ރޭ މާލޭގައި އަލިފާނުގެ ޙާދިސާހިނގި ކެފޭ ޓިއޯލޯގައި އަލިފާން ރޯވާންވީ އެއްވެސް ސަބަބެއް ނޭނގޭކމަށާއި، ލިބުނު ގެއްލުން ދެމިލިއަނަށް އަރާނެކަމަށް އެކެފޭ ހިންގާ ފަރާތުން ބުނެފިއެވެ.
ރޭ ހިނގި އަލިފާނުގެ ޙާދިސާއާއި ގުޅޭގޮތުން ޕީއެސްއެމް ނިއުސްއާ ވާހަކަދައްކަމުން ކެފޭ ޓިއޯލޯ ހިންގާ ވެރިފަރާތުން ބުނީ ރޭ 2145 ހާއިރު އަލިފާނުގެ ޙާދިސާ ހިނގިއިރު އެތަނުގެ މުވައްޒަފެއް ބަދިގޭގައި ހުރިކަމަށެވެ. އެހެންނަމަވެސް އެންމެ ފުރަތަމަ އަލިފާން ރޯވީ ބަދިގޭގައި ނޫންކަމަށް އޭނާ ބުންޏެވެ.
މުޅި ކެފޭގައި ކަރަންޓްގެ އެއްވެސް މައްސަލައެއް ނުހުންނޭކަމަށާ، އަލިފާނުގެ ޙާދިސާ ހިނގީ ކަރަންޓް ކަނޑާލާފައި އޮތް ވަގުތެއްގައިކަމަށް އޭނާ ބުންޏެވެ. ކެފޭގެ ބަދިގެ ހުންނަނީ އެންމެ ތިރީ ފަންގިފިލާގައިކަމަށާއި، އެންމެ ފުރަތަމަ އަލިފާން ރޯވެފައިވާކަމަށް ބެލެވެނީ ފުރަތަމަ ފަންގިފިލާގައިކަމަށްވެސް އޭނާ ބުންޏެވެ.
"އެއްވެސް ސަބަބެއް ނޭނގެ އަލިފާން ރޯވާން ދިމާވި. ބަދިގޭގައެއްވެސް ނޫން ރޯވީއެއް. ބަދިގޭގަ މީހަކު ކާންވެސް އިން. ކަރަންޓް ފެއިލް ވެގެންނެއްވެސް ނޫން. އެއީ އެއްއަހަރުވެސް ނުވާކަރަންޓް ވަޔަރިންއެއް. ފަންކާއާއި ލައިޓްތައްވެސް ހުރީ ނިއްވާފަ. ގޭސް ލީކެއްވެސް ނުވޭ." ކެފޭގެ ވެރިފަރާތުން ބުނެޏެވެ.
އޭނާ ބުނީ ކެފޭގައި އަލިފާން ރޯވިކަން އެންމެ ފުރަތަމަ އެނގުނީ ކެފޭގެ މަތީ ފަންގިފިލާގައި ރޯވެފައިހުރިކަމަށް ބޭރުގައި ތިބި ބަޔަކު ބުނުމުންކަމަށާ، އެވަގުތު ކެފޭގައި ހުރި މީހާ ވަގުތުން ފުލުހުންނަށް ރިޕޯޓްކުރީކަމަށް ކެފޭގެ ވެރިފަރާތުން ކިޔައިދިނެވެ.
އޭނާ ބުނިގޮތުގައި ރޭ ހިނގި އަލިފާނުގެ ޙާދިސާގައި 2 މިލިއަނެއްހާ ރުފިޔާގެ ގެއްލުން ވެފައިވާނެކަމަށް ބެލެވެއެވެ. ކެފޭ ޓިއޯލޯގެ ނަމުގައި އެކެފޭ ހިންގާތާ މިހާރު ތިންއަހަރުވެފައިވާއިރު، ކެފޭގެ ވެރިފަރާތް ހުރީ ހޯމް ކަރަންޓީންގައެވެ. އޭނާ ބުނީ ހޯމް ކަރަންޓީގައި ހުރުމުގެ ސަބަބުން އަދިވެސް ކެފޭއަށް ލިބުނު ގެއްލުން ބަލާލުމުގެ ފުރުޞަތު ނުލިބޭކަމަށާއި، އަލިފާން ހިނގަން މެދުވެރިވި ސަބަބުން ފުލުހުން ތަޙްޤީޤްކުރަމުން އަންނަކަމުގެ މަޢުލޫމާތު ލިބިފައިވާކަމަށެވެ.
ރޭ ކެފޭ ޓިއޯލޯގައި ހިނގި އަލިފާނުގެ ޙާދިސާގައި އެކެފޭ ވަނީ ބޭނުން ނުކުރެވޭވަރަށް އަނދައި ހުލިވެފައެވެ. އަދި އެކެފޭއާ އިންވެގެން ހުރި ގަދަގޭ މުޙައްމަދުފުޅު ބިލްޑިންގއަށްވެސް ވަނީ ބޮޑެތި ގެއްލުންތަކެއްވެފައެވެ. އެ އަލިފާންގަނޑު ކޮންޓްރޯލްކުރެވުނީ ދެގަޑިއިރެއްހައިއިރު ފަހުންނެވެ.