ދައުލަތުގެ ޓެކްސް އިދާރާ، މީރާގެ ޑިރެކްޓަރުންގެ ބޯޑަށް މެންބަރުން އައްޔަން ކުރުމަށް ރައީސުލްޖުމްހޫރިއްޔާ ރައްޔިތުންގެ މަޖިލީހަށް ފޮނުއްވާފައިވާ 8 ނަންފުޅުގެ ތެރެއިން 5 ނަމަކަށް ރުހުންދޭން ފެންނަކަމަށް ނަންތައް ދިރާސާކުރި ކޮމިޓީން ފާސްކޮށްފިއެވެ. މިމައްސަލަ ދިރާސާކުރީ ރައްޔިތުންގެ މަޖިލީހުގެ އިޤްތިޞާދީ ކޮމިޓީންނެވެ.
މީރާގެ ޑިރެކްޓަރުންގެ ބޯޑަށް މެންބަރުން ޢައްޔަންކުރުމަށް މަޖިލީހަށް ފޮނުވާފައިވަނީ އެބޯޑުގަ މިހާރު ތިއްބެވި ބޭފުޅުންގެ ތެރެއިން ތިން މެމްބަރެއްގެ މަގާމުގެ މުއްދަތު މިމަހުގެ އަށްވަނަ ދުވަހަށް ހަމަވުމާއި، އެހެން މެމްބަރަކު އިސްތިއުފާ ދެއްވުމާއި ގުޅިގެންނެވެ. މީރާގެ ބޯޑުން އިސްތިއުފާ ދެއްވާފައި ވަނީ ފަސީހު ޒާހިރެވެ. އެހެންކަމުން މީރާގެ ބޯޑުން ހުސްވެފައިވާ ހަތަރު މަޤާމަށް ހުޅުވާލުމުން 8 މީހަކު ވަނީ ކުރިމަތިލާފައެވެ. ރައީސްޖުލްމްހޫރިއްޔާ ވަނީ އެމަޤާމަށް ކުރިމަތިލެއްވި 8 މީހުންގެ ނަން މަޖިލީހަށް ފޮނުއްވާފައެވެ.
ނަމަވެސް މިމައްސަލަ ދިރާސާކޮށް އިޤްތިޞާދީ ކޮމިޓީން ނިންމީ 8 ނަމުގެ ތެރެއިން ތެރެއިން 5 ނަމަކަށް ރުހުން ދޭން ފެންނަކަމަށެވެ.
ކޮމިޓީގެ ޢަޣްލަބިއްޔަތުން ރުހުން ދޭން ފެންނަކަމަށް ފާސްކުރި 5 ނަމަކީ؛
މުމްތާޒް ޢަބްދުއްރަޝީދު، މުރިނގު / ހދ.ހަނިމާދޫ
ލީނާ މުޙައްމަދު ޒާހިރު ޙުސައިން، ހ.ނީލްވިލާ
ހުޝާމް ވަޙީދު، ގ. މާލެހިޔާ 2 03-15
ޢަލީ އިރުފާނު، ޑޭލައިޓްވިލާ / ސ. މަރަދޫފޭދޫ
ޢާއިޝަތު ޢަޝާ ޢަލީ، ހ.އީސޓްވާރޑް
މީރާގެ ބޯޑުގައި ތިއްބަވާނީ ހަތް މެމްބަރުންނެވެ. އެއީ ރައީސުލްޖުމްހޫރިއްޔާ ޢައްޔަނުކުރައްވާ ފަސް މެމްބަރަކާއި ފިނޭންސް މިނިސްޓަރު ކަނޑައަޅުއްވާ މެމްބަރަކާއި ކޮމިޝަނާ ޖެނެރަލް އޮފް ޓެކްސޭޝަން އެވެ.