ކޯވިޑް-19 ޖެހުނު އިތުރު ދިވެއްސަކު ނިޔާވެއްޖެއެވެ. އެޗްޕީއޭއިން ވިދާޅުވީ ނިޔާވެފައިވަނީ 67 އަހަރުގެ ދިވެހި ފިރިހެނެއްކަމަށެވެ. މި މީހާ ނިޔާވެފައިވަނީ ހުޅުމާލެ މެޑިކަލް ފެސިލިޓީގައި ފަރުވާދެމުން ދަނިކޮށެވެ.
މިއަދު މަރުވި މީހާއާއިއެކު މިހާތަނަށް ރާއްޖެއިން ކޯވިޑް-19 ޖެހިގެން ނިޔާވި މީހުންގެ އަދަދު ވަނީ 36 އަށް އަރާފައެވެ. މީގެތެރޭގައި ހިމެނެނީ 29 ދިވެހިންނާއި 7 ބިދޭސީންނެވެ.
މިއަދު ނިޔާވި މީހާއަކީ މި ބަލީގައި ރާއްޖެއިން މިމަހު ނިޔާވި ދެވަ މީހާއެވެ. އެންމެ ފަހުން ރާއްޖެއިން މި ބަލީގައި މީހަކު ނިޔާވެފައިވަނީ މިމަހުގެ 11ވަނަ ދުވަހުއެވެ. އެދުވަހު ނިޔާވީ ދަރުމަވަންތަ ހޮސްޕިޓަލުގައި ފަރުވާ ހޯދަމުންދިޔަ އުމުރުން 56 އަހަރުގެ ދިވެހި އަންހެނެކެވެ.
ކޯވިޑް ބަލީގެ ފުރަތަމަ ކޭސް ރާއްޖެއިން ފެނުނީ މިއަހަރުގެ މަރޗްމަހުގެ 7 ވަނަ ދުވަހުއެވެ. މިހާތަނަށް ރާއްޖެއިން 11154 މިހުންވަނީ ބައްޔަށް ޕޮޒިޓިވްވެފައެވެ. މިވަގުތުވެސް ބައްޔަށް ފަރުވާހޯދަމުންދާ 1117މީހުން އެބަތިއްބެވެ. އަދި ހޮސްޕިޓަލްގައި އެޑްމިޓްކޮށްގެން 49މީހުންނަށްދަނީ ފަރުވާދެމުންނެވެ.
އިއްޔެ އެކަނިވެސް ރާއްޖެއިން 41 މީހަކު ވަނީ ބައްޔަށް ޕޮޒިޓިވްވެފައެވެ. މިގެތެރޭގައި ހިމެނެނީ 37 ދިވެހިންނާއި 4 ބިދޭސީންނެވެ.
އަތޮޅުތަކުގައި ކޯވިޑް-19 އަށް ޕޮޒިޓިވްވެފައިވާ 60 ދިވެހިންނާއި، 9 ބިދޭސީން އެބަތިއްބެވެ.