ޤައުމީ އެއަރލައިން މޯލްޑިވިއަން ހިންގަމުން އަންނަ އައިލެންޑް އޭވިއޭޝަން ސާރވިިސްއިން ހަރުދަނާކޮށް ހިންގުމަށް ގިނަ ކަންތައްތަކެއް އިޞްލާހުކުރުމަށް އެކުންފުންޏަށް އެންގުމަށް ރައްޔިތުންގެ މަޖިލީހުން މިއަދު ފާސްކޮށްފިއެވެ.
އައިލެންޑް އޭވިއޭޝަން، އައިއޭއެސްގެ ހުރި މައްސަލަތަކާ ގުޅޭގޮތުން ރައްޔިތުންގެ މަޖިލީހުގެ ސްޓޭޓް އޯންޑް އެންޓަޕްރައިސަސް ކޮމިޓީން ކުރި ދިރާސާތައް ނިންމައި މަޖިލީހުގެ ތަޅުމަށް ފޮނުވި ރިޕޯޓުގައި ވަނީ އެކުންފުނިން އިޞްޅާހުކުރަން ހުރި ގިނަ ކަންތައްތަކެއް ހިމަނާފައެވެ. މިރިޕޯޓް މަޖިލީހުން ފާސްކުރީ ވޯޓްގައި ބައިވެރިވެވަޑައިގެންނެވި 54 މެންބަރުންގެ ވޯޓުންނެވެ.
އައިލެންޑް އޭވިއޭޝަންއަށް އެންގުމަށް މަޖިލީހުން ފާސްކޮށްފައިވާ ރިޕޯޓްގައި ހިމެނޭ ކަންކަމުގެ ތެރޭގައި ކުންފުންޏަށް ލިބެމުންދާ އަދި ކުރިމަގުގައި ބޭނެކަމަށް އަންދާޒާ ކުރާ އާމްދަނީއަށް ބަލާއިރު، ކުންފުނި ދެމިއޮތުމަށް ހުރަސްއެޅިދާނެ ފަދަ ބޮޑު ގެއްލުމެއް ކުންފުންޏަށް ލިބިދާނެކަމަށް ލަފާނުކުރެވުނު ނަމަވެސް ކުންފުނީގެ މިވަގުތުގެ ކޭޝްފުލޯއަށް ބަލާއިރު، ކުންފުނީގެ ދަރަންޓާއި، އެހެނިހެން ހިންގުމުގެ ޚަރަދުތައް އަދާކުރުމުގައި ދަތިތަކެއް ހުރިކަން ފާހަގަކުރެވޭކަމަށް ވަނީ ބުނެފައެވެ. ކުންފުނީގެ އާމްދަނީ އިތުރުކުރުމަށް ރާވާފައިހުރި ކަންކަން އަވަސް މުސްތަޤުބަލެއްގައި ހިންގަން ފެށުމުގެ އިތުރުން، ކުންފުނީގެ ޚަރަދު ކުޑަކުރެވޭނެ ގޮތްތައް ހޯދައި އަޅަންޖެހޭ ފިޔަވަޅުތައް އެޅުމަށް މަޖިލީހުން ވަނީ އެކުންފުންނަށް އެންގުމަށް ނިންމާފައެވެ. އަދި އައިލެންޑް އޭވިއޭޝަނަކީ ފައިދާވާ ކުންފުންޏެއް ގޮތުގައި ދެމެހެއްޓުމަށް ކުރަންޖެހޭ މަސައްކަތްތައް ކުރުމަށާއި، ދަރަނި އަދާކުރުމުގެ ޤާބިލުކަންހުރި ކުންފުންޏެއްގެ ގޮތުގައި ދެމެހެއްޓުމަށް ކުރަންޖެހޭ މަސައްކަތްތައް ކުރުމަށް އައިލެންޑް އޭވިއޭޝަން ސަރވިސަސް ލިމިޓެޑަށް ދެންނެވުމަށްވެސް މަޖިލީހުން ފާސްކުރި ރިޕޯޓްގައިވެއެވެ.
މީގެ އިތުރުން އެކުންފުނީގެ ހިންގުން ހަރުދަނާކުރުމަށް މުޅި ކުންފުނީގެ ދިގު މުއްދަތުގެ ތަޞައްވަރު އިޞްލާހުކޮށް އެކަށައެޅުއްވުމަށާއި، ކުންފުނީގެ ނަފާވެރިކަން އިތުރުކުރުމަށް ސީޕްލޭން އޮޕަރޭޝަން އިތުރަށް ފުޅާކުރުމަށް ކުރަންޖެހޭ އެންމެހައި މަސައްކަތްތައް އަވަސް ފުރުޞަތެއްގެ ތެރޭގައި ކުރުމަށް އެކުންފުންޏަށް ލަފާދިނުމަށްވެސް މިރިޕޯޓްގައި ވެއެވެ. އަދި އަލަށް ތަރައްޤީވަމުން އަންނަ ޑޮމެސްޓިކް އެއަރޕޯޓުތަކުން ފަސްޓް މޫވަރ އެޑްވާންޓޭޖް ޤާއިމުކުރުމަށް ކުރަންޖެހޭ އެންމެހައި މަސައްކަތްތައް ކުރުމަށް ދެންނެވުމަށާއި، އެންޓަރޕްރައިޒް ރިސްކް އެސެސްމެންޓް ހެދުމަށް އައިލެންޑް އޭވިއޭޝަނަށް އެންގުމަށްވެސް މަޖިލީހުގެ ރިޕޯޓްގައިވެއެވެ.
ކުންފުނިން އިތުރު މުވައްޒަފުން ނަގާނަމަ ނަގަންވާނީ، މިނިސްޓްރީ އޮފް ފައިނޭންސްއިން ފާސްކޮށްފައިވާ ކުންފުނީގެ އެކްސްޕޭންޝަން ޕްލޭނާ އެއްގޮތަށްކަމާއި، ފިނޭންސް މިނިސްޓްރީން އެކުލަވާލާފައިވާ އުސޫލުތަކާއި ފާސްކޮށްފައިވާ މުސާރައާއި ޢިނާޔަތްތަކުގެ ބޭރުން އިތުރު އެލަވެންސެއް ނުނެގުމަށް އައިލެންޑް އޭވިއޭޝަންގެ ބޯޑަށް އިލްތިމާސްކުރުމަށްވެސް މަޖިލީހުގެ ރިޕޯޓްގައިވެއެވެ.
މަޖިލީހުގެ އެދުމަކަށް އޮޑިޓް އޮފީހުން ވަނީ އައިލެންޑް އޭވިއޭޝަންގެ އޮޑިޓެއް ހަދާފައެވެ. އެ އޮޑިޓުން އެކުންފުނީގެ ސީނިއާ މުވައްޒަފުންގެ މުސާރަ ބޮޑުކުރުމަށް އުސޫލާއި ކީލާފަށް ގިނަ ކަންކަން ކޮށްފައިވާކަން ވަނީ ހާމަވެގެން ގޮސްފައެވެ.