ފްލައިމީގެ އެތެރޭގެ އުދުހުންތައް އަލުން ފަށައިފިއެވެ.
6 މަސްދުވަހުގެ މެދުކެނޑުމަކަށްފަހު އަލުން ފްލައިމީގެ ޑޮމެސްޓިކް ފްލައިޓްތައް ފަށާފައިވަނީ އިއްޔެއެވެ.
ޕީއެސްއެމް ނިއުސްއަށް މައުލޫމާތުދެއްވަމުން ފްލައިމީގެ މެނޭޖިންގ ޑިރެކްޓަރ އަބްދުﷲ ނާޝިދު ވިދާޅުވީ، ވިލާ އެއަރގެ ޑޮމެސްޓިކް ފްލައިޓްތައް އެންމެ ފުރަތަމަ ފެށީ ވެލާނާ އިންޓަނޭޝަނަލް އެއަރޕޯޓުން މާމިގިލި އެއަރޕޯޓަށްކަމަށެވެ. އެގޮތުން އިއްޔެ 2 ފްލައިޓް ބާއްވާފައިކަމަށް އޭނާ ވިދާޅުވިއެވެ.
ނާޝިދު ވިދާޅުވީ، ފްލައިޓްތައް އޮޕަރޭޓްކުރާނީ ޑިމާންޑް އޮންނަ މިންވަރަށް ބެލުމަށްފަހުގައިކަމަށެވެ. މިވަގުތު މާމިގިއްޔަށް ދަތުރުތައް ފެށިނަމަވެސް އެހެން މަންޒިލްތަކަށްވެސް ޑިމާންޑް އޮތްގޮތް ބަލަމުންދާކަމަށް އޭނާ ވިދާޅުވިއެވެ. އެގޮތުން ޑިމާންޑް އޮތްގޮތް ބެލުމަށްފަހު ދަރަވަންދޫއަށްވެސް ފްލައިޓްތައް އޮޕަރޭޓްކުރަން ފަށާނެކަމަށް އޭނާ ވިދާޅުވިއެވެ.
ވިލާ އެއަރއިން ބުނީ ކޯވިޑްގެ ކުރިން ޗާޓަރު ފްލައިޓްތަކާއި ޝެޑިއުލް ފްލައިޓްތައް ހިމަނައިގެން ދުވާލަކު އެވްރެޖްކޮށް 32 ދަތުރު ކުރަމުންދިޔަކަމަށެވެ.
ސެޕްޓެމްބަރ މަހުގެ 3 ވަނަ ދުވަހު ވިލާ އެއަރއަށް ވަނީ ބައިނަލްއަޤްވާމީ ދަތުރުތައް ކުރުމުގެ ހުއްދަވެސް ލިބިފައެވެ. އެގޮތުން 4 ސެޕްޓެމްބަރ ގައި މާލެއާއި ލަންކާއާއި ދެމެދު ފްލައިމީއިން ވަނީ ޗާޓަރ ދަތުރެއް ބާއްވާފައެވެ. އަދި ކޮލަންބޯގެ ބޯޑަރު ހުޅުވާލުމުން ރާއްޖެއާއި ރަތަމަލާން އެއަރޕޯޓާއި ދެމެދު ޝެޑިއުލް ދަތުރުތައް ފަށާނެކަމަށް ފްލައިމީއިން ބުނެއެވެ.