ޕޮލިސް އިންޓެގްރިޓީ ކޮމިޝަނާއި، ކަސްޓަމްސް އިންޓެގްރިޓި ކޮމިޝަން އުވާލާ، ނެޝަނަލް އިންޓެގްރިޓީ ކޮމިޝަންއެއް އުފެއްދުމަށް ރައްޔިތުންގެ މަޖިލީހުން މިއަދު ފާސްކޮށްފިއެވެ.ނެޝަނަލް އިންޓެގްރިޓީ ކޮމިޝަންއެއް އުފެއްދުމަށް ކަނޑިތީމު ދާއިރާގެ މެމްބަރު މުހައްމަދު ހުސައިން ހުށައެޅުއްވި މިބިލް ފާސްވީ ވޯޓުގައި ބައިވެރިވި މެމްބަރުންގެ ތެރެއިން 40 މެމްބަރުންގެ އަޣްލަބިއްޔަތުންނެވެ. މިބިލަށް އަމަލު ކުރަން ފެށުމާއިއެކު ޕޮލިސް އިންޓެގްރިޓީ ކޮމިޝަނާއި، ކަސްޓަމްސް އިންޓެގްރިޓީ ކޮމިޝަން އުވޭނެއެވެ. އަދި ދެ ކޮމިޝަންގެ މަސައްކަތްތަކުގެ އިތުރުން އިމިގްރޭޝަނާއި، ކަރެކްޝަނަލް ސާވިސްގެ މަސައްކަތްތައް ބެލެއްޓުން ނެޝަނަލް އިންޓެގްރިޓީ ކޮމިޝަންގެ ދަށަށް ބަދަލުވެގެންދާނެއެވެ.މިބިލްހުށައެޅުމުގެ ބޭނުމަކީ، ޤާނޫނު ތަންފީޒްކުރާ އިދާރާތަކާއި، އެއިދާރާތަކުގެ މުވައްޒަފުންކުރާ ޤާނޫނާއި ޤަވާއިދާއި ޚިލާފް އަމަލުތައް ބަލައި ތަޙްގީގްކުރުމާއި، އެފަދަ އަމަލެއްކަމަށް ތުހުމަތު ކުރެވޭ އަމަލެއް އެއްވެސް ފަރާތަކުން ހިންގައިފިނަމަ ނުވަތަ ހިންގަން އުޅޭކަމަށް ތުހުމަތު ކޮށް މައްސަލައެއް ހުށައަޅައިފިނަމަ އެކަމެއް ބަލައި ތަހްގީގްކޮށް، އިޖްރާތްތައް ކަނޑައެޅުމެވެ.