މާލެސިޓީގެ މޭޔަރުގެ މައްޗަށް ދަޢުވާކުރުމަށް އޭސީސީން ތަޙްގީޤުކޮށް ޕްރޮސެކިއުޓަރ ޖެނެރަލްގެ އޮފީހަށް ފޮނުވި މައްސަލަ، އިތުރަށް ފުރިހަމަކުރަންޖެހޭކަންކަން ފުރިހަމަކުރުމަށް އަނބުރާ އޭސީސީއަށް ފޮނުވާލައިފިއެވެ.
ޕީޖީ އޮފީހުން ވިދާޅުވީ، މޭޔަރު ސިފާގެ މައްސަލާގައި ބައެއް ކަންކަން އިޞްލާހުކުރުމަށް ހުރުމުން އެކަންކަން އިޞްލާހުކުރުމަށް އޭސީސީއަށް މައްސަލަ ފޮނުވާފައިވާކަކަމަށެވެ. މާލޭ ލޮނުޒިޔާރާތްކޮޅުގައި ހަދާފައިވާ ޕާކުގެ މަސައްކަތްތައް އަމީން ކޮންސްޓްރަކްޝަނާއި ޙަވާލުކޮށްގެން ކުރުމުގައި ކޮރަޕްޝަންގެ ޢަމަލެއް ހިމެނޭކަމަށް އޭސީސީން ކުރި ތަހުޤީޤަށް ސާބިތުވާތީ، މާލޭ ސިޓީގެ މޭޔަރު ސިފާ މުހައްމަދުގެ މައްޗަށް ދައުވާކުރުމަށްޓަކައި، އޭސީސީން ޕީޖިއަށް މައްސަލަ ފޮނުވާފައިވަނީ ސެޕްޓެމްބަރު މަހުގެ 29 ގައެވެ.
މި މައްސަލައިގައި މާލޭ ސިޓީގެ މޭޔަރ، ސިފާ މުޙައްމަދު ދައުވާކުރުމަށް އޭސީސީން ޕީޖީގައި އެދިފައި ވަނީ، ދިވެހިރާއްޖޭގެ ޤާނޫނުލްއުޤޫބާތުގައި ބަޔާންކޮށްފައިވާ ފަދަ ކޮރަޕްޝަންގެ ޢަމަލެއް ހިންގާފައިވާކަމުގެ ދަޢުވާއެވެ. މާލޭ ލޮނުޒިޔާރާތްކޮޅުގައި ހަދާފައިވާ ޕާކުގެ މައްސަލައިގައި އޭސީސީގެ ތަޙްޤީޤަށް ފާހަގަކުރެވުނު ކަންތައްތަކަށް ބަލާއިރު، މާލޭ ލޮނުޒިޔާރަތްކޮޅު ސަރަޙައްދުގައި ޕާކު ތަރައްޤީކުރުމަށް މާލޭ ސިޓީ ކައުންސިލުން ހިންގާފައިވާ އެމަޝްރޫޢުގެ މަސައްކަތްތައް އަމީން ކޮންސްޓްރަކްޝަން ޕވޓ. ލޓޑ.އާ ޙަވާލުކޮށްފައިވަނީ ލިޔެކިޔުމެއްނެތި ވާދަވެރި ދެފުށްފެންނަ އުޞޫލަކުން ނޫންކަން އެކޮމިޝަނުން ވަނީ ފާހަގަކޮށްފައެވެ.
ސިފާގެ މައްޗަށް ދައުވާ ކުރަނީ، ހާމަކަންބޮޑު ދެފުންފެންނަ އުޞޫލެއް ނެތި، އެއްބަސްވުމެއް އަދި ލިޔެކިޔުމެއް ނެތި، އަމީން ކޮންސްޓްރަކްޝަނާ، މަސައްކަތް ޙަވާލުކޮށް ކުރުވުމާއި، ހިލޭ އެހީގެ ހުށަހެޅުމެއް ލިބިފައި އޮއްވައި އެކަން ހިއްސާކުރަންޖެހޭ ފަރާތްތަކާ ޙިއްސާކޮށްފައި ނުވާތީކަމަށް އޭސީސީން ވިދާޅުވެއެވެ. އަދި ލިޔެކިޔުމެއް ނެތި އަމީން ކޮންސްޓްރަކްޝަނާ މަސައްކަތް ޙަވާލުކޮށް އެކުންފުނިން ޢަމަލީގޮތުން 2 ފާޚާނާބަރީގެ މަސައްކަތް ފެށިފަހުންވެސް ކައުންސިލްގެ އިދާރާގެ ބަޖެޓްގެ ތެރެއިން ބިޑް ކޮމިޓީ މެދުވެރިކޮށް މަސައްކަތް ޙަވާލުކުރާނެ ފަރާތެއް ކަނޑައެޅުމަށް މާލޭ ސިޓީގެ މޭޔަރ ސިފާ މުޙައްމަދު މަސައްކަތްކޮށްފައިވުމާއިއެކު ސިފާ އެފަދައިން ޢަމަލުކޮށްފައިވަނީ، އަމީން ކޮންސްޓްރަކްޝަން ޕވޓ. ލޓޑ.އަށް ނާޖާއިޒު މަންފާއެއް ހޯދައިދިނުމުގެ ނިޔަތުގައިކަން ތަޙުޤީޤަށް ލިބިފައިހުރި ހެކިތަކުން އެނގެން އޮތުމާއެކުކަމަށް އޭސީސީން ވަނީ ވިދާޅުވެފައެވެ.