އުރީދޫ މޯލްޑިވްސް އިން ލިބެންހުންނަ މޯބައިލް ފޯނާއި އެކްސެސަރީސް އިސްލާމިކް ބޭންކް މެދުވެރިކޮށް އިންސްޓޯލްމެންޓަށް ގަތުމުގެ ފުރުސަތު ކަސްޓަމަރުންނަށް ހުޅުވާލައިފިއެވެ.
އުރީދޫ މޯލްޑިވްސް އިން ލިބެންހުންނަ ތަކެތި އިންސްޓޯލްމެންޓަށް ގަނެވޭނީ އިސްލާމިކް ބޭންކް (އެމްއައިބީ) ގެ އުޖާލާ ދިރިއުޅުން ފައިނޭންސިނގް ފެސިލިޓީ މެދުވެރިކޮށެވެ. އެގޮތުން އެމްއައިބީ އުޖާލާ ދިރިއުޅުން ފެސިލިޓީ ގެންގުޅޭ ކޮންމެ މީހަކަށްވެސް އުރީދޫ މޯލްޑިވްސްއިން ލިބެންހުރި ކޮންމެ ޑިވައިސްއެއްވެސް އިންސްޓޯލްމެންޓަށް ގަނެވޭނެކަމަށް އުރީދޫއިން ބުނެއެވެ.
އުރީދޫ މޯލްޑިވްސްގެ އެކްޓިންގ ޗީފް ކޮމާރޝަލް އޮފިސަރ، ހުސެއިން ނިޔާޒް ވިދާޅުވީ، އުރީދޫއިން ވިއްކާ ފޯނާއި، ޑިވައިސްތައް، މާރކެޓްގައި ލިބެންހުރި އެންމެ ހެޔޮ އަގުގައި އިންސްޓޯލްމެންޓް ޕްލޭނެއްގެ ދަށުން ގަތުމުގެ ފުރުސަތު އޮންނާނެކަމަށެވެ.
"އީޖާދީ ޓެކްނޮލޮޖީ އާއި ޑިޖިޓަލް ޚިދުމަތްތަކާއިއެކު އެންމެފަހުގެ ޑިޖިޓަލް ޑިވައިސްތަކުގެ ބޭނުން ދުވަހެއް ދުވަހަކަށް ދަނީ އިތުރުވަމުން. އެހެންކަމުން، މި ޕަރޓްނަރޝިޕްގެ ދަށުން އަޅުގަނޑުމެން މާރކެޓްކުރާ ފޯނުތަކާއި ޑިވައިސްތައް، މާރކެޓްގައި ލިބެންހުރި އެންމެ ހެޔޮ އަގުގައި އިންސްޓޯލްމެންޓް ޕްލޭންއެއްގެ ދަށުން ބައްލަވައިގަތުމުގެ ފުރުސަތު ހުޅުވާލެވޭކަމަކީ އަޅުގަނޑުމެންނަށް ލިބޭ ވަރަށް ބޮޑު އުފަލެއް." ހުސެއިން ނިޔާޒް ވިދާޅުވިއެވެ.
އިންސްޓޯލްމެންޓް ޕްލޭން ކަނޑައެޅިގެންދާނީ ކޮންމެ ކަސްޓަމަރަކަށްވެސް ލިބޭ އާމްދަނީއަށް އެކަށޭނަ ގޮތަށް އެމްއައިބީ އިން އެޕްރޫވް ކުރެވިގެންކަމަށް އެކުންފުނިން ވިދާޅުވެއެވެ. މާލެ އާއި ހުޅުމާލެ އުރީދޫ ފިހާރައިންވެސް އުޖާލާ ދިރިއުޅުން ފެސިލިޓީ މެދުވެރިކޮށް ތަކެތި ގަނެވޭނެކަމަށް އުރީދޫއިން ބުނެއެވެ.