އެމްއެމްއޭއިން ފައިސާ ނެގުމުގެ މައްސަލަ ކުރިއަށްގެންދާނީ ބަޖެޓުގެ އުސޫލުން - މަޖިލީހުގެ ރައީސް
މަރުކަޒީ ބޭންކު، މޯލްޑިވްް މަނިޓަރީ އޮތޯރިޓީ (އެމްއެމްއޭ)އިން ސަރުކާރަށް ދިގުމުއްދަތަކަށް ދަރަނި ނެގޭނެގޮތް ހެދުމަށް ދައުލަތަށް ދަރަންޏަށް ޒިންމާވުމުގެ ޤާނޫނުގެ ބައެއް މާއްދާތައް އިސްތިސްނާކޮށް 4.2 މިލިއަން ރުފިޔާ ނެގުމުގެ ހުއްދައަށް މަޖިލީހަށް ފޮނުވި މައްސަލަ ކުރިއަށްގެންދާނީ ބަޖެޓް ބަހުސް ކުރިއަށްދާ އުސޫލުންކަމަށް މަޖިލީހުގެ ރައީސް މުޙައްމަދު ނަޝީދު ވިދާޅުވެއްޖެއެވެ.
މަޖިލީހުގެ މިއަދު ޖަލްސާގައި ވާހަކަފުޅު ދައްކަވަމުން ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވީ، ދައުލަތަށް ލިބޭ އާމްދަނީއަށް ބަދަލު އަންނަކަމާއިގުޅިގެން އަދި އެ ފައިސާ އެހެންގޮތަކަށް ހޯދަން ސަރުކާރުން މަޖިލީހަށް ހުށައެޅުމަކީވެސް ބަޖެޓް ހުށައެޅުންކަމަށެވެ. އެހެންކަމުން މި މައްސަލަ މަޖިލީހުގައި ކުރިއަށް ގެންދާއިރު މެންބަރުންނަށް ބަހުސް ފުރުޞަތުދެއްވާނީ ބަޖެޓް ބަހުސް ކުރިއަށްގެންދާ އުސޫލުންކަމަށް މަޖިލީހުގެ ރައީސް ވިދާޅުވިއެވެ.
ފިނޭންސް މިނިސްޓަރ އިއްޔެ މަޖިލީހަށް ފޮނުއްވަވާފައިވާ ސިޓީގައި ވަނީ ދައުލަތުގެ ޚަރަދުތައް ފޫބެއްދުމަށް ފައިސާ ހޯދުމަށްޓަކައި ގިނަ ފިޔަވަޅުތަކެއް އެޅުއްވުމަށް ނިންމާފައިވާކަން ބަޔާންކުރައްވާފައެވެ. މިވަގުތު ރާއްޖޭގެ އިޤްތިސާދާއި ދައުލަތުގެ މާލީ ޙާލަތު އޮތްގޮތުން، ގާނޫނީ އިމުގެތެރެއިން ފިޒިކަލް ހަމަތަކާ އެއްގޮތަށް އަމަލު ކުރުމަކީ ދަތިކަމަކަށް ވާނެކަމަށްވެސް ވަނީ ބަޔާންކޮށްފައެވެ.
ދައުލަތުގެ ޚަރަދަށް ޒިންމާވުމުގެ ޤާނޫނުގައި ބަޔާންކޮށްފައިވަނީ ދައުލަތުގެ މަރުކަޒީ ބޭންކުން، ސަރުކާރުން ދަރަންޏަށް ފައިސާ ނެގޭނީ، 91 ދުވަހުގެ ތެރޭގައި އެ ފައިސާ ދައްކާ ޚަލާޞްކުރާގޮތަށް، އެއިރެއްގެ މާކެޓް އިންޓަރެސްޓް ރޭޓަށްވުރެ ދަށްނޫން ރޭޓެއްގައި އެޑްވާންސެއްގެ ގޮތުގައިކަމަށެވެ. މިގޮތުން ފައިސާ ނެގޭނީ، ވޭތުވެދިޔަ ތިން އަހަރުގައި ސަރުކާރަށް ލިބުނު ޖުމްލަ އާމްދަނީގެ މައްޗަށް ބިނާކޮށް އަހަރަކަށް ޖެހޭ އެވްރެޖް އާމްދަނީގެ %1 އަށްވުރެ އިތުރުނުވާނޭ ގޮތެއްގެމަތިންކަމަށްވެސް ޤާނޫނުގައިވެއެވެ.
އަދި ދައުލަތުން ދަރަންޏަށް ފައިސާ، ނަގަންވާނީ ޤައުމީ ތަރައްޤީގެ މަޝްރޫޢުތަކަށާއި، އުފެއްދުންތެރިކަން އިތުރުކުރެވޭނެ ވަސީލަތްތައް ހޯދުމަށް އެކަނިކަމށްވެސް ބަޔާންކޮށްފައިވެއެވެ. އަދި ދަރަނި އަދާކުރުމަށްޓަކައި، ދަރަންޏަށް ފައިސާ ނަގައިގެން ނުވާނެކަމަށްވެސް ބުނެފައިވެއެވެ. ނަމަވެސް، ދައުލަތުގެ ކޭޝްފްލޯ މެނޭޖްކުރުމުގެ ބޭނުމަށްޓަކައި، ގިނަވެގެން 14 ދުވަހުގެ ތެރޭގައި އަނބުރާ ދައްކާގޮތަށް، މަރުކަޒީ ބޭންކުން، ސަރުކާރުން ދަރަންޏަށް ފައިސާ ނެގިދާނެކަމަށްވެސް ދައުލަތުގެ ޚަރަދަށް ޒިންމާވުމުގެ ޤާނޫނުގައި ބަޔާންކޮށްފައިވެއެވެ.
ފިނޭންސް މިނިސްޓަރ އިބްރާހީމް އަމީރު ރައްޔިތުންގެ މަޖިލީހުގެ ރައީސަށް ފޮނުއްވެވި ސިޓީގައި ވަނީ އެމްއެމްއޭއިން ދަރަނި ނެގުމުގައި އަމަލުކުރަންޖެހޭނެކަމަށް ބަޔާންކުރާ އެއުސޫލުތައް އެއްއަހަރު ދުވަހުގެ މުއްދަތަށް އަމަލުކުރުން އިސްތިސްނާކޮށްދެއްވުމަށް އެދިވަޑައިގަންނަވާކަމަށެވެ.