މިއަންނަ އާދީއްތަ ދުވަހަށް ހޯރަފުށީ އެއާރޕޯޓްގެ ހުރިހާ މަސައްކަތްތަކެއް ނިންމާލުމަށް މަސައްކަތް ކުރަމުންދާކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ އެމްޓީސީސީން ވިދާޅުވެއްޖެއެވެ.
އެމްޓީސީސީން ބުނީ، ހޯރަފުށީ އެއާޕޯޓުގެ މަޝްރޫޢުގެ މަސައްކަތުގެ 84 އިންސައްތަ މަސައްކަތް މިހާތަނަށް މުޅިން ނިންމާލެވިފައިވާ ކަމަށެވެ.
ހޯރަފުށީ އެއަރޕޯޓްގެ މަސައްކަތް ކުރިއަށްދާގޮތް ބައްލަވާލެއްވުމަށް އެމްޓީސީސީގެ ސީއީއޯ ޢާދަމް އާޒިމްވަނީ ހޯރަފުއްޓަށް ޒިޔާރަތްކުރައްވާފައެވެ.
މި މަޝްރޫއުގެ ތެރެއިން ހޯރަފުށީ އެއަރޕޯޓުގެ ރަންވޭގެ މަސައްކަތް މިހާރުވަނީ މުޅިން ނިންމާލާފައެވެ. އެއަރޕޯޓް ރަންވޭއަކީ 1200 މީޓަރު ދިގު ރަންވޭއެކެވެ. އަދި ޓާމިނަލް އިމާރާތާއި، ފަޔަރ ބިލްޑިންގގެ މަސައްކަތުގެވެސް ބޮޑު ބައެއް ނިމިފައިވާކަމަށް އެމްޓީސީސީން ވިދާޅުވެއެވެ.
ސަރުކާރުން މަސައްކަތްކުރަމުން ދަނީ ހޯރަފުށީ އެއަރޕޯޓްގެ ޚިދުމަތް މިމަހުގެ 11ގައި ފެށުމަށެވެ. މި މަސައްކަތް ސަރުކާރުން ކަނޑައަޅާފައިވާ ލަނޑުދަނޑިއާއި އެއްގޮތަށް ނިންމާލެވޭނެކަމުގެ ޔަގީންކަން އެމްޓީސީސީންދެއެވެ.