ކޯވިޑް-19 އިން އަރައިގަތުމަށް ސަރުކާރުން މިހާތަނަށް 2.6 ބިލިއަނަށްވުރެ ގިނަ ރުފިޔާ ޚަރަދުކޮށްފައިވާކަމަށް ފިނޭންސް މިނިސްޓްރީން އާންމުކޮށްފައިވާ ތަފާސްހިސާބުތަކުން ދައްކައިފިއެވެ.
ފިނޭންސް މިނިސްޓްރީން އާންމުކޮށްފައިވާ "ކޯވިޑް-19 ސްޕެންޑިން ރިޕޯޓް" ގައި ވާގޮތުން މިމަހުގެ 19 ގެ ނިޔަލަށް ކޯވިޑް-19 ގެ ސިއްހީ އަދި އިޖްތިމާއީ ކަންކަމަށް ސަރުކާރުން ވަނީ 1.3 ބިލިއަން ރުފިޔާ ޚަރަދުކޮށްފައެވެ. މިއީ އޭގެ ކުރީ ހަފްތާއާއި އަޅާބަލާއިރު މި ދާއިރާއަށް ޚަރަދުކުރި މިންވަރުން 0.3 އިންސައްތަ އިތުރު އަދަދެކެވެ.
ސިއްހީ އަދި އިޖްތިމާއީ ދާއިރާއިން މިހާތަނަށް އެންމެ ބޮޑު ހޭދައެއްކޮށްފައިވަނީ ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީގެ މަސައްކަތްތަކަށެވެ. އެއީ ޖުމްލަ 871.8 މިލިއަން ރުފިޔާއެވެ. 2 ވަނައަށް މިދާއިރާއިން އެންމެ ބޮޑު ހޭދައެއް ކޮށްފައިވަނީ ހެލްތު މިނިސްޓްރީއަށެވެ. ހެލްތު މިނިސްޓްރީއަށް 210.3 މިލިއަން ރުފިޔާ ޚަރަދުކޮށްފައިވާކަމަށް ފިނޭންސް މިނިސްޓްރީގެ ތަފާސް ހިސާބުތަކުން ދައްކައެވެ.
ކޯވިޑް-19 އިން އަރައިގަތުމަށް ސަރުކާރުން ވަނީ އިކޮނޮމިކް ރެސްޕޯންސް ސްޕެންޑިންގެ ގޮތުގައި 1.36 ބިލިއަން ރުފިޔާ ހޭދަކޮށްފައެވެ. އިކޮނޮމިކް ރެސްޕޯންސް ސްޕެންޑިންގެ ތެރެއިން ސަރުކާރުން އަންނަނީ ރިކަވަރީ ލޯނު ސްކީމާއި، އިންކަމް ސަޕޯޓް އެލަވަންސްއާއި، ފެނާއި ކަރަންޓު ބިލުން ޑިސްކައުންޓްވެސް ދެމުންނެވެ.
ރިކަވަރީ ލޯނު ސްކީމްގެ ދަށުން މިހާތަނަށް ވިޔަފާރިތަކަށް 1.15 ބިލިއަން ރުފިޔާއަށްވުރެ ބޮޑު އަދަދެއް ސަރުކާރުން ވަނީ ދޫކޮށްފައެވެ. އިންކަމް ސަޕޯޓް އެލަވަންސްގެ ގޮތުގައި 143.8 މިލިއަން ރުފިޔާ، ކަރަންޓާ ފެން ބިލުން ޑިސްކައުންޓްގެ ގޮތުގައި 62.8 މިލިއަން ރުފިޔާގެ ލުޔެއް ދީފައިވާކަމަށްވެސް ފިނޭންސް މިނިސްޓްރީގެ ތަފާސްހިސާބުތަކުން ދައްކައެވެ.