ރަޝިއާގެ ރޮސިޔާ އެއަރލައިނުން މިމަހުގެ ތެރޭގައި ރާއްޖެއަށް ޝެޑިއުލް ދަތުރުތައް ފެށުމަށް ހަމަޖައްސައިފިއެވެ.
މޯލްޑިވްސް އެއަރޕޯޓްސް ކޮންޕެނީ ލިމިޓެޑް، އެމްއޭސީއެލްއިން ވިދާޅުވީ، ރަޝިއާގެ ރޮސިޔާ އެއަރލައިނުން ރާއްޖެއަށް ދަތުރުތައް ފަށާނީ މިމަހުގެ 14 ވާ ހޮނިހިރު ދުވަހުކަމަށެވެ. މި ދަތުރުތައް ކުރާނީ ރަޝިއާގެ މޮސްކޯއިން ވެލާނާ އިންޓަނޭޝަނަލް އެއަރޕޯޓަށެވެ.
މި ދަތުރުތަކުގައި އެ އެއަރލައިނުން ބޭނުންކުރާނީ ބީ747-400 މަރުކާގެ ބޯޓުތަކެކެވެ. މި އެއަރލައިނުން ހަފްތާއަކު 1 ދަތުރު ޝެރެމެޓޭވޯ އެއާޕޯޓުން ވެލާނާ އިންޓާނޭޝަނަލް އެއާޕޯޓަށް ކުރާނެއެވެ. އެމްއޭސީއެލްއިން ބުނީ އަންނަ އަހަރުގެ މާރޗް މަހުގެ ނިޔަލަށް މި އެއަރލައިންގެ ދަތުރުތައް ރާއްޖެއަށް ބާއްވާނެކަމަށެވެ.
ރޮސިޔާ އެއަރލައިންއަކީ އޭރޯފްލޮޓް ގްރޫޕްގެ ދަށުން ހިންގާ އެއަރލައިނެކެވެ. ރަޝިއާގެ އޭރޯފްލޮޓުން ވަނީ ކޯވިޑް19 އަށްފަހު ރާއްޖެއަށް އަލުން ދަތުރުތައް ފަށާފައެވެ.
ރާއްޖެއަށް މިވަގުތު ބައިނަލްއަޤްވާމީ 14 އެއަރލައިނަކުން އަންނަނީ ދަތުރުތައް ކުރަމުންނެވެ. އަދި މިއަހަރުގެ ނިޔަލަށް އިތުރު 10 އެއަރލައިނަކުން ދަތުރުތައް ފަށާނެކަމަށް އެމްއޭސީއެލްއިން ބުނެއެވެ.