ކުޅިވަރުގެ ޚާއްސަ ޗެނަލެއް އުފެއްދުމަށް ހުށައަޅަފައިވާ ކުޅިވަރާބެހޭ ބިލް ރައްޔިތުންގެ މަޖިލީހުން މިއަދު ފާސްކޮށްފިއެވެ. މިބިލް ފާސްވީ ވޯޓުގައި ބައިވެރިވި 48 މެމްބަރުންގެ އިއްތިފާގުންނެވެ.މިބިލުގައި ބުނެފައިވާގޮތުން މިޤާނޫނަށް އަމަލުކުރަން ފަށާތާ 6 މަސް ދުވަހުގެ ތެރޭގައި މޯލްޑިވްސް ސްޕޯޓްސް ޗެނަލެއް އުފައްދަން ޖެހޭނެއެވެ. އެ ޗެނަލް އުފައްދަން ޖެހެނީ ޕަބްލިކް ސާވިސް މީޑިއާ (ޕީއެސްއެމް) އިންނެވެ.ކުރީގެ ފުޓްބޯޅަ ކުޅުންތެރިޔާ އަދި މިހާރު ރައްޔިތުންގެ މަޖިލީހުގެ މަހިބަދޫ ދާއިރާގެ މެމްބަރު އަޙްމަދު ޠާރިގް ހުށައަޅުއްވާފައިވާ މިބިލުގެ ބޭނުމަކީ، ރާއްޖޭގެ ކުޅިވަރުގެ ދާއިރާ ތަރައްގީކޮށް، ކުޅިވަރުގައި ހަރަކާތްތެރިވާ ފަރާތްތަކާއި ކުލަބް ޖަމިއްޔާ ޖަމާއަތްތައް ކުރިއެރުވުމެވެ. ކުޅިވަރާބެހޭ މިބިލްގައި ބުނެފައިވާ ގޮތުން މިބިލަށް އަމަލުކުރަން ފަށާ ތާރީހުން ފެށިގެން 60 ދުވަހުގެ ތެރޭގައި، މޯލްޑިވްސް ނެޝަނަލް ސްޕޯޓްސް ކައުންސިލެއް އެކުލަވައިލަން ޖެހޭނެއެވެ. ސަރުކާރުގެ ކުޅިވަރު މެނިފެސްޓޯގައިވާ އެކިއެކި ކަންތައްތައް ތަންފީޒުކޮށް، މެނިފެސްޓޯގައިވާ ފަދައިން ޤައުމީ އަދި ރަށު ފެންވަރުގައި ވާދަވެރި އަދި އިޖުތިމާޢީ ކުޅިވަރާއި ސަޤާފީ ޙަރަކާތްތައް ކުރިއަރުވައި، އެންމެންގެ ބައިވެރިވުމާއިއެކު މި ކަންތައްތައް ކުރިއަށްގެންދާނެ އުސޫލުތަކާއި ސިޔާސަތުތައް ވެސް މި ބިލުގައި ކަނޑައަޅާފައިވެއެވެ.ބިލްގައިވާ ގޮތުން، ކްލަބް ޖަމިއްޔާތަކުގެ ބެލެނިވެރި ފަރާތަކީ ކޮމިޝަނަރ އޮފް ސްޕޯޓްސްއެވެ. އަދި އެ މަގާމަށް މީހަކު އައްޔަން ކުރަންޖެހޭނީ، ކުޅިވަރާ ބެހޭ ވަޒީރާއި މޯލްޑިވްސް ނެޝަނަލް ސްޕޯޓްސް ކައުންސިލްގެ ލަފައާއެކު ރައީސުލްޖުމްހޫރިއްޔާ ކަމަށްވެސް މި ބިލުގައި ބުނެފައިވެއެވެ.