ވޯލްޑް ޓްރެވެލް އެވޯޑްސްގެ ލީޑިންގ އެއަރޕޯޓަކަށް ވެލާނާ އިންޓަނޭޝަނަލް އެއަރޕޯޓް ނޮމިނޭޓްވެއްޖެއެވެ.
ވޯރލްޑް ޓްރެވެލް އެވޯޑްސްއަކީ ފަތުރުވެރިކަމުގެ ދާއިރާއާއި ދަތުރުފަތުރާއި މެހުމާންދާރީގެ ދާއިރާއިން ކުރިއަރަމުންދާ ޤައުމުތަކުގެ މަސައްކަތްތައް ފާހަގަކުރުމަށްޓަކައި 1993 ވަނަ އަހަރު ދެމުން އަންނަ ދުނިޔޭގެ ފެންވަރުގައި ފާހަގަކޮށްލެވޭ އެވޯޑެކެވެ.
ވޯލްޑް ޓްރެވެލް އެވޯޑްސްގެ "ލީޑިންގ އެއަރޕޯޓްސް 2020"އަށް ވީއައިއޭ ނޮމިނޭޓް ވެފައިވާއިރު މިއީ މި އެވޯޑަށް ވީއައިއޭ ނޮމިނޭޓްވި 12 ވަނަ ފަހަރެވެ.
ވީއައިއޭގެ އިތުރުން ވޯލްޑްސް ލީޑިންގ އެއަރޕޯޓްގެ އެވޯޑަށް އިތުރު 22 އެއަރޕޯޓެއް ވާދަކުރެއެވެ. އޭގެތެރޭގައި ޔޫއޭއީ، ސްޕެއިން، ނިއުޒިލޭންޑް، ސައުތު އެފްރިކާ، ޗައިނާ، އޮމާން ފަދަ ޤައުމުތަކުގެ އެއަރޕޯޓްތައްވެސް ހިމެނެއެވެ. ފާއިތުވެދިޔަ ދެ އަހަރު މި އެވޯޑު ކާމިޔާބުކުރި ސިންގަޕޯގެ ޗަންގީ އެއާޕޯޓުވެސް މި އެވޯޑަށް އަންނަނީ ވާދަކުރަމުންނެވެ.
މި އެވޯޑަށް ވޯޓުލުމުގެ ފުރުސަތު މިހާރު ވަނީ ހުޅުވާލާފައެވެ. މިމަހުގެ 25 ވަނަ ދުވަހުގެ ނިޔަލަށް ވޯޓު ދިނުމުގެ ފުރުސަތު އޮންނާނެއެވެ.
ކޯވިޑް19 އަށްފަހު ވެލާނާ އިންޓަނޭޝަނަލް އެއަރޕޯޓް އަލުން ހުޅުވާފައިވާއިރު ރައްކާތެރިކަމުގެ ގިނަ ފިޔަވަޅުތަކެއްވެސް ވަނީ އަޅާފައެވެ.
ބައިނަލްއަޤްވާމީ ކައުންސިލްއެއްކަމަށްވާ އެއަރޕޯޓް ކައުންސިލް އިންޓަރނޭޝަނަލްއިން ދޭ ދަތުރުކުރުން ރައްކާތެރި އެއަރޕޯޓެއްކަމަށް ކަނޑައަޅާ "އެއަރޕޯޓް ހެލްތް އެކްރެޑިޓޭޝަން" ވެސް ވެލަނާ އިންޓަރނޭޝަނަލް އެއަރޕޯޓަށް ދާދިފަހުން ވަނީ ލިބިފައެވެ. މިއީ ކޯވިޑް-19އާ ގުޅިގެން ރައްކާތެރިކަމުގެ މިންގަނޑު ހުރީ ރަނގަޅަށްކަން ކަނޑައަޅައިދޭ މިންކުރުމެކެވެ. ވެލާނާ އިންޓަރނޭޝަނަލް އެއަރޕޯޓަކީ އޭޝިއާ ޕެސިފިކް ސަރަޙައްދުން މި މިންކުރުން ލިބުނު 2 ވަނަ އެއަރޕޯޓްވެސްމެއެވެ.