މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ބެލުމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް އުފައްދަވާފައިވާ ރިޔާސީ ކޮމިޝަންގެ މައްސައްކަތްތައް ހުޓާލާނީ އެކޮމިޝަނުން ތަޙްޤީޤުކުރާ މައްސަލަތައް އިންސާފާހަމައަށް ވާސިލުވުމުންކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ. އެމަނިކުފާނު މިހެން ވިދާޅުވީ، ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ވަހަކަފުޅުދައްކަވަމުންނެވެ.
އެމަނިކުފާނު މިހެން މިވިދާޅުވީ ރިޔާސީ ކޮމިޝަނުގެ މަސައްކަތް މިހާރު ހުއްޓިފައިވާކަަމަށް ރައްޔިތުންގެ މަޖިލީހުގެ މެންބަރުންނާއި އިދިކޮޅު ފަރާތްތަކުން ބުނަމުންދާ ދަނޑިވަޅެއްގައެވެ. ރައީސް މިއަދު ވިދާޅުވީ، މަރު ކޮމިޝަނަކީ، އެމަނިކުފާނު ވަރަށް ހެޔޮ ނިޔަތުގައި އުފައްދަވާފައިވާ ކޮމިޝަނެއްކަމަށެވެ. އެކޮމިޝަނުގައި ބައެއް މެންބަރުން މަދުނަމަވެސް އިތުރު މެންބަރުން ޢައްޔަންކުރުމުގެ ވިސްނުމެއް ނެތްކަން ފާހަގަކުރައްވައި ރައިސް ވިދާޅުވީ، އައު މެންބަރުން ޢައްޔަންކުރައްވައިފިނަމަ އެކޮމިޝަނުން ހިންގާފައިވާ ތަޙްޤީޤްތައް އަލުން ފަށަން ޖެހިދާނެކަމަށެވެ.
ނޫސްވެރިޔާ އަޙްމަދު ރިޞުވާނުގެ މައްސަލައާއި، ޑރ.އަފްރާޝިމް ޢަލީގެ މަރުގެ މައްސަލައާއި، ޔާމީން ރަޝީދުގެ މައްސަލައާއި، ރ.މީދޫ ފެންފިޔާޒުގޭ މުޙައްމަދު އަނަސްގެ މަރުގެ މައްސަލައިގެ އިތުރުން 28 މައްސަލައެއް ރިޔާސީ ކޮމިޝަނުން ބަލަންފަށާފައިވާކަން ރައީސް ފާހަގަކުރެއްވިއެވެ. އެ މައްސަލަތަކުގެ ތެރެއިން 2 މައްސަލައެގެ މަސައްކަތް މުޅިން ނިންމާލެވިފައިވާކަމަށާ، 9 މައްސަލައެއްގެ ތަޙްޤީޤް ނިންމައި ރިޕޯޓް ލިއުމުގެ މަސައްކަތްކުރިއަށް ދާކަަމަށް ރިޔާސީ ކޮމިޝަނުން އެމނަިކުފާނަށް އަރުއްވާފައިވާ މައުލޫމާތުތަކާ ޙަވާލާދެއްވައި ރައީސް ވިދާޅުވިއެވެ. ރައީސް ވަނީ ބައެއް މައްސަލަތަކުގެ ތަޙްޤީްް މިހާރު އޮތް ހިސާބު ތަފްސީލުކޮށްދެއްވާފައެވެ.
"ފުރަތަމަކަމަކަށް ޑރ.އަފްރާޝީމްގެ މަރުގެމައްސަލައިގެ ފައިނަލް ރިޕޯޓް ތައްޔާރުކޮށް އޭގެ އިތުރަށް ދައުވާކުރަން ފޮނުވަންޖެހޭ މީހުންގެ ނަންތަކެއް ފާހަގަކޮށް ޕީޖީ އޮފީހަށް ފޮނުވުނު. އެހެންނަމަވެސް ޕްރޮސެކިއުޓަރ ޖެނެރަލަށް އެވަގުތު ފެނިވަޑައިގަތީ ދައުވާކުރަން ކޯޓަށް ހުށައެޅުމަށް އަދި އިތުރު މަޢުލޫމާތު ބޭނުންވާކަމަށް. އެހެންކަމުން އިތުރަށް ތަޙްޤީޤްކުރަން ފެންނަކަމަށް. އެހެންވީމަ އެއާ ގުޅިގެން އިތުރު ތަޙުޤީޤްތަކެއް ފެއްޓުނީ. ހަމަ އެކޮމިޝަނާ ޕޮލިހުގެ ތަޙްޤީޤް ކޮމިޓީއާއެކު. އެހެންވެ އަދި އެ ނުނިމިއޮތީ." ރައީސުލްޖުމްހޫރިއްޔާ ވިދާޅުވިއެވެ.
ރައީސް ވިދާޅުވީ، ޔާމީން ރަޝީދުގެ މަރުގެ މައްސަލައިގެ ތަޙްޤީޤް ނިންމުމަށް އެކޮމިޝަނުން އަމާޒުހިފާފައިހުރީ އަންނަ އޮގަސްޓްމަހުގެ ނިޔަލަށްކަމަށެވެ. ނަމަވެސް އެ މުއްދަތަށްވުރެ އަވަސްކުރެއްވުމަށް އެކޮމިޝަނަށް ދަންނަވާނެކަމަށްވެސް އެމަނިކުފާނު ވިދާޅުވިއެވެ. އެމަނިކުފާނު ވަނީ ރިޔާސީ ކޮމިޝަނުން ބަލާ މައްސަލަތަކަށް އިިންސާފު ލިބެންދެން މެދުނުކެނޑި މަސައްކަތް ކުރައްވާނެކަމަށް ވިދަޅުވެފައެވެ.
"އަޅުގަނޑުގެ ހުރިހާވެސް އުންމީދަކީ، އަޅުގަނޑު ބޭނުންވަނީ އިރާދަކުރެއްވިއްޔާ މިކަމުގަ ޝަމިލްވާމީހުން ހޯދައި ޝަރީޢަތުގެ ކުރިމައްޗަށް ގެންދިއުން. އެ މަސައްކަތުގައި އަޅުގަނޑު ކުރިއަށްދާނެކަމުގެ ޔަޤީންކަން މިއަދުވެސް އަޅުގަނޑު ތިބޭފުޅުންނަށް އަރުވަން އިނގޭތޯ." ރައީސް ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި ވަނީ އެ ކޮމިޝަނުން ތަޙްޤީޤްކުރާ މައްސަލަތަކުގައި ޝަރީޢަތަށް ފޮނުވަންޖެހޭ އެއްވެސް މީހެއްގެ މައްސަލަ މަޑުޖައްސާލައި ވަކިމީހަކަށްވެގެން އެކަން ނުކޮށްކޮށް ނުލާނެކަމުގެ ޔަޤީންކަންދެއްވާފައެވެ.