ލ.ގަން ތުނޑި ބަނދަރުގައި އަޅާފައި އޮތް ފުލުހުންގެ ލޯންޗެއްގައި ރޯކޮށްލި މައްސަލާގައި ދެމީހެއްގެ މައްޗަށް ދައުވާކުރުމަށް ކްރިމިނަލް ކޯޓަށް ފޮނުވައިފިއެވެ.
މާރޗް މަހުގެ 22 ވަނަ ދުވަހު ލ.ގަމު ތުނޑި ބަނދަރުގައި އަޅާފައިއޮތް އެރަށު ފުލުހުންގެ "ލޯންޗު 34" ގައި ރޯކޮށްލާފައިވަނީ އެރޭ ދަންވަރު 03:45 ހާއިރުއެވެ. އެރޭ އެސަރަހައްދަށް އެމްއެންޑީއެފް ގޮސް ބެލިއިރު ލޯންޗްގެ ވާ ކަނޑާލާފައިވާކަމަށާއި، މިކަމަކީ ބަޔަކު ގަސްތުގައި ކުރިކަމެއްކަން އެނގޭކަމަށްވެސް ފުލުހުން އެއިރުވަނީ ވިދާޅުވެފައެވެ. އެ އަލިފާނގަޑު ނިންވާލެވުނީ ފަތިހު 5 ޖަހާ އެހާކަންހާއިރު ކަމަށާއި ލޯންޗް ބޭނުން ނުކުރެވޭވަރަށް އަނދާ ފައިވާކަމަށް ފުލުހުން ވިދާޅުވެފައިވެއެވެ.
މިމައްސަލައާއި ގުޅިގެން ދަޢުވާ ކުރުމަށް ކްރިމިނަލް ކޯޓަށް ފޮނުވާފައިވަނީ ލ. ގަން، ތުނޑި، ކަޅައިދޫ ފިނިހިޔާގެ މޫސާ އިނާސްއާއި، އެރަށު ތުނޑި، ލަވްސައިޑް ޢަބްދުއްލަޠީފް އިބްރާހީމްގެ މައްޗަށެވެ.
މި މައްސަލާގައި ދައުވާ އުފުލާފައިވާ ދެމީހުންނަކީ 2007 ގައި ސަލްޓަން ޕާކުގައި ބޮން ގޮއްވާލި މައްސަލާގައި ހިމެނޭ ދެމީހުންނެވެ. މީގެތެރެއިން މޫސާ އިނާސް އަށް ކުށް ސާބިތުވިއެވެ. އަދި އަބްދުއްލަތީފަކީ އެ ހަމަލާއަށް ފަހު ފިލައިގެން އުޅުނު މީހެކެވެ.
މިދެމީހުންގެ މައްޗަށް އުފުލާފައިވަނީ ޓެރަރިޒަމް މަނާކުރުމުގެ ޤާނޫނުގެ ދަށުން، ޓެރަރިސްޓް ޖަމާޢަތަކަށް ތާޢީދުކުރާމީހެއްކަމަށް ދޭހަވާފަދަ ލިޔުމެއް ނުވަތަ ކުރެހުމެއް ނުވަތަ ފޮޓޯއެއް ގެންގުޅުމުގެ ކުށުގެ ދަޢުވާއެވެ.
މި މައްސަލައާ ގުޅިގެން މޫސާ އިނާސް މައްޗަށް ދަޢުވާ ކުރުމަށް ނިންމާފައިވަނީ، އޭނާ ދިރިއުޅޭގެ ލ. ގަން، ތުނޑި، ކަޅައިދޫފިނިހިޔާގެ، އެރަށު މެޖިސްޓްރޭޓް ކޯޓުގެ އަމުރެއްގެ ދަށުން ބަލައިފާސްކުރިއިރު ފެނުނު ލެޕްޓޮޕެއްގެ ހާޑްޑިސްކް ތަޙްލީލްކުރިއިރު ޓެރެރިސްޓް ޖަމާޢަތްތައްކަމަށްވާ އިސްލާމިކް ސްޓޭޓްއާއި އަލް ޤައިދާއަށް ތާޢީދުކުރާކަން ދޭހަކޮށްދޭ ލިޔުންތަކާއި ވީޑިއޯ ފެނިފައިވާތީކަމަށް ޕްރޮސެކިއުޓަރ ޖެނެރަލްގެ އޮފީހުން ވިދާޅުވެއެވެ.
އަދި ޢަބްދުއްލަޠީފް އިބްރާހީމްގެ މައްޗަށް ދަޢުވާ އުފުލުމަށް ނިންމާފައިވަނީ، އޭނާ ދިރިއުޅޭގެ ލ. ގަން، ތުނޑި، ލަވްސައިޑް، އެރަށު މެޖިސްޓްރޭޓް ކޯޓުގެ އަމުރެއްގެ ދަށުން ބަލައިފާސްކުރިއިރު ފެނުނު ހާޑްޑިސްކްއެއް ތަޙްލީލްކުރިއިރު ޓެރެރިސްޓް ޖަމާޢަތްތައްކަމަށްވާ ޖަބްޙަތުއް ނުޞްރާއާއި އަލް ޤައިދާއަށް ތާޢީދުކުރާކަން ދޭހަކޮށްދޭ ލިޔުންތައް ފެނިފައިވާތީކަމަށް ޕީޖީ އޮފީހުން ވިދާޅުވެއެވެ.
މިދެމީހުންގެ މައްޗަށް މިދަޢުވާތައް ސާބިތުވެއްޖެނަމަ 1 އަހަރާއި 3 އަހަރާ ދެމެދުގެ ޖަލު ޙުކުމެއް އަންނާނެއެވެ.