ބޭންކް އޮފް މޯލްޑިވްސްއިން މާލޭ ސްކޮޔަރގައި ދެމުންދިޔަ ލޯނުގެ ޙިދުމަތްތައް މާފަންނު ސްޓަރ ކްލައުޑް އިމާރާތަށް ބަދަލުކުރުމަށް ބީއެމްއެލްއިން ނިންމައިފިއެވެ.
ބޭންކް އޮފް މޯލްޑިވްސްއިން ބުނީ ލޯނުގެ ޙިދުމަތްތައް މ. ސްޓަރ ކްލައުޑް ނުވަތަ ކުރީގެ ސްޓަރ ސިނަމާހުރި އިމާރާތަށް ބަދަލުކުރާނީ އަންނަ އާދިއްތަ ދުވަހުން ފެށިގެންކަމަށެވެ. ޕީއެސްއެމް ނިއުސްއަށް މައުލޫމާތުދެއްވަމުން ބީއެމްއެލްއިން ބުނީ، މި ބަދަލު ގެންނަން ނިންމީ ލޯނާއިގުޅޭ މައުލޫމާތުތައް އެއްތަނަކުން ލިބޭނެ އިންތިޒާމް ހަމަޖެއްސައި ކަސްޓަމަރުންނަށް ފަސޭހަކޮށްދިނުމުގެ ގޮތުންކަމަށެވެ.
މ. ސްޓަރ ކްލައުޑްގައި ހުރި ބީއެމްއެލްގެ ބްރާންޗުން ފޯރުކޮށްދޭނީ އާންމު ފަރުދުންގެ ލޯނުތަކާއި ގުޅޭ ޙިދުމަތްތަކާއި، މި ޙިދުމަތްތަކަށް ހުށައެޅުމުގެ މައުލޫމާތުތައްކަމަށް ބީއެމްއެލްއިން ބުނެއެވެ. މި ޙިދުމަތް މިހާރު ފޯރުކޮށްދެނީ މާލޭ ސްކޮޔަރގެ ބީއެމްއެލް ބްރާންޗުންނެވެ. ދާދިފަހުން ބީއެމްއެލްގެ ޙިދުމަތް ފޯރުކޮށްދެމުން އަންނަ މ. ސްޓަރ ކްލައުޑް އިމާރާތުގައި ވަނީ ބީއެމްއެލްއިން އޭޓީއެމްގެ ހިދުމަތްވެސް ދޭން ފަށާފައެވެ.
މުޅި ރާއްޖެއަށް ބީއެމްއެލްގެ ޙިދުމަތް މިހާރު ވަނީ ފުޅާކޮށްފައެވެ. އެ ބޭންކުން މިހާރު 20 އަތޮޅުގައި 38 ބްރާންޗް، 64 ސެލްފް ސާވިސް ބޭންކިން ސެންޓަރު، 127 އޭޓީއެމް ބަހައްޓައި ބީއެމްއެލްއިން އަންނަނީ ރައްޔިތުންނަށް ޙިދުމަތް ފޯރުކޮށްދެމުންނެވެ.