ސަރުކާރުން ފޯރުކޮށްދޭ ވިޔަފާރިއާއި ގުޅުންހުރި ޙިދުމަތްތައް އެއްތަނަކުން ލިބޭނެ އިންތިޒާމް ހަމަޖައްސަނީ
ސަރުކާރުން ފޯރުކޮށްދޭ ވިޔަފާރިއާއި ގުޅުންހުރި ޙިދުމަތްތައް އެއްތަނަކުން ލިބޭނެ އިންތިޒާމް އަންނަ އަހަރުގެ ތެރޭގައި ހަމަޖައްސާނެކަމަށް އިކޮނޮމިކް މިނިސްޓަރ ފައްޔާޒު އިސްމާއިލް ވިދާޅުވެއްޖެއެވެ.
ޕީއެސްއެމް ނިއުސްގެ ރާއްޖެމިއަދު ޕްރޮގުރާމްގައި ވާހަކަދައްކަވަމުން އިކޮނޮމިކް މިނިސްޓަރ ވިދާޅުވީ، ވިޔަފާރީގެ މާހައުލަކީ ވިޔަފާރިވެރިންނަށް ފަސޭހަ މާހައުލަކަށް ހެދުމަށް މިނިސްޓްރީން ގިނަ މަސައްކަތްތަކެއް ކުރަމުން އަންނަކަމަށެވެ.
މިނިސްޓަރ ވިދާޅުވީ، ރައްޔިތުންނާއި ވިޔަފާރިތަކަށް ފަސޭހަކޮށްދިނުމުގެ ގޮތުން އަންނަ އަހަރު ވަން ސޮޓޮޕް ޝޮޕެއް ހުޅުވުމަށް ހަމަޖެހިފައިވާކަމަށެވެ. މިތަން މެދުވެރިކޮށް ސަރުކާރުން ފޯރުކޮށްދޭ ވިޔަފާރިއާއި ގުޅުންހުރި ހުރިހައި ޙިދުމަތްތަކެއް އެތަނުން ލިބިގެންދާނެކަމަށެވެ. ރޭގަނޑުވެސް މިތަނުގެ ޙިދުމަތް ލިބޭނެކަމަށާއި، މިތަން އޮންނާނީ ސަރުކާރުގެ މިނިސްޓްރީތަކާއި އެއްބަސްވުންތައް ހެދިފައިކަމަށް މިނިސްޓަރ ވިދާޅުވިއެވެ.
"ރައްޔިތުންނާއި ވިޔަފާރިތަކަށް ފަސޭހަކޮށްދިނުމުގެ ގޮތުން އަންނަ އަހަރު އެބަ އުފައްދަން ވަން ސޮޓޮޕް ޝޮޕެއް. އޭގެމާނައަކީ ވިޔަފާރިއާއި ގުޅޭ ސަރުކާރާއި ގުޅުންހުރި ހުރިހައި ކަންތައްތަކަކަށް އަންނާނީ އެތަނަށް. އެއީ ޓްރޭޑް ނެޓް ކިޔާ ކުންފުންޏެއް އޮންނާނެ ސަރުކާރުގެ ސައްތައިން ސައްތަ ހިއްސާވާ ކުންފުންޏެއް. އެ އޮޕަރޭޓްކުރާނީ ކޮމާޝަލް މޮޑެލްއެއްގައި. އޭގެ މާނައަކީ ރޭގަނޑުވެސް އެތަން މަސައްކަތް ކުރާނެ. މީގެ ބޭނުމަކީ އެއްތަނަކުން ސަރުކާރާއި ބެހޭ ހުރިހައި ޙިދުމަތްތައް ދިނުން." މިނިސްޓަރ ފައްޔާޒު ވިދާޅުވިއެވެ.
މިނިސްޓަރ ވިދާޅުވީ ކުންފުންޏެއް ރަޖިސްޓްރީކުރަން މީހަކު އެތަނަށް ހުށައަޅައިފިނަމަ މިނިސްޓްރީއާއި އެތަނާއި ދޭތެރޭ ވަކި މުއްދަތެއްގެ ތެރޭގައި އެ މަސައްކަތް ނިންމުމަށް އޮންނާނީ އެއްބަސްވެފައިކަމަށެވެ. އަދި ވިޔަފާރިތަކުން އަންނަން ޖެހޭނީ އެމީހުން ބުނާ ދުވަހަކަށް އެ ހުއްދަ ބަލާކަމަށް މިނިސްޓަރ ވިދާޅުވިއެވެ.
ވިޔަފާރިތަކަށް ފަހު މާހައުލެއް ޤައިމްކޮށްދިނުމަށް މި ސަރުކާރުން ކުރަމުންދާ މަސައްކަތުގެ ތެރެއިން އެސްއެމްއީތަކަށް ޙާއްސަކޮށްގެން ވަނީ ބޭންކެއްވެސް ހުޅުވާފައެވެ. އަދި މި ބޭންކު މެދުވެރިކޮށް ކުދި ފަންތިއާއި މެދުފަންތީގެ ވިޔަފާރިތަކަށް އަންނަނީ ލޯނު ދޫކުރަމުންނެވެ.