މިއަހަރުގެ މޯލްޑިވްސް މެރިން އެކްސްޕޯ ޑިސެމްބަރމަހު ބޭއްވުމަށް ނިންމައިފިއެވެ.
މޯލްޑިވްސް މެރިން އެކްސްޕޯއަކީ މެރިން ދާއިރާގައި މަސައްކަތްކުރާ ދިވެހި އަދި ބޭރުގެ ފަރާތްތަކަށް، އެފަރާތްތަކުގެ އުފެއްދުންތައް ބައިނަލްއަޤްވާމީ ޕްލެޓްފޯމެއްގައި ދައްކާލުމުގެ ފުރުޞަތު ދިނުމުގެ ގޮތުން ބާއްވާ އެކްސްޕޯއެކެވެ.
ޕީއެސްއެމް ނިއުސްގެ ރާއްޖެމިއަދު ޕްރޮގުރާމްގައި ވާހަކަދައްކަވަމުން މޯލްޑިވްސް މެރިން އެކްސްޕޯ މިއަހަރު އިންތިޒާމްކުރާ މީޑިއަމް ޕްރައިވެޓް ލިމިޓެޑްގެ މެނޭޖިންގ ޑިރެކްޓަރ ޝާމް މުހައްމަދު ވިދާޅުވީ، މިއަހަރުގެ މެރިން އެކްސްޕޯ ކުރިއަށްދަނީ އަންނަ ޑިސެމްބަރ މަހުގެ 20 އިން 24 އަށް ވާޗުއަލްކޮށްކަމަށެވެ.
މިއަހަރުގެ މެރިން އެކްސްޕޯގެ ތީމްއަކީ ސެލެބްރޭޓިންގ މެރިން ހެރިޓޭޖްއެވެ. މިއަހަރުގެ މެރިން އެކްސްޕޯގެ ތެރެއިން އިންޓަނޭޝަނަލް އޯޑިއަންސް ބޮޑުކުރުމުގެ ގޮތުން މާކެޓިންގ ކެންޕެއިންއެއް ފެނިގެންދާނެކަމަށް ޝާމް ވިދާޅުވިއެވެ. މީގެއިތުރުން މެރިން އެކްސްޕޯގެ ވަރޗުއަލް އެޑިޝަންގެ ތެރެއިން ބޯޓިން އެވޯޑްސްވެސް ދިނުމަށް ހަމަޖެހިފައިވާކަން އޭނާ ފާހަގަކުރެއްވިއެވެ.
"މިއަހަރު މިއީ ފުލް ވަރޗުއަލް އެކްސްޕީރިއަންސްއެއް. ކޮންމެ ބޭފުޅަކުވެސް އަޅުގަނޑުގެ ވެބްސައިޓަށް ވަޑައިގެން ރަޖިސްޓްރީވުމަށްފަހު ލޮބީ އޭރިއާ، ކޮންފަރެންސް އޭރިއާ އަދި އެކްސްޕޯ އޭރިއާ މިއާއިއެކު ނެޓްވޯކިންގ އޭރިއާވެސް ހިމެނޭގޮތައް އިންނާނީ. މިއީ ވަރަށް ރަނގަޅު ފުރުސަތެއް ހުރިހައި ވިޔަފާރިތަކަށް، މެރިން އިންޑަސްޓްރީގައި ޕާޓިސިޕޭޓްވެ ރެކޮގްނައިޒްވުމަށް ވަރަށް ރަނގަޅު ޕްލެޓްޕޯމެއް މިއީ." ޝާމް ވިދާޅުވިއެވެ.
މެރިން އެކްސްޕޯއާއި ގުޅޭގޮތުން ވާހަކަދައްކަވަމުން ނޭޝަނަލް ބޯޓިން އެސޯސިއޭޝަންގެ ނައިބު ރައީސް އިސްމާއިލް ހަމީދު ވިދާޅުވީ، މުޅި މި އެކްސްޕޯއަކީ ބިޒްނަސް ޕްލެޓްފޯމެއްކަމަށެވެ. މި އެކްސްޕޯގެ ތެރެއިން ބޯޓިން ދާއިރާގައި މަސައްކަތްކުރާ ފަރާތްތައް އެއްތަނަކަށް އައިސް އެމީހުންގެ ޕްރޮޑަކްޓް ޕްރޮމޯޓްކުރުމަށް އެހީތެރިވެދޭނެކަމަށެވެ.
"މި އިވެންޓް މި ބޭނުންކުރަނީ ބިޒްނަސް ޕްލެޓްފޯމްއެއްގޮތައް. ހަމައެކަނި އެއްދުވަހަކު 2 ދުވަހަކު އޮންނަ ހަރަކާތެއްގޮތަކަށްނޫން. މުޅި ބޯޓިން އިންޑަސްޓްރީގައި ހަރަކާތްތެރިވާ ހުރިހައި ފަރާތްތަކަކުން އެއްތަނަކަށް އައިސް ދިވެހިރާއްޖެއާއި އަދި ރާއްޖެއަށް ބޯޓާ ގުޅުންހުރި ތަކެތި ވިއްކާ ފަރާތްތައްވެސް ގެނެސް އިންޓަނޭޝަނަލް މާކެޓް ޕްލޭސްއެއް ގޮތުގައި މިކަން ތަމްސީލްވެގެން މިދަނީ. " އިސްމާއިލް ރަޝީދު ވިދާޅުވިއެވެ.
މޯލްޑިވްސް މެރިން އެކްސްޕޯއަކީ ރާއްޖޭގެ ބޯޓިންގ ދާއިރާ ހަރުދަނާކުރުމަށްޓަކައި ނޭޝަނަލް ބޯޓިންގ އެސޯސިއޭޝަން އޮފް މޯލްޑިވްސްއިން ކޮންމެ އަހަރަކު ވެސް ކުރިއަށްގެންދާ ހަރަކާތެކެވެ. މިއީ މި އިވެންޓް ކުރިއަށްގެންދާ 6 ވަނަ އަހަރެވެ.