ބޭންކް އޮފް މޯލްޑިވްސް، ބީއެމްއެލްއިން އދ. ދިގުރަށުގައި ސެލްފް ސާވިސް ބޭންކިން ސެންޓަރެއް ހުޅުވައިފިއެވެ.
ދިގުރަށުގައި ހުޅުވި ބީއެމްއެލްގެ ސެންޓަރަކީ ބީއެމްއެލް އިން އަތޮޅުތެރޭގައި ކުރަމުންދާ އިންވެސްޓްމަންޓް އިތުރަށް ފުޅާކުރުމުގެ ގޮތުންނާއި މުޖުތަމައަށް ފޯރުކޮށްދޭ އެހީތެރިކަމުގެ ދަށުން ގާއިމްކުރި އޭޓީއެމް ސެންޓަރެކެވެ. މި އޭޓީއެމް ސެންޓަރު މެދުވެރިކޮށް އަމިއްލަ ފަރުދުންނާއި ވިޔަފާރިތަކަށް 24 ގަޑިއިރު ފައިސާ ނެގުމާއި، ފައިސާ ޖަމާކުރުމާއި، ފައިސާ ދެއްކުމާއި ޓްރާންސްފާ ކުރުމުގެ ހިދުމަތް ލިބޭނެ ކަމަށް ބީއެމްއެލްއިން ބުނެއެވެ.
ބީއެމްއެލްއިން އދ. ދިގުރަށުގައި ޤާއިމްކުރި އޭޓީއެމް ސެންޓަރާއިއެކު އދ. އަތޮޅުގެ 3 ރަށަކުން މިހާރު ބީއެމްއެލް އޭޓީއެމްގެ ޚިދުމަތް ލިބޭނެއެވެ. އެއީ އދ. މާމިގިލި، މަހިބަދޫ އަދި ދިގުރަށެވެ.
ބީއެމްއެލްގެ އޭޓީއެމްއެއް ދިގުރަށުގައި ބެހެއްޓުމާއި ގުޅިގެން އެ ރަށް ހިމެނޭ ދަނގެތީ ދާއިރާގެ މެންބަރު މުހައްމަދު ނާޒިމް ވަނީ ދިގުރަށުގައި އޭޓީއެމްގެ ޙިދުމަތް ފެށުމަށްޓަކައި އެހީތެރިވެދެއްވި ހުރިހައި ފަރާތްތަކަށް ޝުކުރު އަދާކުރައްވާފައެވެ.
ބީއެމްއެލް އިން ވަނީ ދާދިފަހުން ނ. ކެނދިކުޅުދޫ، ތ. ތިމަރަފުށި އަދި އއ. ތޮއްޑޫ އާއި އުކުޅަހުގައިވެސް އޭޓީއެމްގެ ޙިދުމަތްދޭން ފަށާފައެވެ.
މުޅި ރާއްޖެ ހިމެނޭ ބޭންކިން ވިއުގަޔަކާއެކު 20 އަތޮޅުގައި 38 ބްރާންޗް، 64 ސެލްފް ސާވިސް ބޭންކިން ސެންޓަރު، 127 އޭޓީއެމް ބަހައްޓައި ބީއެމްއެލްއިން އަންނަނީ ރައްޔިތުންނަށް ޙިދުމަތް ފޯރުކޮށްދެމުންނެވެ.