މިއަހަރުގެ މިހާތަނަށް ރާއްޖެއަށް 441،952 ފަތުރުވެރިން ޒިޔާރަތްކޮށްފައިވާކަމަށް ޓޫރިޒަމް މިނިސްޓްރީގެ ތަފާސް ހިސާބުތަކުން ދައްކައިފިއެވެ.
މިނިސްޓްރީ އޮފް ޓޫރިޒަމް އިން އާންމުކޮށްފައިވާ ތަފާސް ހިސާބުތައް ދައްކާގޮތުން ރާއްޖޭގެ ބޯޑަރު އަލުން ހުޅުވާލި ޖުލައި މަހުގެ 15 ވަނަ ދުވަހުން ފެށިގެން މިމަހުގެ 18 ވަނަ ދުވަހުގެ ނިޔަލަށް 59،120 ފަތުރުވެރިން ވަނީ ރާއްޖެ ޒިޔާރަތްކޮށްފައެވެ. މިއީ ޖުލައިމަހު ރާއްޖެއައި 1701 ފަތުރުވެރިންނާއި، އޮގަސްޓް މަހު ރާއްޖެ އައި 7628 ފަތުރުވެރިންނާއި، ސެޕްޓެމްބަރު މަހު ރާއްޖެއައި 9538 ފަތުރުވެރިންނެވެ. މީގެއިތުރުން އޮކްޓޯބަރ މަހު އައި 21،515 ފަތުރުވެރިންނާއި މިމަހުގެ މިހާތަނަށް ރާއްޖެއައި 18،732 ފަތުރުވެރިންނެވެ.
ރާއްޖޭގެ ބޯޑަރު ހުޅުވާލިފަހުން މިހާތަނަށް އެންމެ ގިނަ ފަތުރުވެރިން ރާއްޖެ އައިސްފައިވަނީ ރަޝިއާއިންނެވެ. އެޤައުމުން 12،961 ފަތުރުވެރިން ރާއްޖެ އައިސްފައިވާއިރު 2 ވަނައަށް އެންމެ ގިނަ ފަތުރުވެރިން ރާއްޖެ އައީ އިންޑިއާއިންނެވެ. އެއީ 5449 ފަތުރުވެރިންނެވެ. 4745 ފަތުރުވެރިންނާއި އެކު ބޯޑަރު ހުޅުވާލިފަހުން 3 ވަނައަށް އެންމެ ގިނަ ފަތުރުވެރިން ރާއްޖެ އައިސްފައިވަނީ އިނގިރޭސިވިލާތުންނެވެ.
ރާއްޖޭގެ ބޯޑަރު ހުޅުވާލިފަހުން މިހާތަނަށް 16 އެއަރލައިންއަކުން ދަނީ ރާއްޖެ އާއި ދުނިޔޭގެ އެހެން ޤައުމުތަކާއި ދެމެދު ދަތުރުތައް ބާއްވަމުންނެވެ. މީގެތެރޭގައި ހިމެނެނީ ބައިނަލްއަޤްވާމީ 14 އެއަރލައިނާއި ރާއްޖޭގެ މޯލްޑިވިއަން އަދި ފްލައިމީއެވެ.