ރިސޯޓް މުވައްޒަފުންނަށް އަމާޒުކޮށްގެން އާންމު ސިއްހަތާއިގުޅޭ ތަމްރީން ޕްރޮގުރާމެއް ބާއްވައިފިއެވެ.
ޓޫރިޒަމް މިނިސްޓްރީއާއި އެޗްޕީއޭ ގުޅިގެން ކުރިއަށްގެންދިޔަ މި ތަމްރީން ޕްރޮގުރާމް ބާއްވާފައިވަނީ މިމަހުގެ 11 ވަނަ ދުވަހުއެވެ. މި ޕްރޮގުރާމްގައި ރިސޯޓް މުވައްޒަފުންނާއި ރިސޯޓްތަކުގައި މަސައްކަތްކުރާ ސިއްހީ މާހިރުން ވަނީ ބައިވެރިވެފައެވެ. އޮންލައިންކޮށް ކުރިއަށްގެންދިޔަ މި ޕްރޮގުރާމްގައި 3 ގަޑިއިރުގެ 2 ސެޝަނެއް ވަނީ ބާއްވާފައެވެ. ޖުމްލަ 137 ބައިވެރިން ތަމްރީންގައި ވަނީ ބައިވެރިވެފައެވެ. މިއީ މިގޮތަށް ކުރިއަށްގެންދިޔަ 4 ވަނަ ތަމްރީން ޕްރޮގުރާމްކަމަށް ޓޫރިޒަމް މިނިސްޓްރީން ވިދާޅުވެއެވެ.
ކޯވިޑް19 އަށްފަހު ރާއްޖޭގެ ބޯޑަރު ބަންދުކޮށްފައި އޮތުމަށްފަހު ޖުލައި 15ގައި ބޯޑަރު އަލުން ހުޅުވާލާފައިވަނީ އާންމު ސިއްހަތުގެ ރައްކާތެރިކަމުގެ މިންގަނޑުތަކަށް ބަލައިގެންނެވެ. އާންމު ސިއްހަތުގެ ރައްކާތެރިކަން ދެމެހެއްޓުމާއި ބަލި ފެތުރުން ހުއްޓުވުމަށްޓަކައި އެޗްޕީއޭގެ ގައިޑްލައިނަށް އަހުލުވެރިވުން މުހިންމުކަމަށް ޓޫރިޒަމް މިނިސްޓްރީން ވިދާޅުވެއެވެ. ފަތުރުވެރިކަމުގެ ސިނާއަތުގައި މަސައްކަތްކުރާ ފަރާތްތަކަށް ބޭނުންވާނެ ފަންނީ މައުލޫމާތު މި ތަމްރީން ޕްރޮގުރާމްގެ ތެރެއިން ފޯރުކޮށްދީފައިވާކަމަށް ޓޫރިޒަމް މިނިސްޓްރީން ވަނީ ވިދާޅުވެފައެވެ.
ފަތުރުވެރިންނަށް ޙިދުމަތްދޭ ތަންތަން ސިއްހީ މިންގަނޑުތަކަށް ފެއްތުމަށް "ކޮންޕްލަޔަންސް އޮފިސަރ ތަމްރީން ޕްރޮގުރާމް"އެއް ޓޫރިޒަމް މިނިސްޓްރީން ދާދިފަހުން ވަނީ ލޯންޗްކޮށްފައެވެ. މިނިސްޓްރީން މި ޕްރޮގުރާމް ކުރިއަށްގެންދަނީ އެމްއެންޔޫއާއި ޔޫރަޕިއަން އިންސްޓިޓިއުޓް ފޯ އެކްސްޕޯޓް ކޮންޕްލަޔަންސްއާ ގުޅިގެންނެވެ. މި ޕްރޮގުރާމްގެ ތެރެއިން 830 ކޮންޕްލަޔަންސް އޮފިސަރުން ތަމްރީން ވެގެންދާނެކަމަށް މިނިސްޓްރީން ވިދާޅުވެއެވެ.