެއަށް ދަތުރުތައް ފެށުމަށް ހަމަޖެހިފައިވާކަމަށް އޭނާ ވިދާޅުވިއެވެ.
ފްރާންސްގެ މާކެޓަކީ ރާއްޖެއަށް ގިނަ އަދަދަކަށް ފަތުރުވެރިން އަންނަ މާކެޓެކެވެ. މިއަހަރުގެ މިހާތަނަށް ފްރާންސުން ރާއްޖެއަށް 24033 ފަތުރުވެރިން ޒިޔާރަތްކޮށް ފްރާންސް ހިމެނިފައިވަނީ ރާއްޖެއަށް 7 ވަނަ އަށް އެންމެ ގިނައިން ފަތުރުވެރިން ޒިޔާރަތްކުރި ޤައުމަށެވެ. އަދި ބޯޑަރު ހުޅުވާލިފަހުން މިހާތަނަށް ފްރާންސްއިން ރާއްޖެއަށް 3109 ވަނަ ފަތުރުވެރިން ޒިޔާރަތްކޮށްފައިވެއެވެ.