ވިޔަފާރި ބަނދަރަށް ގެންނަ މުދަލުން ނަގަމުން އަންނަ ބައެއް ފީތަކަށް ގެނައި ބަދަލަށް އަމަލުކުރުން އެމްޕީއެލްއިން ފަސްކޮށްފިއެވެ.
މޯލްޑިވްސް ޕޯޓްސް ލިމިޓެޑް، އެމްޕީއެލްއިން ވަނީ އެ ކުންފުނިން ރޭގަނޑު 10:30 އިން ހެނދުނު 7:30އާ ދެމެދު ދޭ ޚިދުމަތްތަކުން ނަގަމުންދިޔަ 30 އިންސައްތައިގެ ސާޗާޖު އުވާލައި އެ ކުންފުނިން ނަގާ ހޭންޑްލިން އަދި ވޯފޭޖުން ނަގާ ޗާޖުތައް ހަތް ޕަސެންޓަށް އިތުރުކުރުމަށް ނިންމާފައެވެ. މި ބަދަލަށް އަމަލުކުރަން ފަށާނެ ތާރީހެއްގެ ގޮތުގައި ކުރިން ކަނޑައަޅާފައިވަނީ މިއަދުން ފެށިގެންނެވެ.
ނަމަވެސް އެމްޕީއެލްއިން ނެރުނު ބަޔާނެއްގައި ބުނެފައިވަނީ 30 އިންސައްތައިގެ ސާޗާޖު އުވާލައި ހޭންޑްލިން އަދި ވޯފޭޖުން ނަގާ ޗާޖު އިތުރުކުރުމަށް ނިންމި ނިންމުމަށް އަމަލުކުރަން ފަށާނީ އަންނަ މަހުގެ 1 ވަނަ ދުވަހުން ފެށިގެންކަމަށެވެ.
ރޭގަނޑު ނަގާ 30 ޕަސެންޓުގެ ސާޗާޖު އުވާލުމަށް އެމްޕީއެލްއިން ނިންމާފައިވަނީ ރާއްޖެއަށް ގެންނަ މުދާ ކްލިއާ ކުރަން ޑެލިވަރި އޯޑާއަށް އޭޖެންޓުން ތަފާތު ނަން ނަމުގައި ފީތައް ނަގަމުން އަންނާތީއެވެ. މިކަމުގެ ކަންބޮޑުވުން ވިޔަފާރިވެރިން އަންނަނީ ފާޅުކުރަމުންނެވެ. އަދި މީގެ ސަބަބުން ތަކެތީގެ އަގުތައްވެސް ބޮޑުވަމުން އަންނަކަމަށް އެ ފަރާތްތަކުން އަންނަނީ ބުނަމުންނެވެ.