ދިވެހި ރާއްޖޭގައި، މާލީ ދާއިރާއިން ދޭ ޚިދުމަތްތަކާއި އެ ދާއިރާއާއި ބެހޭ މަޢުލޫމާތު ރައްޔިތުންނަށް ފޯރުކޮށްދިނުމަށް ރާއްޖޭގައި ފުރަތަމަ ފަހަރަށް ފައިނޭންޝަލް އެކްސްޕޯއެއް ބޭއްވުމަށް މޯލްޑިވްސް މަނިޓަރީ އޮތޯރިޓީ، އެމް.އެމް.އޭއިން ނިންމަވައިފިއެވެ.މި ފައިނޭންޝަލް އެކްސްޕޯ އޮންނާނީ އަންނަ އޮކްޓޫބަރުމަހުގެ 6 ވަނަ ދުވަހާއި 7 ވަނަ ދުވަހު ދަރުބާރުގޭގައެވެ.މި އެކްސްޕޯ ހުޅުވުން އޮންނާނީ ރަންދިހަ ފަހެއް ނޫޓް ސީރީޒް ތައާރަފްކުރުމަށް ބާއްވާ ހާއްސަ ހަފްލާގައިކަމަށް އެމްއެމްއޭއިން މައުލޫމާތުދެއްވައެވެ.މި އެކްސްޕޯގައި ރަންދިހަ ފަހެއް ނޫޓް ސީރީޒްއާއި ރާއްޖޭގައި އެކި ދުވަސްވަރު ބޭނުންކޮށްފައިވާ ފައިސާ ދައްކުވައިދޭ ގެލެރީއެއް ހުންނާނެކަމަށްވެސް އެމް.އެމް،އޭއިންވަނީ ހާމަކޮށްފައެވެ. މި އެކްސްޕޯގައި ރާއްޖޭގައި މާލީ ޙިދުމަތްދޭ މުއައްސަސާތަކުގެ އިތުރުން މާލީ ދާއިރާއާއި ގުޅުން ހުރި ދައުލަތުގެ މުއައްސަސާތަކުން ބައިވެރިވާނެއެވެ.މި ފައިނޭންޝަލް އެކްސްޕޯއަކީ ދިވެހި ރާއްޖޭގެ މާލީ ދާއިރާއާއި ރައްޔިތުންނާ ދެމެދު އޮންނަ ގުޅުން ވަރުގަދަ ކުރުމާއި މާލީ ދާއިރާގައި ހުރި ޒަމާނީ ވަސީލަތްތަކާއި، ހޯދިފައިވާ ކުރިއެރުންތައް ހާމަކޮށް އެއް ފުރާޅެއްގެ ދަށުން މާލީ ދާއިރާގެ ކުރިމަގު ބައްޓަން ކުރާނެ ގޮތްތަކާއި ބެހޭ ގޮތުން މަޝްވަރާ ކުރުމަށް ބާއްވާ އެކްސްޕޯއެއްކަމަށް އެމްއެމްއޭގެ ގަވަރނަރ ޑރ އަޒީމާ އާދަމް ވިދާޅުވިއެވެ. އެގޮތުން މިއެކްސްޕޯގެ ތެރޭގައި ފައިނޭޝަލް ދާއިރާގެ އެކްސްޕާޓުންނާއެކު ޕެނަލް ޑިސްކަޝަން ކުރިއަށްދާނެކަމަށާއި އަދި ރައުންޑް ޓޭބަލް މަޝްވަރާތައް ކުރިއަށްދާނެކަމަށް އެމް.އެމް.އޭއިން މައުލޫމާތުދެއްވިއެވެ.