ސިޔާސީ ޕާޓީތަކުގެ ޤާނޫނު އިސްލާހު ކުރާއިރު، ޕާޓީތަކުން ހިންގާ ޙަރަކާތްތައް އެ ޕާޓީތަކުގެ ދަފްތަރު ލިސްޓަށް ބަލައިގެން ކުރިއަށްދެވޭގޮތަށް އިސްލާޖި ގެނައުމަށް ސިޔާސީ ޕާޓީތަކުން އެދިއްޖެއެވެ. ސިޔާސީ ޕާޓީތަކުގެ ޤާނޫނަށް ގެންނަން ފެންނަ އިސްލާހުތަކާއި ގުޅޭގޮތުން ސިޔާސީ ޕާޓީތަކުގެ މަޝްވަރާ ހޯދުމަށް އިލެކްޝަންސް ކޮމިޝަނުން ވަނީ ޚާއްޞަ ބައްދަލުވުމެއް ބާއްވާފައެވެ.
"ސިޔާސީ ޕާޓީތަކުގެ ޤާނޫނު"އަށް އިސްލާހު ގެނައުމާ ގުޅޭގޮތުން މަޝްވަރާ ކުރުމަށް ބޭއްވި ބައްދަލުވުމުގައި ސިޔާސީ ޕާޓީތަކުން ވަނީ ޤާނޫނަށް ގެންނަ އިސްލާހުތަކަށް ގިނަ ޚިޔާލުތަކެއް ހުށައަޅާފައެވެ. މީގެތެރެއިން މައިގަނޑުގޮތެއްގައި ހުރިހާ ޕާޓީތަކުން ޚިޔާލުހުށައެޅި އެއް ދާއިރާއަކީ ދެލިކޮޕީގެ 9ވަނަ މާއްދާ "ސިޔާސީ ޕާޓީތަކުގެ މެންބަރުން" މި މާއްދާއަށެވެ.
މި މާއްދާގެ ޑްރާފްޓްގައި ބުނެފައިވަނީ ސިޔާސީ ޕާޓީތަކުން ހިންގާ ކަންކަން ހިންގަންވާނީ އިލެކްޝަންސް ކޮމިޝަންގައިި ރަޖިސްޓްރީކޮށްފައިވާ މެންބަރުންގެ ލިސްޓަށް ބަލައިގެންކަމަށެވެ. މި މާއްދާއަށް ޚިޔާލު ހުށައެޅި ހުރިހާ ޕާޓީއަކުންވެސްވަނީ މިގޮތަށް އޮތް އޮތުން ބަދަލުކޮށްދިނުމަށް އެދިފައެވެ. ޕާޓީތަކުން އެދިފައިވަނީ ޕާޓީތަކުގެ އެތެރޭގެ އިންތިޚާބުތަކާއި، އަދި އެހެނިހެން ކަންކަން ޕާޓީގެ އެތެރޭގެ ދަފްތަރަށް ބަލައިގެން ކުރިއަށް ގެންދެވެންޖެހޭނެކަމަށެވެ. ޕާޓީތަކުން ފާހަގަކުރިގޮތުގައި މިފަދަ ޤާނޫނެއްގެ ސަބަބުން ޕާޓީގެ އެތެރޭގެ ކަންކަމަށް ވަނުމުގެ ފުރުޞަތު އިލެކްޝަންސް ކޮމިޝަނަށް ފަހިވެގެންދާނެއެވެ. މީގެއިތުރުން އިލެކްޝަންސް ކޮމިޝަނުގެ ދަފްތަރުގައި ހިމެނުމަށް ހުށައަޅާ ފޯމްތައް ޕްރޮސެސްކުރުމުގައިވެސް ގިނަ ދުވަސް ހޭދަވާކަން ޕާޓީތަކުން ވަނީ ފާހަގަކޮށްފައެވެ.
"އިލެކްޝަންސްއިން ފޯމްތައް ޕްރޮސެސްކުރަން 4-5މަސްވެސް ނަގާ. އެހެންވީމައި ޕާޓީގެ އެތެރޭގެ ކަންކަން ކުރިއަށްގެންދާއިރު ޕާޓީގެ ދަފްތަރަށް ބަލަންޖެހޭނީ." ޕާޓީތަކުގެ މެންބަރުން ފާހަގަކުރިއެވެ.
އިލެކްޝަންސް ކޮމިޝަނުން ވިދާޅުވީ މިގޮތަށް ޤާނޫނުގައި ހިމެނުމަށް ހުށައަޅަން ނިންމީ، ޕާޓީތަކުގެ މެންބަރުންގެ މަޢުލޫމާތާއި އަދަދުތަކުގެ ދަފްތަރު ބެލެހެއްޓޭނެ ރަނގަޅު ނިޒާމެއް ކަނޑައެޅުމާއި، އޮޅުވާލައިގެން ޕާޓީތަކުގައި ރަޖިސްޓްރީކުރުން ހުއްޓުވުމަށްކަމަށެވެ.
މި ބައްދަލުވުމުގައި ކައުންސިލްތަކުގައި އަންހެން މެންބަރުންގެ އަދަދު 33 އިންސައްތައަށް ހަމަޖެއްސުމާއިގުޅޭ މާއްދާއާއި ދެކޮޅަށް ބައެއް މެންބަރުން ވަނީ ވާހަކަދައްކާފައެވެ. މެންބަރުން ބުނެފައިވަނީ މިހާރުވެސް އަންހެނުނަށް ޕާޓީތަކުގެ ތެރޭގައި ހަމަހަމަ ފުރުސަތު އެބައޮތްކަމަށާއި، މި މާއްދާގެ ސަބަބުން ޤާނޫނުން ފަހިކޮށްދޭ ހަމަހަމަ ފުރުސަތަށް ހުރަސްއެޅޭކަމަށެވެ.
ޑްރާފްޓްގެ 6ވަނަ މާއްދާގައި ހިމެނޭ އަހަރީ ރިޕޯޓާއި އޮޑިޓް ރިޕޯޓް އިލެކްޝަންސް ކޮމިޝަނުން އަންގާގޮތަކަށް ހަދައި ހުށަހަޅަންޖެހޭގޮތަށް އޮތް އޮތުންމަށްވެސް މެންބަރުންވަނީ ތަފާތު ޚިޔާލުތައް ހުށައަޅާފައެވެ. އެގޮތުން އޮޑިޓް ރިޕޯޓަކީ ވަކި އުސޫލަކުން ކުރާކަމަކަށްވާތީ އިލްކްޝާނުން ކަނޑައަޅާ ގޮތަކަށް އެކަންކޮށްފިނަމަ، އޮޑިޓްގެ އަސްލަށް އުނިކަން އައިސްދާނެކަމަށް ޕާޓީތަކުން ވަނީ ބުނެފައެވެ.
މީގެއިތުރުން ޕާޓީގެ "ހުރިހާ" ލިޔެކިޔުންތައް 5 އަހަރަށް ބަލަހައްޓަންޖެހޭނެކަމަށް އޮތް އޮތުން، މުހިންމު ލިޔެކިޔުންތަކަށް ބަދަލުކޮށްދިނުމަށްވެސްވަނީ އެދިފައެވެ. އަދި ޕާޓީން ހިންގާ ހުރިހާ ހަރަކާތްތަކާއި، ޕާޓީގެ މުހިންމު ނިންމުންތައް އެންމެންނަށް ފެންނަގޮތަށް ވެބްސައިޓުގައި އާއްމުކުރަންޖެހޭގޮތަށް އޮތުމުން ޕާޓީތަކުގެ ވާދަވެރިކަން ކުޑަވެ މަސައްކަތަށް ބުރޫއަރާނެކަމަށްވެސް ޕާޓީތަކުން ވަނީ ބުނެފައެވެ.
އިލްކްޝަންސް ކޮމިޝަނުން ވިދާޅުވި ފައިނަލް ޑްރާފްޓް އެކުލަވާލައި އެޓަރނީޖެނެރަލަށް ހުށައަޅާނީ، ޕާޓީތަކުން ހުށައަޅާ ޚިޔާލުތަކަށް ބެލުމަށްފަހުކަމަށެވެ.