ސްޓޭޓް ޓްރޭޑިންގ އޮގަނައިޒޭޝަން، އެސްޓީއޯއިން ޑިޖިޓަލް ބޭންކިންގ ދާއިރާއަށް ވަނުމަށް މާކެޓް ސަރވޭއެއްކުރަން ފަށައިފިއެވެ.
އެސްޓީއޯއިން ޑިޖިޓަލް ބޭންކިންގ ނިޒާމާއި ގުޅޭގޮތުން އާންމުންގެ ހިޔާލު ހޯދުމަށް މާކެޓް ސަރވޭ ކުރަނީ ސީޑީއީ ކޮންސަލްޓިންގްއާއި ގުޅިގެންނެވެ.
ޕީއެސްއެމް ނިއުސްއަށް މައުލޫމާތުދެއްވަމުން އެސްޓީއޯއިން ވިދާޅުވީ، ޑިޖިޓަލް ބޭންކިންގ ދާއިރާއަކީ އެސްޓީއޯއިން ވަނުމަށް ޙިޔާލުކޮށްފައިވާ ދާއިރާއެއްކަމަށެވެ.
މި ސަރވޭ ކުރިއަށްގެންދިއުމަށް ހަމަޖެހިފައިވަނީ މިމަހުގެ 10 ވަނަ ދުވަހުން 31 ވަނަ ދުވަހުގެ ނިޔަލަށް ފޯނުކޯލު މެދުވެރިކޮށް ނުވަތަ ވަކިވަކި ފަރުދުންނާއި ބައްދަލުކޮށްގެންނެވެ. ސަރވޭ ކުރާނީ އުމުރުން 20 އަހަރާއި 39 އަހަރާއި ދެމެދުގެ އުމުރުފުރާގެ މީހުންނަށްކަމަށް އެސްޓީއޯއިން ބުނެއެވެ.
އެސްޓީއޯއިން ބުނީ މި ސަރވޭގައި އެއްވެސް ފަރާތެއްގެ ބޭންކް އެކައުންޓް އަދި ކޭޝްކާޑު ނަންބަރުތަކުގެ ތަފްސީލާއި ބެހޭގޮތުން ސުވާލު ނުކުރާނެކަމުގައެވެ. ދޮގުހަދައިގެން ބައެއް މީހުން ގުޅައި މައުލޫމާތު ހޯދާތީ އެސްޓީއޯއިން ވަނީ މި ސަރވޭގައި އެ ކުންފުނިން ގުޅާނެ ނަންބަރުތައްވެސް އާންމުކޮށްފައެވެ.
މި ސަރވޭއާއިގުޅޭ އިތުރު މައުލޫމާތު ބޭނުންވާނަމަ އެ ކުންފުނީގެ ކޯލްސެންޓަރ 1422 އަށް ނުވަތަ ސީޑީއީ ކޮންސަލްޓިންގެ ނަންބަރު 3312514 އަށް ގުޅުމަށް އެސްޓީއޯއިން ވަނީ އެދިފައެވެ. އެސްޓީއޯއިން މިހާރުވެސް ވިޔަފާރީގެ ގިނަ ދާއިރާތަކެއްގައި ދަނީ ހަރަކާތްތެރިވަމުންނެވެ. އޭގެތެރޭގައި ކާބޯތަކެތި ވިއްކުމުގެ ވިޔަފާރިއާއި، ގޭތެރެއަށް ބޭނުންވާ ސާމާނާއި، ޕެޓްރޯލް އަދި ޑީސަލްވެސް އެސްޓީއޯއިން ދަނީ ވިއްކަމުންނެވެ.