އަމިއްލަ ފަރުދުންގެ ވިޔަފާރީގެ ތެރެއިން 51 ވިޔަފާރިއެއް އިކޮނޮމިކް މިނިސްޓްރީން އުވާލައިފިއެވެ.
އިކޮނޮމިކް މިނިސްޓްރީން ވިދާޅުވެފައިވަނީ އަމިއްލަ ފަރުދުންގެ ވިޔަފާރީގެ ޤާނޫނުގެ ދަށުން އެ މިނިސްޓްރީގައި ރަޖިސްޓްރީކޮށްފައިވާ ބައެއް ވިޔަފާރިތައް ބާތިލް ކޮށްފައިވާކަމަށެވެ. މީގެތެރޭގައި އަމިއްލަ ފަރުދުންގެ 51 ވިޔަފާރިއެއް ހިމެނެއެވެ. މި ވިޔަފާރިތައް ބާތިލްކޮށްފައިވަނީ މިއަހަރުގެ ފެބްރުއަރީމަހުގެ ތެރޭގައެވެ.
ޕީއެސްއެމް ނިއުސްއަށް މައުލޫމާތުދެއްވަމުން ރަޖިސްޓްރަރ އޮފް ކޮމްޕެނީސް މަރިޔަމް ވިސާމް ވިދާޅުވީ، އުވާލި ވިޔަފާރިތަކަކީ އެ ފަރާތްތަކުން ވިޔަފާރި ކުރިއަށްގެންދަން ބޭނުން ނުވެގެން އުވާލަދިނުމަށް މިނިސްޓްރީގައި އެދިފައިވާ ވިޔަފާރިތައްކަމަށެވެ. ވިޔަފާރި އުވާލަން އަމިއްލައަށް އެދޭ ފަރާތްތަކަށް ޤާނޫނު ބުނާގޮތުން އެ ފަރާތައް ދައްކަންޖެހޭ ހުރިހާ ޓެކުހެއް ހަލާސްކުރުމުން އިކޮނޮމިކް މިނިސްޓްރީން އެ ވިޔަފާރިއެއް އުވާލަދޭނެކަމަށް ވިސާމް ވިދާޅުވިއެވެ.
އަހަރީ ފީ ދައްކާފައިނުވާ 4924 ކުންފުންޏެއްވެސް އިކޮނޮމިކް މިނިސްޓްރީން މިއަހަރުގެ ތެރޭގައި ވަނީ އުވާލާފައެވެ. އެ މިނިސްޓްރީން ވިދާޅުވީ 1979 ވަނަ އަހަރުން 2018 ވަނަ އަހަރާއި ހަމައަށް އަހަރީ ފީ ދައްކާފައިނުވާ 6050 ކުންފުންޏެއް ރެކޯޑްކުރެވިފައިވާކަމަށެވެ.