މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮންޕެނީ، އެމްޓީސީސީއަށް މިއަހަރުގެ ފުރަތަމަ ކުއަރޓަރުގައި ސާފު ފައިދާގެ ގޮތުގައި 62.3 މިލިއަން ރުފިޔާ ލިބިއްޖެއެވެ. މިއީ 2019 ވަނަ އަހަރުގެ ފުރަތަމަ ކުއަރޓަރާއި އަޅާބަލާއިރު 310.54 އިންސައްތައިގެ އިތުރުވުމެކެވެ.
ފުރަތަމަ ކުއަރޓަރުގައި އެމްޓީސީސީން ޖުމްލަ 353.54 މިލިއަން ރުފިޔާގެ ވިޔަފާރިކޮށްގެން ހިންގުމުގެ ފައިދާގެ ގޮތުގައި 72.45 މިލިއަން ރުފިޔާ ވަނީ ލިބިފައެވެ. 2019 ވަނަ އަހަރުގެ ފުރަތަމަ ކުއަރޓަރުގައި އެމްޓީސީސީއަށް 17.97 މިލިއަން ރުފިޔާގެ ހިންގުމުގެ ގެއްލުމެއް ވަނީ ލިބިފައިކަމަށް އެ ކުންފުނިން ބުނެއެވެ.
2019 ވަނަ އަހަރުގެ 4 ވަނަ ކުއަރޓަރާއި އަޅާބަލާއިރު މިއަހަރުގެ ފުރަތަމަ ކުއަރޓަރުގައި ކުރެވުނު ވިޔަފާރި 6.30 އިންސައްތަ ދަށްކަމަށް ތަފާސް ހިސާބުތަކުން ދައްކައެވެ. ނަމަވެސް މިއަހަރުގެ ފުރަތަމަ ކުއަރޓަރުގައި އެމްޓީސީސީއިން ވަނީ ހިންގުމުގެ ޙަރަދުތައް ކުޑަކޮށްފައިކަމަށް އެ ކުންފުނިން ބުނެއެވެ.
ކުންފުނިން ހާސިލްކޮށްފައިވާ ލަނޑުދަނޑިތަކަށް ބަލާއިރު، ރާއްޖޭގެ އުމްރާނީ ތަރައްޤީގެ ގިނަ މަސައްކަތްތަކެއްކޮށްފައިވާކަމަށް އެ ކުންފުނިން ބުނެއެވެ. އެގޮތުން އުމްރާނީ ތަރައްޤީގެ 53 މަޝްރޫއެއްގެ މަސައްކަތްކޮށް 4 މަޝްރޫއެއްގެ މަސައްކަތް ނިންމާލާފައިވެއެވެ. އަދި 11 ރަށަކަށް މި ކުއަރޓަރުގެ ތެރޭގައި މޮބިލައިޒްކުރެވިފައިވާކަން ވަނީ ފަހަގަކޮށްފައެވެ.
ކުންފުނީގެ އާންމު ވިޔަފާރީގެ ދާއިރާއާއި ކުންފުނީގެ އެހެނިހެން ވިޔަފާރި ދާއިރާތަކަށް އަމާޒުކޮށް ތަފާތު މާކެޓިންގ ހަރަކާތްތަކެއްވެސް ވަނި ހިންގާފައެވެ. ކޯވިޑް19 އާއި ގުޅިގެން ކުންފުނީގެ ވިޔަފާރީގެ މައިގަނޑު ދާއިރާތަކުން ހާސިލްކުރަން ބޭނުންވާ މާލީ ނަތީޖާ ހޯދުމަށް މިއަހަރު ގޮންޖެހުންތަކަކާއި ކުރިމަތިލާންޖެހޭނެކަމަށް އެމްޓީސީސީއިން ބުނެއެވެ. ނަމަވެސް ފަތުރުވެރިކަމާއިއެކު ވިޔަފާރީތަކަށް މި ހާލަތުގައި ގެންނަންޖެހޭ ބަދަލުތައް ގެނެސް ވިޔަފާރި ކުރިއަރުވަން ކުރެވެންހުރި މަސައްކަތްތައް ކުރާނެކަމުގެ ޔަޤީންކަން އެ ކުންފުނިން ވަނީ ދީފައެވެ.