ރަޝިޔާ ފަތުރުވެރިންގެ ތަރުހީބު ބޮޑުވެ، އޭރޯފްލޮޓުން ރާއްޖެއަށް ކުރާ ދަތުރުތައް އަނެއްކާވެސް އިތުރުކުރަނީ

އޭރޯފްލޮޓުން ރާއްޖެއަށް ކުރާ ދަތުރުތައް އަނެއްކާވެސް އިތުރުކުރުމަށް އެ އެއަރލައިނުން ނިންމައިފިއެވެ.

އޭރޯފްލޮޓުން ރަޝިޔާއާއި ރާއްޖެއާއި ދެމެދު ދަތުރުތައް ފަށާފައިވަނީ މިދިޔަ ސެޕްޓެމްބަރ މަހުގެ 11 ވަނަ ދުވަހުއެވެ. މި ދަތުރުތައް ކުރަނީ ރަޝިޔާގެ ޝެރެމެޓޭވޯ އެއާޕޯޓުން ވެލާނާ އިންޓާނޭޝަނަލް އެއާޕޯޓަށެވެ.

ކޯވިޑް19 އަށްފަހު އޭރޯފްލޮޓްއިން ރާއްޖެއަށް ދަތުރު ފެށިއިރު އެ އެއަރލައިނުން ބާއްވަމުންއައީ ހަފްތާއަކު 2 ފްލައިޓެވެ. ނަމަވެސް މިދިޔަ މަހުގެ 26 ވަނަ ދުވަހު އެ އެއަރލައިނުން ރާއްޖެއަށް ކުރަމުން އައި ދަތުރުތައް ވަނީ ހަފްތާއަކު 4 ދަތުރަށް އިތުރުކޮށްފައެވެ.

މޯލްޑިވްސް އެއަރޕޯޓްސް ކޮންޕެނީ ލިމިޓެޑް، އެމްއޭސީއެލްއިން ވިދާޅުވީ މިމަހުގެ 21 ވަނަ ދުވަހު އަނެއްކާވެސް އޭރޯފްލޮޓުން އިތުރު 4 ފްލައިޓް ބޭއްވުމަށް ނިންމާފައިވާކަމަށެވެ. މިއާއިއެކު ހަފްތާއަކު 8 ފްލައިޓް އޭރޯފްލޮޓުން ރާއްޖެއަށް ކުރާނެއެވެ. އެ އެއަރލައިނުން ރާއްޖެއަށް ކުރާ ދަތުރުތައް އިތުރުކުރުމާއިއެކު ކޮންމެ ހަފްތާއެއްގެ ހުކުރުދުވަހާއި އާދިއްތަދުވަހުގެ އިތުރުން ހޯމަ، އަދި ހޮނިހިރުގައިވެސް ދަތުރުތައް ކުރާނެއެވެ.

ރާއްޖޭގެ ބޯޑަރު ޖުލައި މަހުގެ 15 ވަނަ ދުވަހު ހުޅުވާލުމާއިއެކު މިހާތަނަށް ރާއްޖެއަށް އެންމެ ގިނަ އަދަދެއްގެ ފަތުރުވެރިން އައިސްފައިވަނީވެސް ރަޝިޔާއިންނެވެ. މިމަހުގެ 4 ވަނަ ދުވަހުގެ ނިޔަލަށް ރަޝިއާއިން ރާއްޖެއަށް ޖުމްލަ 9519 ފަތުރުވެރިން ވަނީ އައިސްފައެވެ.

އޭރޯފްލޮޓުން ރާއްޖެއަށް ކުރާ ދަތުރުތައް އިތުރުކުރަން ނިންމާފައިމިވަނީ އެ ޤައުމުން ރައްޖެ އަންނަ ފަތުރުވެރިންގެ ޑިމާންޑް އިތުރުވަމުން އަންނާތީއެވެ. ރަޝިއާގެ ފްލެގް ކެރިއާ އޭރޯފްލޮޓްއަކީ ބޯޑަރު އަލުން ހުޅުވާލުމާއިއެކު ރާއްޖެއަށް ޝެޑިއުލް ދަތުރުތައް ފެށި 8 ވަނަ އެއަރލައިންނެވެ.