ކުންފުނިތަކުގެ 2019 ވަނަ އަހަރުގެ އަހަރީ ހިސާބުތަކާއި ރިޕޯޓުތައް އަންނަމަހުގެ 16 ވަނަ ދުވަހުގެ ކުރިން މީރާއަށް ހުށަހަޅަންޖެހޭނެކަމަށް އިކޮނޮމިކް މިނިސްޓްރިން ވިދާޅުވެއްޖެއެވެ.
ދިވެހިރާއްޖޭގެ ކުންފުންޏާބެހޭ ޤާނޫނުގެ ދަށުން ރަޖިސްޓްރީކޮށްފައިވާ ކޮންމެ ކުންފުންޏަކުން، އެކުންފުންޏެއްގެ އަހަރީ ހިސާބުތަކާއި ޑިރެކްޓަރުންގެ ރިޕޯޓާއި އޮޑިޓަރުގެ ރިޕޯޓް، ރަޖިސްޓްރާރ އޮފް ކޮމްޕެނީޒްއަށް ހުށަހަޅަންޖެހެއެވެ.
އިކޮނޮމިކް މިނިސްޓްރީން ވިދާޅުވީ، ކުންފުނިތަކުގެ 2019 ވަނަ އަހަރުގެ އަހަރީ ހިސާބުތަކާއި، ޑިރެކްޓަރުންގެ ރިޕޯޓާއި އޮޑިޓަރުގެ ރިޕޯޓް ބަލައިގަތުމަށް ހަމަޖެހިފައިވަނީ، 16 އޮގަސްޓްގެ ނިޔަލަށް މީރާ މެދުވެރިކޮށްކަމަށެވެ.
ކުންފުނިތަކުގެ އަހަރީ ހިސާބުތަކާއި ރިޕޯޓުތައް ބީޕީޓީ ބަޔާނާއެކު އަބަދުވެސް މީރާއަށް ހުށައަޅަންޖެހެއެވެ.
މާލިއްޔަތު ޤަވާއިދަށް ދާދިފަހުން ގެނައި އިސްލާހާއެކު ކުންފުނިތަކުގެ އަހަރީ ފީއާއި ރަޖިސްޓްރޭޝަން ފީތައްވެސް މިހާރު ބަލައިގަންނާނީ މީރާ މެދުވެރިކޮށެވެ. މާލިއްޔަތު ޤަވައިދަށް ގެނައި އިސްލާހުގައި ޓެކްސްގެ ގޮތުގައި ނުހިމެނޭ ފައިސާގެ ތެރެއިން 73 ބާވަތެއް މީރާ މެދުވެރިކޮށް ބަލައިގަންނަ ގޮތަށް ވަނީ އިސްލާހު ގެނެސްފައެވެ.
ކުންފުނިތަކުގެ އަހަރީ ފީ ދައްކާފައިނުވާ ހަތަރު ހާސް ނުވަ ސަތޭކަ ސައުވީސް ކުންފުންޏެއް ދަދިފަހުން އިކޮނޮމިކް މިނިސްޓްރީން ވަނީ އުވާވެސްލާފައެވެ. މިއީ 1979 ވަނަ އަހަރުން 2018 ވަނަ އަހަރާއި ހަމައަށް އަހަރީ ފީ ދައްކާފައިނުވާ ކުންފުނިތައްކަމަށް އެ މިނިސްޓްރީން ވިދާޅުވެއެވެ.