ކޯވިޑްގެ ހާލަތުގައި ފަތުރުވެރިކަން ކުރިއެރުވުމާ ގުޅޭގޮތުން ހެލްތު މިނިސްޓަރާއެކު ޓޫރިޒަމް މިނިސްޓަރ މަޝްވަރާކޮށްފި
ކޯވިޑްގެ ހާލަތުގައި ފަތުރުވެރިކަން ކުރިއެރުވުމާ ގުޅޭގޮތުން ހެލްތު މިނިސްޓަރާއެކު ޓޫރިޒަމް މިނިސްޓަރ މަޝްވަރާކޮށްފިއެވެ.
ޓޫރިޒަމް މިނިސްޓަރ ޑރ. އަބްދުއްﷲ މައުސޫމް ވަނީ ދާދިފަހުން ހެލްތް މިނިސްޓަރަކަށް އައްޔަންކުރެއްވި އަޙްމަދު ނަސީމް (ކެރަފާ ނަސީމް) އާއި ބައްދަލުކޮށް މަޝްވަރާކުރައްވާފައެވެ.
ޓޫރިޒަމް މިނިސްޓްރީގައި މިއަދު ބޭއްވެވި ބައްދަލުވުމެއްގައި މައިގަނޑު ގޮތެއްގައި މަޝްވަރާކުރައްވާފައި ވަނީ ފަތުރުވެރިކަމުގެ ދާއިރާއާ ގުޅުންހުރި ސިއްހީ ކަންކަން އިތުރަށް ކުރިއަރުވައި ހަރުދަނާކުރެވިދާނެ ގޮތްތަކާއި ގުޅޭގޮތުންކަމަށް ޓޫރިޒަމް މިނިސްޓްރީން ވިދާޅުވެއެވެ. މީގެއިތުރުން 2 މިނިސްޓްރީ ގުޅިގެން މަސައްކަތް ކުރާނެ ގޮތްތަކާއި ގުޅޭގޮތުންނާއި ކޯވިޑްގެ ހާލަތަށްފަހުގައިވެސް ދެ މިނިސްޓްރީ ގުޅިގެން ކުރެވިދާނެ މަސައްކަތްތަކާ ގުޅޭގޮތުން މަޝްވަރާކުރެއްވިކަމަށް ޓޫރިޒަމް މިނިސްޓްރީން ވިދާޅުވެއެވެ.
މި ބައްދަލުވުމަށްފަހު ޓޫރިޒަމް މިނިސްޓަރ ކުރެއްވި ޓްވިޓެއްގައި ވިދާޅުވެފައިވަނީ މިފަދަ ކާރިސާއެއްގެ ހާލަތުގައި ސަރުކާރުގެ މުވައްސަސާތަކާއި އަމިއްލަ ފަރާތްތައް ގުޅިގެން މަސައްކަތް ކުރުމަކީ ޤައުމު ތަރައްޤީކުރުމުގައި އެންމެ މުހިންމު އެއް މަސައްކަތްކަމަށެވެ. އަދި ފަތުރުވެރިކަމުގެ ސިނާއަތް ކުރިއަރުވަން ވެދޭ އެހީތެރިކަމަށް ހެލްތު މިނިސްޓަރ ނަސީމްއަށް ވަނީ ޝުކުރު އަދާކުރައްވާފައެވެ.
ކޯވިޑްގެ މިހާލަތުގައި ފަތުރުވެރިކަން އަލުން ފަށައިގެން ކުރިއަށްދާއިރު ސިއްހީގޮތުން އަޅަންޖެހޭ މުހިންމު ފިޔަވަޅުތައް އެޅުމަކީ މުހިންމުކަމަކަށްވާއިރު މިއީ ރާއްޖެއަށް އަންނަ ފަތުރުވެރިންގެ އަދަދު އިތުރުވެގެންދާނެ ސަބަބެއްކަމަށް ތަޖުރިބާކާރުން ބުނެއެވެ.