މާލެއަށް ބޯކޮށް ވާރޭވެހި ފެން ބޮޑުވެއްޖެއެވެ.
އެގޮތުން އާއްމުކޮށްވެސް މާލޭގައި ފެންބޮޑުވާ އަމީނީ މަގާއި، އަދި ބައެއް އެހެން ގިނަ މަގުތަކުގައިވެސްވަނީ ބޯކޮށް ވާރޭވެހި ފެންބޮޑުވެފައެވެ.
މިކަމާއި ގުޅިގެން ނެޝަނަލް ޑިޒާސްޓަރ މެނޭޖްމަންޓް އޮތޯރިޓީ އެންޑީއެމްއޭއިން ވިދާޅުވީ، ވިއްސާރައާއި ގުޅިގެން އެއްވެސް ގެއަކަށް ގެއްލުންވެގެން މިހާތަނަށް މައްސަލައެއް ހުށައަޅާފައި ނުވާކަމަށެވެ. މާލެ ސިޓީ ކައުންސިލުންވެސް ވިދާޅުވި އެއްވެސް މައްސަލައެއް ނާންނަކަމަށާއި، މާލޭގެ ފެންހިންދާ ސްޓޯމް ވޯޓަރ ނިޒާމު ބޭނުންކޮށްގެން ފެން ހިންދުމުގެ މަސައްކަތް ކުރަމުންދާކަމަށެވެ. އަދި އެމްއެންޑީއެފުންވެސް މިހާރުދަނީ މާލޭގެ ފެންބޮޑުވި އެކި ސަރަޙައްދުތަކުން ފެން ހިންދުމުގެ މަސައްކަތް ކުރަމުންނެވެ.
މޫސުން ގޯސްވާނެތީ މޫސުމާއިބެހޭ ޤައުމީ އިދާރާއިންވަނީ ރާއްޖޭގެ ބޮޑު ސަރަޙައްދަކަށް ވައިޓް އެލަރޓްވެސް ނެރެފައެވެ. އެލަރޓް ނެރެފައި ވަނީ ބ.އަތޮޅުން ފެށިގެން ތ.އަތޮޅާއި ދެމެދުގައިވާ ރަށްތަކަށެވެ. ގުގުރުމާއި ބޯކޮށް ވާރެވެހުމާއިއެކު، ވިލާގަނޑުގައި 40މޭލަށް ވައިގަދަވާނެކަމަށްވެސް މޫސުމާއި ބެހޭ ޤައުމީ އިދާރާއިން ވިދާޅުވެއެވެ. އެލަރޓް ނެރެފައި ވަނީ މެންދުރުފަހު 15:00 އާއި ހަމައަށެވެ.
ވައިގަދަވާނެތީ ކަނޑުދަތުރުކުރާ ފަރާތްތަކުން އެކަމަށް ސަމާލުވުމަށް މެޓް އޮފީހުން އިލްތިމާސްކުރެއެވެ.