މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ، އެމްޓީސީސީ، ވުޖޫދަށް އައީ 18 ޑިސެމްބަރު 1980 ގައެވެ. އެމްޓީސީސީއަށް މިއަހަރު 40 އަހަރު ފުރިގެންދާއިރު މިއަހަރަކީ އެ ކުންފުންޏަށް ގިނަ ގޮންޖެހުންތަކާއި ކުރިމަތިލާންޖެހުނު އަހަރެކެވެ. މި ގޮންޖެހުންތަކުގެ ތެރޭގައިވެސް އެ ކުންފުނިން ވަނީ ގިނަ ކާމިޔާބީތަކެއް ޙާސިލްކޮށްފައެވެ.
ރައްޔިތުންގެ ކުންފުނި އެމްޓީސީސީއަކީ ރާއްޖޭގެ ތަރައްޤީގައި މުހިންމު ހިއްސާއެއް އަދާކުރާ ކުންފުންޏެކެވެ. ރާއްޖޭގެ އުތުރާއި ދެކުނުން ތަރައްޤީގެ ބިޔަ މަޝްރޫޢުތަކެއް އެމްޓީސީސީން ހިންގަމުންއަންނައިރު މި ކުންފުނީގެ އެންމެ ބޮޑު އަމާޒަކަށް ވެފައިވަނީ އަސާސީ ޙިދުމަތްތައް ވީހާވެސް އަވަސްކަމާއިއެކު ރައްޔިތުންނަށް ފޯރުކޮށްދިނުމެވެ. މަގުހެދުމާއި، ބިންހިއްކުމާއި، ބަނދަރުހެދުން، ދަތުރުފަތުރުގެ ޙިދުމަތާއި، އެއަރޕޯޓުހެދުމުގެ މަސައްކަތްތަކަކީ އެމްޓީސީސީން ކުރަމުން އަންނަ މަސައްކަތްތަކެވެ.
ކޯވިޑް19 ގެ ސަބަބުން އެމްޓީސީސީއަށް ވެސް މިއަހަރު ވަނީ ދަތިތަކަކާއި ކުރިމަތިލާންޖެހިފައެވެ. ކޯވިޑް19ގެ ސަބަބުން މުޅި ރާއްޖެ ލޮކްޑައުންކުރުމުގެ ސަބަބުން ދަތުރުފަތުރުކުރުމަށް ދަތިތަކާއި ކުރިމަތިވެ ބައެއް ޕްރޮޖެކްޓްތަކެއް މަޑުޖެހިފައިވެސްވެއެވެ. ނަމަވެސް ހާލަތު ރަނގަޅުވުމުގެ ސަބަބުން އެމްޓީސީސީގެ މަޝްރޫއުތައްވެސް މިހާރު ވަނީ ބާރު ސްޕީޑްގައި ކުރިއަށްގެންދަން ފަށާފައެވެ.
މިއަހަރުގެ ފުރަތަމަ ކުއާޓަރުގައި އެމްޓީސީސީއިން 53 މަޝްރޫއެއްގެ މަސައްކަތް ވަނީ ފަށާފައެވެ. އަދި މީގެތެރެއިން 4 މަޝްރޫއެއްގެ މަސައްކަތް ވަނީ ނިންމާލާފައެވެ. އަދި އަލަށް 11 މަޝްރޫއެއްގެ މަސައްކަތް ފަށައި 3 މަޝްރޫއެއް ވަނީ ނިންމާލާފައެވެ. 2 ވަނަ ކުއާޓަރުގައި އެމްޓީސީސީން 75 މަޝްރޫއެއްގެ މަސައްކަތް ކުރިއަށްގެންދިޔައިރު މީގެތެރެއިން 10 މަޝްރޫއެއް ނިންމައި އިތުރު 8 މަޝްރޫއެއްގެ މަސައްކަތް ވަނީ ފަށާފައެވެ. އަހަރުގެ 3 ވަނަ ކުއާޓަރުގައި 70 މަޝްރޫއެއްގެ މަސައްކަތް ކުރިއަށްގެންގޮސް 11 މަޝްރޫއެއްގެ މަސައްކަތް ވަނީ ނިންމާފައެވެ. އަދި މި ކުއާޓަރުގައި އިތުރު 12 ޕްރޮޖެކްޓެއްގެ މަސައްކަތް ފަށާފައިވާކަމަށް އެމްޓީސީސީއިން ބުނެއެވެ.
މިއަހަރުގެ ތެރޭގައި އެމްޓީސީސީގެ ޚިދުމަތްތައް ވަނީ ބައިނަލްއަޤްވާމީ ފެންވަރަށް ސެޓިފައިވެސްކޮށްފައެވެ. ކޯވިޑް19އާ ގުޅިގެން އެމްޓީސީސީގެ އެންމެ ބޮޑު އަމާޒަކަށްވީ، ގެއްލުންނުވެ ކުންފުނި ހިންގުންކަމަށާއި، މި އާމާޒަށް ވާސިލްވެފައިވާކަމަށް އެމްޓީސީސީގެ ސީއީއޯ އާދަމް އާޒިމް ވަނީ ފާހަގަކުރައްވާފައެވެ.
އެމްޓީސީސީގެ ތަފާސް ހިސާބުތައް ދާއްކާގޮތުން މިއަހަރުގެ މިހާތަނަށް އެކުންފުންޏަށް ޖުމްލަ އާމްދަނީގެ ގޮތުގައި، 952 މިލިއަން ރުފިޔާވަނީ ލިބިފައެވެ. އަދި ފައިދާގެ ގޮތުގައި 140 މިލިއަން ރުފިޔާ ވަނީ ލިބިފައެވެ. މިއީ އެމްޓީސީސީ ތާރީހުގައިވެސް އަހަރުގެ ފުރަތަމަ 9 މަސްދުވަހުގެ ތެރޭގައި ލިބުނު އެންމެ ބޮޑު ފައިދާކަމަށް އެކުންފުނިން ވަނީ ހާމަކޮށްފައެވެ.
އެމްޓީސީސީން ލަފާކުރަނީ މިއަހަރު ނިމޭއިރު، 1.35 ބިލިއަން ރުފިޔާގެ އާމްދަނީއެއް ލިބޭނެ ކަމަށެވެ. އަދި ސާފު ފައިދާގެ ގޮތުގައި 185 މިލިއަން ރުފިޔާ ލިބޭނެކަމަށްވެސް ވަނީ ލަފާ ކޮށްފައެވެ.
އެމްޓީސީސީގެ މަސައްކަތްތައްވެސް މިހާރު ވަނީ ހަލުވިވެފައެވެ. އެގޮތުން ޑޮމެސްޓިކް އެއާޕޯޓެއް ނިންމަން ކުރިން އަހަރުތަކެއް ނެގިނަމަވެސް މިހާރު އެމުއްދަތު ވަނީ މަދު މަސްތަކަކަށް ކުޑަކުރެވިފައެވެ. ދާދިފަހުން ހުޅުވި ހޯރަފުށީ އެއަރޕޯޓަކީ މިކަމުގެ ހެއްކެކެވެ. ހޯރަފުށީ ފަޅުން 16 ހެކްޓަރުގެ ބިން ހިއްކައިގެން ތަރައްޤީކުރި މި އެއަރޕޯޓް ތަރައްޤީކުރަން ނެގީ 18 މަސްދުވަހެވެ. އަދި ކުރިން ދޮޅު އަހަރުން ނިންމާ ބަނދަރަށް މިހާރު ނަގާނީ އަށެއްކަ މަސް ކަމަށް އެ ކުންފުނިން ބުނެއެވެ.
ދެހާހާއި ގާތްކުރާ އަދަދަކަށް މުވައްޒަފުން އެމްޓީސީސީގައި މަސައްކަތްކުރަމުން އަންނައިރު ދިވެހިންނަށް ޙާއްސަ އިސްކަމެއްވެސް އެމްޓީސީސީން އަންނަނީ ދެމުންނެވެ. އެގޮތުން ދާދިފަހުން އެމްޓީސީސީއިން ވަނީ އެ ކުންފުނީގެ ކޮންނަ ބޯޓު "މަހާޖައްރާފު" ގެ ފަޅުވެރިން 100 އިންސައްތަ ދިވެހިންނަށްވެސް ބަދަލުކޮށްފައެވެ.
ދަތި އުނދަގޫތަކަކާއި އެކުވެސް އެމްޓީސީސީން މިއަހަރު ދައްކުވައިދީފައި ވަނީ ކުންފުނީގެ މަސައްކަތްތައް ހަރުދަނާކޮށް މަސައްކަތް ކޮށްފިނަމަ ގެއްލުމުން އަރައިގަނެ ފައިދާ ހޯދިދާނެކަމެވެ.