ރާއްޖެއިން ދައްކަންޖެހޭ ދަރަނިތައް އަންނަނީ ޤަވާއިދުން ދައްކަމުންކަމަށާއި ފިޗްއިން ރާއްޖޭގެ ރޭޓިންގ ދަށްކޮށްފައިވާ ގޮތާއިމެދު ސަރުކާރުން އެއްބަސްނުވާކަމަށް ފިނޭންސް މިނިސްޓްރީން ވިދާޅުވެއްޖެއެވެ.
ރާއްޖޭގެ ސޮވެރިން ކްރެޑިޓް ރޭޓިން ހަދަމުން އަންނަ ހޮންކޮންގްގެ ފިޗް ރޭޓިންއިން ބުރާސްފަތި ދުވަހު ނެރުނު ރާއްޖޭގެ ރޭޓިންގައި "ބީ" ނެގެޓިވް އައުޓްލުކްއިން "ސީސީސީ" އަށް ވަނީ ދަށްކޮށްފައެވެ. ރާއްޖޭގެ ރޭޓިންގ ދަށްކުރި މައިގަނޑު ސަބަބެއްކަމަށް ބުނެފައިވަނީ ބޭރު ފައިސާ ލިބުމަށް ކުރިމަތިވެފައިވާ ދަތިތަކުގެ ސަބަބުން އިގްތިސޯދަށް ކުރިމަތިވެފައިވާ ހީނަރުކަމާއި ކޮވިޑް-19 ގެ ސަބަބުން މިހާލަތުގައި ރާއްޖޭގެ ދަރަނި މަތިވަމުން ދިއުމެވެ.
ފިޗްގެ ރޭޓިންއާއި ގުޅިގެން ފިނޭންސް މިނިސްޓްރީން ނެރެފައިވާ ބަޔާނެއްގައި ބުނެފައިވަނީ މިހާތަނަށްވެސް ރާއްޖެއިން ދަރަނި ދައްކަމުން އަންނަކަމަށާއި ކުރިއަށްއޮތްތަނުގައިވެސް މިގޮތަށް އަމަލުކުރަމުންދާނެކަމަށެވެ. އަދި ސޮވެރިން ބޮންޑު ދެއްކުމުގައިވެސް އެކަމަށް ކަނޑައެޅިފައިވާ ވަގުތުތަކުގައި ދައްކަމުންދާނެކަމަށް ފިނޭންސްގެ ބަޔާނުގައިވެއެވެ.
ކޯވިޑް19 ގެހާލަތުގެ ސަބަބުން ރާއްޖޭގެ ދަރަނި މަތިވެ ރޭޓިން ދައްކޮށްފައިވާކަމަށް ރައްދު ދެއްވައި ފިނޭންސް މިނިސްޓްރީގެ ބަޔާނުގައި ބުނެފައިވަނީ ކޯވިޑް19 ރާއްޖޭގައި ފެތުރެންފެށިތާ 7 މަސްދުވަސްވެފައިވާއިރު މިހާރު މިބަލި ފެތުރޭ މިންވަރު ވަރަށް ބޮޑަށް ރާއްޖޭގައި ދަށްކުރެވިފައިވާކަމަށެވެ. އަދި ފަތުރުވެރިކަން އަލުން ޖުލައި 15 ވަނަ ދުވަހު ފަށައި މަހަކަށްވުރެ މަހަކު ރާއްޖެ އަންނަ ފަތުރުވެރިންގެ އަދަދު އިތުރުވަމުންއަންނަކަމަށެވެ. ޖުލައިމަހު 2000 ފަތުރުވެރިން އައިއިރު އޮކްޓޯބަރ މަހު ރާއްޖެއައި ފަތުރުވެރިންގެ އަދަދު 21000 އަށް އިތުރުކުރެވިފައިވާކަމަށް ފިނޭންސް މިނިސްޓްރީން ބުނެއެވެ.
ފިނޭންސްގެ ބަޔާނުގައި ރާއްޖެއަށް އިތުރު އެއަރލައިންތަކަކުން ދަތުރުތައް ފަށައި ރާއްޖެއަށް އެންމެ ގިނައިން ފަތުރުވެރިން އަންނަ ގައުމުތަކުން ރާއްޖެ ދަތުރުކުރުމަށް ލުއިތަކެއް ދެމުންއަންނަކަމަށް ބުނެފައިވެއެވެ. އަދި 100 އަށްވުރެ ގިނަ ރިސޯޓް މިހާރުވެސް އޮޕަރޭޝަނަށް ގެނެވިފައިވާކަމަށް ވަނީ ބުނެފައެވެ. ރާއްޖެއަކީ ކޯވިޑްގެ ކޭސްތައް މަދުކޮށް ވަކި ޙާއްސަ ގައިޑްލައިންއެއްގެ ދަށުން ފަތުރުވެރިކަން ހުޅުވާލި ފުރަތަމަ މާކެޓްކަން ވަނީ ފަހަގަކޮށްފައެވެ. މީގެއިތުރުން 2021 ވަނަ އަހަރު ރާއްޖޭގެ ފަތުރުވެރިކަން މާކެޓްކުރުމަށް ބަޖެޓެއް ކަނޑައަޅައި، ފަތުރުވެރިކަމާއި ގުޅުންހުރި ފަރާތްތަކާއި ވަރަށް ގާތުން މަސައްކަތްކުރަމުން އަންނަކަމަށްވެސް މި ބަޔާނުގައިވެއެވެ.
ފިނޭންސްއިން ވިދާޅުވީ، ކޯވިޑް19 ގެ ބަލިމަޑުކަން ފެތުރިގެން އައިއިރު އިޤްތިސާދަށް އަސަރުކުރިކަމަށާއި، އަދި ރާއްޖޭގެ ދަރަނި ކުޑަކުރުމަށް ގިނަ މަސައްކަތްތަކެއް ކުރަމުން އަންނަކަމަށެވެ. މިކަމުގައި ބައިނަލްއަޤްވާމީ ގިނަ ފަރާތްތަކާއި ގުޅިގެން މަސައްކަތްކުރަމުން އަންނަކަން ވަނީ ފާހަގަކޮށްފައެވެ. އޭގެތެރޭގައި އިންޑިއާ ސަރުކަރާއި، ޖަޕާން ސަރުކާރާއި، އޭޑީބީ، ވޯލްޑް ބޭންކް، އައިޑީބީ، ޔޫރަޕިއަން އިންވެސްޓްމަންޓް ބޭންކް ފަދަ ބޭންކްތައް ހިމެނެއެވެ.