އޭރޯފްލޮޓުން ރަޝިޔާއާއި ރާއްޖެއާއި ދެމެދު ދަތުރުތައް ފަށައިފިއެވެ.
ކޯވިޑް19 އަށްފަހު އެ އެއަރލައިންގެ ދަތުރުތައް ހުއްޓާލާފައި އޮތުމަށްފަހު ފުރަތަމަ ފްލައިޓް ރާއްޖެ އައިސްފައިވަނީ މިއަދު ހެނދުނުއެވެ.
މި ދަތުރުކޮށްފައިވަނީ ރަޝިޔާގެ ޝެރެމެޓޭވޯ އެއާޕޯޓުން ވެލާނާ އިންޓާނޭޝަނަލް އެއާޕޯޓަށެވެ. މި ފްލައިޓްގައި ރަޝިޔާގެ ފަތުރުވެރިން ވަނީ ރާއްޖެ އައިސްފައެވެ.
އޭރޯފްލޮޓުން ރައްޖެއަށް އަލުން ދަތުރުތައް ފަށާފައިވާއިރު ރަޝިޔާއާއި ރާއްޖެއާ ދެމެދު ހަފްތާއަކު ދެ ފްލައިޓު ބާއްވާނެއެވެ. މި ދަތުރުތައް ކުރާނީ ރަޝިޔާގެ ޝެރެމެޓޭވޯ އެއާޕޯޓުން ވެލާނާ އިންޓާނޭޝަނަލް އެއާޕޯޓަށެވެ. އެގޮތުން ރަޝިޔާއިން ރާއްޖެއަށް ފްލައިޓް ބާއްވަން ހަމަޖެހިފައިވަނީ ބުރާސްފަތި އަދި އާދިއްތަ ދުވަހުއެވެ. މާލެއިން ރަޝިޔާއަށް ދަތުރުތައް ކުރާނީ ހުކުރު އަދި އާދިއްތަ ދުވަހުއެވެ.
ރަޝިޔާއިން ރާއްޖެއަށް ދަތުރު ފަށާއިރު އެ ގައުމަކީ ރާއްޖޭގެ ފަތުރުވެރިކަމުގެ މުހިއްމު މާކެޓެކެވެ. ރާއްޖޭގެ ބޯޑަރު އަލުން ހުޅުވާލުމާއެކު އެންމެ ގިނައިން ފަތުރުވެރިން ޒިޔާރަތްކުރި 5 ޤައުމުގެ ތެރޭގައިވެސް ރަޝިއާ ހިމެނެއެވެ. ޖުލައިމަހުގެ 15 ވަނަ ދުވަހުން އޮގަސްޓް މަހުގެ ނިޔަލަށް ރަޝިއާއިން ރާއްޖެއަށް 423 ފަތުރުވެރިން ވަނީ ޒިޔާރަތްކޮށްފައެވެ.
ރަޝިއާގެ ފްލެގް ކެރިއާ އޭރޯފްލޮޓްއަކީ ބޯޑަރު އަލުން ހުޅުވާލުމާއިއެކު ރާއްޖެއަށް ޝެޑިއުލް ދަތުރުތައް ފެށި 8 ވަނަ އެއަރލައިންނެވެ. އޭރޯފްލޮޓްގެ އިތުރުން ޤަތަރު އެއަރވޭސް، އެމިރޭޓްސް، އިއްތިހާދު އެއަރވޭސް، ސްރީލަންކަން އެއަރލައިން، ޓާކިޝް އެއަރލައިން، އެއަރ އިންޑިއާ އަދި އިންޑިގޯއިން އަންނަނީ ރާއްޖެއަށް ދަތުރުތައް ކުރަމުންނެވެ. އަދި ދުނިޔޭގެ އެހެން ބައެއް އެއަރލައިންތަކުންވެސް ރާއްޖެއަށް ޝެޑިއުލް ދަތުރުތައް އަލުން ފެށުމަށް މިހާރު ޝެޑިއުލްކުރަމުން އަންނަކަމަށް އެމްއޭސީއެލްއިން ބުނެއެވެ.