ހދ. ނާގޯށި ތަރައްޤީކުރުމުގެ އަމަލީ މަސައްކަތް އަންނަ އަހަރުގެ ކުރީކޮޅު ފެށޭނެކަމަށް މޯލްޑިވްސް ޓޫރިޒަމް ޑިވެލޮޕްމަންޓް ކޯޕަރޭޝަން، އެމްޓީޑީސީން ބުނެފިއެވެ.
ޕީއެސްއެމް ނިއުސްގެ ރާއްޖެ މިއަދު ޕްރޮގުރާމްގައި ވާހަކަދައްކަވަމުން އެމްޓީޑީސީގެ މެނޭޖިންގ ޑިރެކްޓަރ ތަޒްމީލް އަބްދުއްސަމަދު ވިދާޅުވީ، ނާގޯށި މަޝްރޫއަކީ ހދ. އަތޮޅުގައި ފަތުރުވެރިކަން ކުރިއެރުވުމަށް އެމްޓީޑީސީން ފެށި އުންމީދީ ޕްރޮޖެކްޓެއްކަމަށެވެ. ތަޒްމީލް ވިދާޅުވީ 2007 ވަނަ އަހަރު މިރަށް ތަރައްޤީކުރުމުގެ މަސައްކަތް ކޮންމެވެސް ވަރަކަށް ފެށިނަމަވެސް ވަކި ހިސާބަކުން އެމަސައްކަތް ހުއްޓުނުކަމަށެވެ. އަދި އަންނަ އަހަރުގެ ކުރީކޮޅު ރަށް ތަރައްޤީކުރުމުގެ އަމަލީ މަސައްކަތް ފެށޭނެކަމަށް އޭނާ ވިދާޅުވިއެވެ. އަދި ކުރިއަށްއޮތް 2 އަހަރު ނުތަތަ 3 އަހަރުތެރޭ ނާގޯށި ތަރައްޤީކޮށް މާކެޓަށް ނެރެވޭނެކަމަށާއި ރާއްޖޭގައި ތަރައްޤީކުރެވޭ އެންމެ މަތީ ފަންތީގެ ރިސޯޓްތަކުގެ ތެރެއިން ރިސޯޓަކަށް މިތަން ވެގެންދާނެކަމަށް އޭނާ ވިދާޅުވިއެވެ.
ތަޒްމީލް ވިދާޅުވީ، ކުންފުނިން ގެންގުޅޭ މޮޑެލް މިހާރު ކޮންމެވެސް ވަރަކަށް ބަދަލުކޮށްފައިވާކަމަށެވެ. ކުރިން އެމްޓީޑީސީގައި އޮތީ ކުންފުނީގެ ރަށްތައް ކުއްޔަށް ދީގެން ކުލިން މަންފާ ލިބޭނެ ފަދަ މޮޑެލްއެއްކަމަށާއި ނަމަވެސް މިހާރު ނާގޯށި ތަރައްޤީކުރާނީ ޖޮއިންޓް ވެންޗަރ މޮޑެލްއެއްގެ ގޮތުގައިކަމަށް ތަޒްމީލް ވިދާޅުވިއެވެ. މީގެ ސަބަބުން އެރަށް ތަރައްޤީކޮށް އެރަށް ހިންގުގައި އެމްޓީޑީސީގެ ދައުރު އޮންނާނެކަމަށާއި، ކުންފުންޏަށް ލިބޭ އާމްދަނީވެސް އިތުރުވެގެންދާނެކަމަށް އޭނާ ވިދާޅުވިއެވެ.
" 2 ޕާޓީއަކުން ރަށް ތަރައްޤީކުރި ކަމުގައިވީނަމަވެސް އެމްޓީޑީސީގެ މަދުވެގެން 15 އިންސައްތަ ހިއްސާއެއް އޮވެގެން މިރަށް ތަރައްޤީކުރެވި އޮޕަރޭޓް ކުރެވިގެން ދިއުން އެއީ އަޅުގަނޑުމެންގެ އަމާޒަކީ. މީގެ ސަބަބުން ކުރީގެ މޮޑެލްތަކާއި އަޅާބަލާއިރު އެމްޓީޑީސީއަށް ލިބޭ އާމްދަނީ ބޮޑުތަނުން އިތުރުވެގެންދާނެ. އެއީ ކުރިން އަޅުގަނޑުމެންގެ ރިސޯޓްތަކުން ލިބެނީ ހަމައެކަނި ކުލި. އެހެންނަމަވެސް މިހާރު އަޅުގަނޑުމެންނަށް އެތަންތަނުން ކުލީގެ އިތުރުން ވިޔަފާރީގެ ފައިދާ ލިބިގެން އަންނާނެ. މިހުރިހައި ކަމަކުން އެމްޓީޑީސީގެ ހާލަތު އަޅުގަނޑުމެންނަށް ބަދަލުކުރެވިގެން އަންނާނެ." ތަޒްމީލް ވިދާޅުވިއެވެ.
އެމްޓީޑީސީއިން މިހާރުވެސް ވަނީ 2 ރަށެއް ކުއްޔަށްދީފައެވެ. އެއީ އަންނަތަރާ ކިހަވަކާއި އަޔާޑާ މަގުއްދޫއެވެ. މި ދެރަށުގެ އެގްރިމަންޓް 2030 ވަނަ އަހަރަށް ހަމަވާތީ މިރަށްތަކުގެ އެގްރިމަންޓް އައުކުރުމުގެ މަސައްކަތްވެސް ކުރަމުންދާކަމަށް އެމްޓީޑީސީގެ މެނޭޖިންގ ޑިރެކްޓަރ ވިދާޅުވިއެވެ.
" 2030 ވަނަ އަހަރަށް މިހާރު ކުއްޔަށް ދީފައިވާ 2 ރިސޯޓުގެ މުއްދަތު ހަމަވެގެންދާނެ. ކުންފުނީގެ އެންމެ ބޮޑު އަމާޒަކީ ކުންފުނީގެ ފައިދާ އިތުރުކުރުމުގައި މި 2 ރިސޯޓް އިތުރު ޕްރޮޕޯސަލްތަކާއި އެކުގައި ކުރިއަށްދިއުމުގެ މަސައްކަތް ކުރުން. އެއީ ކުންފުނީގެ ފައިދާ އިތުރުކުރުމަށް އަޅުގަނޑުމެންނަށް އޮތް އެންމެ ބޮޑު މަގު." ތަޒްމީލް ވިދާޅުވިއެވެ.
އެމްޓީޑީސީގެ ރަށްތައް އިތުރުކުރުމަށް އިތުރު 5 ރަށެއް ދައުލަތުގެ ފަރާތުން އެމްޓީޑީސީއަށް ހޯދުމަށްޓަކައި މިހާރު މަޝްވަރާތައް ފަށާފައިވާކަމަށް އެ ކުންފުނިން ބުނެއެވެ. އެމްޓީޑީސީއަކީ ފަތުރުވެރިކަމުގެ ސިނާއަތުގެ މަންފާ ދިވެހި ރައްޔިތުންނަށް ހޯދައިދިނުމުގެ ގޮތުން ސަރުކާރުން 2006 ވަނަ އަހަރު އުފެއްދެވި ކުންފުންޏެކެވެ.