ފަތުރުވެރިންނަށް ޚިދުމަތްދިނުމަށް މިވަގުތު ރާއްޖޭގައި 36 ހާހަށްވުރެ ގިނަ އެނދު އޮޕަރޭޝަނަށް ނެރެފައިވާކަމަށް ޓޫރިޒަމް މިނިސްޓްރީގެ ތަފާސް ހިސާބުތަކުން ދައްކައިފިއެވެ.
ޓޫރިޒަމް މިނިސްޓްރީން އެންމެ ފަހުން ޢާންމުކޮށްފައިވާ ތަފާސް ހިސާބުތައް ދައްކާގޮތުން ޖުލައިމަހުގެ 15 ވަނަ ދުވަހުން މިމަހުގެ 11 ވަނަ ދުވަހުގެ ނިޔަލަށް ފަތުރުވެރިންނަށް ޚިދުމަތްދިނުމަށް 36813 އެނދު ވަނީ އޮޕަރޭޝަނަށް ގެނެސްފައެވެ. މިއީ މުޅި ޖުމްލަ 413 ފެސިލިޓީއެކެވެ. އޭގެތެރޭގައި ރިސޯޓްތަކާއި، ސަފާރީތަކާއި، އަދި ގެސްޓްހައުސްތައްވެސް ހިމެނެއެވެ.
ކޯވިޑް-19ގެ ސަބަބުން ރާއްޖޭގައި ފަތުރުވެރިންނަށް ޙިދުމަތްދިނުމުގެ ތަންތަން ބަންދުކޮށްފައި އޮތުމަށްފަހު ރިސޯޓް އަދި ސަފާރީތައް އަލުން ހުޅުވުމުގެ ހުއްދަ ދީފައިވަނީ ޖުލައި މަހުގެ 15 ވަނަ ދުވަހުއެވެ. އަދި ގެސްޓްހައުސްތައް ހުޅުވާލުމުގެ ހުއްދަ ދީފައިވަނީ އޮކްޓޯބަރ މަހުގެ 15ވަނަ ދުވަހުއެވެ. އަދި މިމަހުގެ 14 ވަނަ ދުވަހު މާލެ ސަރަހައްދުގެ ގެސްޓްހައުސްތައް ހުޅުވުމުގެ ހުއްދަ ދިނުމަށް ޓޫރިޒަމް މިނިސްޓްރީން މިހާރު ވަނީ ނިންމާފައެވެ. މީގެކުރިން މާލެ ސަރަހައްދުގެ ގެސްޓްހައުސްތައް ހުޅުވުމުގެ ހުއްދަ ދީފައިވަނީ ޓްރާންސިޓް ފެސިލިޓީތަކުގެ ގޮތުގައެވެ. މާލެ ސަރަހައްދުން ގެސްޓްހައުސްތައް ހުޅުވުމުން 5000 އާއި ގާތްކުރާ އަދަދަކަށް ބެޑްސް ހުޅުވިގެންދާނެކަމަށް ޓޫރިޒަމް މިނިސްޓްރީން ވިދާޅުވެއެވެ.
ރާއްޖޭގެ ބޯޑަރު ހުޅުވާލިފަހުން މިހާތަނަށް 1 ލައްކަ ފަތުރުވެރިން ވަނީ ރާއްޖެ ޒިޔާރަތްކޮށްފައެވެ. ރާއްޖެ އަންނަ ފަތުރުވެރިން އިތުރުވަމުން އަންނައިރު ފަތުރުވެރިން ރާއްޖެ އަންނައިރު ކޯވިޑް-19އަށް ޓެސްޓްކޮށްފައިވާ 96 ގަޑިއިރު ހަމަނުވާ ޕީސީއާރު ޓެސްޓެއް އޮންނަން ޖެހެއެވެ.
ޓޫރިޒަމް މިނިސްރީން މިހާރު ވަނީ ފަތުރުވެރިންނަށް ސްޕްލިޓް ސްޓޭގެ ހުއްދަވެސް ދީފައެވެ. މީގެ ސަބަބުން ފަތުރުވެރިންނަށް ޚިދުމަތްދޭ އެއް ފެސިލިޓީން އަނެއް ފެސިލިޓީއަށް ދެވޭނެއެވެ. އެގޮތުން ރިސޯޓްތަކަށް ޗުއްޓީ ހޭދަކުރަން އަންނަ ފަތުރުވެރިންނަށްވެސް ގެސްޓްހައުސްތަކަށް އަދި ސަފާރީތަކަށް ދިއުމަށް ހުރަހެއްނެތެވެ.