ގިނަ ވިޔަފާރިތަކަށް ބޭންކް އޮފް މޯލްޑިވްސްގެ ރީޓެއިލަރސް ލޯނަށް އެދެވޭގޮތަށް ބަދަލުތަކެއް ގެނެސްފިއެވެ.
ކޯވިޑް19އާ ގުޅިގެން ވިޔަފާރިތަކަށް ދިމާވާ ދަތިތަކުން އަރައިގަތުމަށް ރީޓެއިލަރސް ލޯނުގެ ޝަރުތުތަކަށް ގެނައި ބަދަލުތަކާއިއެކު މަހެއްގެ މައްޗަށް ޕީއޯއެސް މެދުވެރިކޮށް ވިޔަފާރިތަކުން ހޯދަންޖެހޭ އާމްދަނީ ވަނީ 50000 ރުފިޔާއިން 30000 ރުފިޔާއަށް ދަށްކޮށްފައެވެ. މި ބަދަލާއެކު ރާއްޖޭގެ އެކި ކަންކޮޅުތަކުގައި ހިންގާ ގިނަ ވިޔަފާރިތަކަކަށް މި ލޯނަށް އެދި ހުށަހެޅުމުގެ ފުރުސަތު ލިބިގެންދާނެކަމަށް ބީއެމްއެލްއިން ބުނެއެވެ.
މި ލޯނަށް ކަނޑައެޅިފައިވާ ޝަރުތުތަކުގެ ތެރޭގައި ވިޔަފާރިތަކުން ވޭތުވެދިޔަ 12 މަސްދުވަހު މެދުކެނޑުމެއް ނެތި ޕީއޯއެސް އިން ވިޔަފާރީގެ މުއާމަލާތް ހިންގުން ހިމެނެއެވެ.
ވިޔަފާރިތަކަށް ލުއި ދިނުމުގެ ގޮތުން މިއަދު ބީއެމްއެލްއިން ގެނައި ބަދަލުތަކުގެ ތެރޭގައި މިވަނީ އެންމެ ބޮޑަށް ގެއްލުންވެގެން ދިޔަ މަސްތަކުގެ ވިޔަފާރި ނުހިމަނާ ގޮތަށް ކަނޑައަޅާފައެވެ. މި ގޮތުން ވޭތުވެދިޔަ 6 މަސްދުވަހުގެ އެވްރެޖްގެ ގޮތުގައި ކަނޑައެޅިފައިވާ 30000 ރުފިޔާ ހަމަކުރުމުގައި ވިޔަފާރިތަކަށް އެންމެ ބޮޑު ނޭދެވޭ އަސަރުކޮށްފައިވާ އޭޕްރީލް މަހުން ފެށިގެން ޖޫން މަހުގެ ނިޔަލަށް ނުހިމަނާ ގޮތަށް ވަނީ ހަމަޖެހިފައެވެ. ބީއެމްއެލް އިސްލާމިކް ރީޓެއިލަރސް ފައިނޭންސިންގ އަށްވެސް ވަނީ މިބަދަލުތައް ގެނެސްފައިކަމަށް ބީއެމްއެލްއިން ބުނެއެވެ.
ބީއެމްއެލްގެ ޑައިރެކްޓަރ އޮފް ރީޓެއިލް އަދި އެސްއެމްއީ ބޭންކިންގ، މޫސާ ނިމާލް ވިދާޅުވީ ކޯވިޑް-19 ގެ މިވޭތުވެދިޔަ މުއްދަތުގައި ވިޔަފާރިތަކަށް އެހީވުމަށް ވަރަށް ގިނަ ފިޔަވަޅުތަކެއް ބޭންކުން އަޅާފައިވާކަމަށެވެ. އަދި މިފަދަ ދަތި އުނދަގޫ ހާލަތެއްގައި އެ ބޭންކުގެ އަމާޒަކީ ހަރުދަނާ ގޮތެއްގައި ވިޔަފާރިތަކަށް އެހީތެރިކަން ފޯރުކޮށްދެމުން ދިޔުންކަމަށް އޭނާ ވިދާޅުވިއެވެ.
ރީޓެއިލަރސް ލޯނަކީ ވިޔަފާރިތައް ހިންގުމަށް ބޭނުންވާ ފައިސާ އާއި ވިޔަފާރި ފުޅާކުރުމަށް ބޭނުންވާ މާލީ އެހީތެރިކަން ފޯރުކޮށްދިނުމަށް ދޫކުރެވޭ ލޯނެކެވެ. ވިޔަފާރިތަކުން ޕީއޯއެސް މެދުވެރިކޮށް ހިންގާ މުއާމަލާތްތަކުގެ ޖުމްލަ ވިޔަފާރީގެ ތިންގުނައާ ހަމަޔަށް ރީޓެއިލަރސް ލޯނު ދޫކުރެވޭނެއެވެ. މިގޮތުން ލޯނު އަދި އޯވަރޑްރާފްޓްގެ ގޮތުގައިވެސް ރީޓެއިލަރސް ލޯނު ދޫކުރެވޭނެކަމަށް ބީއެމްއެލްއިން ބުނެއެވެ.