ރާއްޖޭގެ ޝަރުޢީ ދާއިރާ ވަރަށްބޮޑަށް އިޞްލާހުކުރެވިއްޖެކަމަށާ، އަދިވެސް ކުރަންހުރި މަސައްކަތް އެބަހުރިކަމަށް ރައްޔިތުންގެ މަޖިލީހުގެ ނާއިބު ރައީސް އީވާ ޢަބްދުﷲ ވިދާޅުވެއްޖެއެވެ.
ޤާނޫނުލް އުޤޫބާތަށް ހުށައަޅަފައިވާ އިޞްލާޙާ ގުޅޭގޮތުން ވާހަކަފުޅުދައްކަވަމުން ރައްޔިތުންގެ މަޖިލީހުގެ ނާއިބުރައީސް އަދި ގަލޮޅު އުތުރު ދާއިރާގެ މެންބަރު އީވާ ޢަބްދުﷲ ވިދާޅުވީ، ކޯޓުތައް އިޞްލާހުކުރެވުނީ ޖުޑީޝަލް ސާރވިސް ކޮމިޝަން، ޖޭއެސްސީގެ މަސައްކަތުންކަމަށެވެ. އަދި އެހެން މިނިވަން މުއައްސަސާތައްވެސް އިޞްލާހުވަންދެން އެމަސައްކަތްކުރަންޖެހޭކަމަށް އިވާ ވިދާޅުވިއެވެ.
މަޖިލީހުގެ ނާއިބު ރައީސް ވިދާޅިވީ، މިއީ މުޅި ދައުލަތް ގުޅިގެން ކުރަންޖެހޭ މަސައްކަތެއްކަމަށާ، އެއީ ރައްޔިތުންގެ މަޖިލީހާއި ކޮމިޝަންތަކާއި ފުލުހުންނާއި ޕްރޮސެކިއުޓަރ ޖެނެރަލާ ގުޅިގެން ރައްޔިތުންނަށް ކޮށްދޭންޖެހޭ ކަމެއްކަަށް މަޖިލީހުގެ ނާއިބު ރައީސް ވިދާޅުވިއެވެ.
"މީގެ ދެހަފްތާއެއް ކުރިން މީހަކު ބުނި، އިދިކޮޅު ޕާޓީގެ މެންބަރަކު ބުނި މިހާރު ދިވެހިރާއްޖޭގެ ކޯޓުތަކުން ކޯޓް ޢަމުރު ގަންނާކަށް ނުލިބޭ. އަޅުގަނޑަށް ހީވަނީ އެވިދާޅުވީ ދެން މިހާރު ފަނޑިޔާރުން ރިޝްވަތު ނެގުމުގެ ވާހަކަ ތަންކޮޅޭއް ކުޑަވިއްޔޭ ނުވަތަ ރިޝްވަތު ފަނޑިޔާރުން މިހާރު ނުނަންގަވަނީއޭ ނުަވތަ ރިޝްވަތު ނުވެސް ދެވެނީއޭ ދިވެހިރާއްޖޭގެ ކޯޓުތަކަށް. އެއީ އަޅުގަނޑުގެ އުންމީދަކީ. އިއްޒަތްތެރި ރައީސް އެހިސާބަށް ގެންދެވެންދެން އަޅުގަނޑުމެން ޖެހޭނެ މިވާހަކަ ދައްކަދައްކާ ތިބެން." އީވާ ވިދާޅުވިއެވެ.
އިވާގެ އެވާހަކަތާކާ ގުޅިގެން ޖިލީހުގެ ރައީސް މުހައްމަދު ނަޝީދުވެސް ވިދާޅުވީ ރާއްޖޭގެ ޝަރުޢީ ނިޒާމަށް ހެޔޮ ބަދަލުތަކެއް އައިސްފައިވާކަމަށެވެ. ރައީސް ނަޝީދު ވިދާޅުވީ ފަނޑިޔާރުން ރިޝްވަތު ނެންގެވުމާއި ނާޖާއިޒް ފައިދާ ނެންގެވުމުގެ ވާހަކަތަކަކީ އަބަދުވެސް މިރާއްޖެއިން އިވޭ ވާހަކަތަކެއްކަމަށާ، ރައްޔިތުންގެ މަޖިލީހުގެ އަޣުލަބިއްޔަތު އެމްޑީޕީއަށް ރައްޔިތުން ދިނީ އެނިޒާމް އިޞްލާހުކުރުމަށްކަމަށް ވިދާޅުވިއެވެ. ރައީސް ނަޝިދު ވިދާޅުވީ ޝަރުޢީ ނިޒާމަށް ހެޔޮބަދަލުތަކެއް މިހާރު އައިސްފައިވާކަމަށާއި، އެއީ މަޖިލީޖުގެ ފޯކަސް އެދާއިރާއަށް ނުގެއްލޭތީކަމަށެވެ.
"ކޯޓުތައް ރަނގަޅުވަނީ އިއްޒަތްތެރި މެންބަރުން މަސައްކަތްކޮށްދެއްވާތީވެ. މިމަޖިލީހުން ވަރަށް ގާތުން އެކަންކަން ބައްލަވާތީވެ. އަދި ޖުޑީޝަރީ ކޮމިޓީގެ ފޯކަސްވެސް ނަޒަރުވެސް ކޯޓުތަކަށް ނުގެއްލޭތީވެ. އަދި ތިއިއްޒަތްތެރި މެންބަރުންގެވެސް ނަޒަރު ނުގެއްލޭތީވެ." ރައީސް ނަޝީދު ވިދާޅުވިއެވެ.
ޝަރުއީ ނިޒާމު އިޞްލާހުކޮށް ރައްޔިތުންގެ އިތުބާރާ ޔަގީންކަން ހޯދައިދިނުމަކީ މިސަރުކާރުގެ ރިޔާސީ ވަޢުދެކެވެ ޝަރުޢީ ނިޒާމުގެ މަސައްކަތްތައް ހަރުދަނާކަމާއެކު ރަނގަޅަށް ކުރިއަށް ގެންދިއުމަށް އެހެން މުއައްސަސާތަކުގެ އެއްބާރުލުން ބޭނުންވާކަން ސަރުކާރުން ވަނީ ފާހަގަކުރައްވާފައެވެ.