އަންނަ އަހަރުގެ ބަޖެޓް ދައުލަތުން ތަންފީޒުކުރާ މިންވަރު ބަލާނަން: ބަޖެޓް ކޮމިޓީ މުގައްރިރު

އަންނަ އަހަރުގެ ބަޖެޓް، އެބަޖެޓް ދައުލަތުގެ ވުޒާރާތަކާއި މިނިވަން މުއައްސަސާތަކުން ތަންފީޒުކުރާ މިންވަރު ކޮމިޓީން ބަލަމުންދާނެކަމަށް ބަޖެޓް ކޮމިޓީގެ މުގައްރިރު މުޙައްމަދު ނާޝިޒް ވިދާޅުވެއްޖެއެވެ.

އަންނަ އަހަރަށް ލަފާކޮށް ދައުލަތުން ރައްޔިތުންގެ މަޖިލީހަށް ހުށައެޅި ބަޖެޓް ކޮމިޓީން ދިރާސާކޮށް ނިންމައި މަޖިލީހުގެ ތަޅުމަށް ވަނީ ފޮނުވާފައެވެ. ބަޖެޓް ދިރާސާކުރުމުގެ މަރުހަލާގައި ދައުލަތުން ފޮނުވި ބަޖެޓަށް ވަނީ ބަދަލުތަކެއް ގެނެސްފައެވެ. އެގޮތުން ދައުލަތުން މަޖިލީހަށް ފޮނުވި 34.7 ބިލިއަން ރުފިޔާގެ ބަޖެޓަށް ކޮމިޓީން ގެނައި ބަދަލުތަކާއެކު ބަޖެޓުގެ ޖުމްލަ ޢަދަދު ވަނީ 34.9 ބިލިއަން ރުފިޔާއަށް އިތުރުވެފައެވެ.

ޕީއެސްއެމް ނިއުސްގެ ބަޖެޓް 2021 ގައި ވާހަކަފުޅު ދައްކަވަމުން ބަޖެޓް ކޮމިޓީގެ މުގައްރިރު އަދި ކިނބިދޫ ދާއިރާގެ މެންބަރު މުޙައްމަދު ނާޝިޒް ވިދާޅުވީ، އަންނަ އަހަރަށް ލަފާކޮށް ދައުލަތުން ހުށައަޅަފައިވާ ބަޖެޓަކީ ތަންފީޒުކުރަން އުނދަގޫވާނެ ބަޖެޓެއްކަމަށާއި، ނަމަވެސް ދައުލަތުން އަންދާޒާކޮށްފައި ހުރި ޢަދަދަށް އާމްދަނީ ލިބިއްޖެނަމަ ތަންފީޒުކުރުމުގައި ސަރުކާރަށް ދަތިތަކެއް ނުވާނެކަމަށެވެ. ނާޝިޒް ވިދާޅުވީ، އަންނަ އަހަރުގެ ބަޖެޓް މުއައްސަސާތަކުން ތަންފީޒުކުރާ މިންވަރު ކޮމިޓީން ބަލަމުންދާނެ ކަމަށާއި، އެއީ ޤައުމުގެ ރޭޓިންއަށް މާކްސް ދިނުމުގައިވެސް މުހިންމު ކަމަކަށްވާނެކަމަށެވެ.

"އަންނަ އަހަރު އިރާދަކުރެއްވިއްޔާ އަޅުގަނޑުމެން ދައުލަތުގެ ވުޒާރާތަކާއި، މިނިވަން މުއައްސަސާތަކުންވެސް މިފާސްކުރާ ބަޖެޓާ އެއްގޮތަށް ހޭދަކުރުމަށް ބަޖެޓް ތަންފީޒް ކުރެވޭވަރު ދެނެގަތުމަށް އަޅުގަނޑުމެން ސާމްޕަލް ނަގައިގެން ތަންތަން ސެލެކްޓްކޮށްގެންއަޅުގަނޑުމެން މަސައްކަތްކުރާނަން. ހަގީގަތުގައި އަޅުގަނޑުމެންގެ ރޭޓިންއާ ކަންކަމަށްވެސް މިއީ މުހިންމުކަމެއް. އެމަސައްކަތް ބަރާބަރަށް ކުރެވިއްޖާ ޤައުމެއްގެ ރޭޓިން ހަދާއިރު މާކްސް ދޭނެކަމެއް" ކިނބިދޫ ދާއިރާގެ މެންބަރު މުޙައްމަދު ނާޝިޒް ވިދާޅުވިއެވެ.

ނާޝިޒް ވިދާޅުވީ، ދައުލަތުން ބަޖެޓް ހުށައެޅިއިރު، ދައުލަތުން އާމްދަނީގެ ޢަދަދުތައް ލަފާކޮށްފައި ވަނީ އަންނަ އަހަރު 7 ލައްކަ ފަތުރުވެރިން ރާއްޖެ އަންނާނެކަމަށް ލަފާކޮށް ކަމަށެވެ. ނަމަވެސް މިހާރު ރާއްޖެ އަންނަ ފަތުރުވެރިންގެ ޢަދަދު އިތުރުވެފައިވާތީ އަންނަ އަހަރު މަދުވެގެން 1 މިލިއަން ފަތުރުވެރިން އަންނާނެކަމަށް ކޮމިޓީގެ މެންބަރުންނަށް ގަބޫލުކުރެވުނުކަމަށް ނާޝިޒް ވިދާޅުވިއެވެ.

ދައުލަތުން ރައްޔިތުންގެ މަޖިލީހަށް ހުށައެޅި ބަޖެޓްގައި ދައުލަތަށް ލިބޭނެކަމަށް އަންދާޒާކޮށްފައި ވަނީ 17 ބިލިއަން ރުފިޔާއެވެ. ނަމަވެސް ކޮމިޓީން ބަޖެޓް ދިރާސާކޮށް ނިންމާލިއިރު އިތުރަށް 3.355 ބިލިއަން ރުފިޔާ ލިބޭނެކަމަށް ލަފާކޮށް ދައުލަތަށް ލިބޭނެކަމަށް އަންދާޒާކުރި އާމްދަނީ 21 ބިލިއަން ރުފިޔާއަށް މިހާރު އިތުރުވެފައި ވާކަމަށެވެ.

އާމްދަނީއަށް އިތުރުކުރެވިފައިވާ ޢަދަދުތައް:

ޓީޖީއެސްޓީ: 591 މިލިއަން ރުފިޔާ
ގްރީން ޓެކްސް: 253 މިލިއަން ރުފިޔާ
އެއަރޕޯޓް ސާރވިސް ޗާޖް: 218 މިލިއަން
އެއަރޕޯޓް ޑިވެލޮޕްމަންޓް ފީ: 219 މިލިއަން ރުފިޔާ
ބިން ވިއްކުމާއި ބިން ބަދަލުކުރުން 700 މިލިއަން ރުފިޔާ
އެހެން ކުއްޔާ ހަރުމުދާގެ ގޮތުގައި: 1.3 ބިލިއަން ރުފިޔާ

ނާޝިޒް ވިދާޅުވީ މިނިވަން މުއައްސަސާއަކުން އެތަންތަނުން ބޭނުންވިވަރަށް ބަޖެޓް ނުލިބޭކަމާއި ފިނޭންސް މިނިސްޓްރީން އެމުއައްސަސާތަކަށް ދިން ސީލިން އާއި އެއްވަރަށްވެސް ބަޖެޓް ލިބިފައިނުވާކަން ކޮމިޓީގައި ފާހަގަކޮށްފައި ވާކަމަށެވެ. އަދި އެކަމުގެ ސަބަބުން އެ މުއައްސަސާތަކުގެ ޤާނޫނީ ވާޖިބު އަދާކުރުމަށް ދަތިތައް ކުރިމަތިވާނެކަން ފާހަގަކޮށްފައި ވާކަމަށެވެ. އެހެންކަމުން މިހާރު ބަޖެޓް ކޮމިޓީން ދިރާސާކޮށް ނިންމާލިއިރު މިނިވަން މުއައްސަސާތަކުގެ ބަޖެޓަށްވެސް ފައިސާ އިތުރުކޮށްދީފައި ވާކަމުގައި ނާޝިޒް ވިދާޅުވިއެވެ.

އެގޮތުން އެވްރެޖްކޮށް ކޮންމެ މުއައްސަސާއަކަށް ދޮޅު މިލިއަން ރުފިޔާއާއި 2 މިލިއަން ރުފިޔާއާއި ދެމެދުގެ ޢަދަދަކަށް ފައިސާ އިތުރުކޮށްދީފައިވާކަމަށް ނާޝިޒް ވިދާޅުވިއެވެ.

ބަޖެޓް ކޮމިޓީގެ މުގައްރިރު އަދި މާލިއްޔަތު ކޮމިޓީގެ މުޤައްރިރުކަންވެސް ކުރައްވާ ނާޝިޒް ވަނީ ދައުލަތުގެ ޚަރަދު ކުޑަކުރުމަށާއި، ބަޖެޓް ތަންފިޒްކުރުމަށް 12 ރެކޮމަޑޭޝަން ރިޕޯޓްގައި ހިމަނާފައިވާކަން ފާހަގަކުރައްވާފައެވެ.